«Hod tamu ja pakinuŭ ścieny BDMU, niekali rodnaha mnie ŭniviersiteta, na kafiedry infiekcyjnych chvarob jakoha prapracavaŭ kala 10 hadoŭ.
Na žal, rodnym jon pierastaŭ być dla mianie paśla padziej žniŭnia 2020 hoda, kali novapryznačany rektar i inšaje kiraŭnictva ŭniviersiteta vyrašyła pryniać bok ciemry i pačało aktyŭna presavać svaich studentaŭ i vykładčykaŭ, jakija paśmieli vykazać alternatyŭnuju hramadzianskuju pazicyju.
Epičnaja historyja z adnamomantavym vyklučeńniem abo nie vyklučeńniem (da hetaha času nie razabralisia, što heta było) niekalkich dziasiatkaŭ studentaŭ i zvalnieńni vykładčykaŭ nazaŭsiody zastanucca haniebnaj staronkaj u historyi VNU, — piša Mikita Sałaviej. —
Mnohija ŭ mianie pytalisia, ci lohka było prosta sabracca i syści. Viadoma, nialohka pierastać pracavać u vydatnym kalektyvie kafiedry infiekcyjnych chvarob, adnoj ź lepšych kafiedraŭ u BDMU, niekatory čas nie chapaje zaniatkaŭ sa studentami i inšych vidaŭ dziejnaści, jakija stali zvyčkaj za 10 hadoŭ.
U toj ža čas ja liču, što ni adna praca, ni adna pasada i ni adzin zarobak nie vartyja taho, kab pastupacca svaimi maralnymi pryncypami, maŭčać, kali vakoł čynicca absalutnaje zło, adkryta parušajucca bazisnyja pravy čałavieka, pierastaje pracavać choć jaki-niebudź zakon, a kaštoŭnaść čałaviečaha žyćcia stanovicca blizkaj da nula.
Na žal, nie ŭsie maje kalehi zmahli heta ŭśviadomić u žniŭni 2020 hoda, a mnohija ź ich nie chočuć uśviadomić i ciapier, nie bačać vidavočnuju ŭzajemasuviaź pamiž padziejami dvuchhadovaj daŭnaści i tym, što adbyłosia i adbyvajecca ŭ našym hramadstvie i šmatpakutnaj Ukrainie siońnia.
Simvalična, što moj sychod z univiersiteta i pieramieny ŭ žyćci supali z Dniom Voli. Dzień Voli — heta taksama pra pieramieny. Pra pieramieny, jakija čakaje bolšaść majho naroda. Pra pieramieny, jakija zakanamiernyja. Pra pieramieny, jakija niepaźbiežnyja. Pra pieramieny, jakija ŭžo iduć. I ja pa-raniejšamu ŭpeŭnieny, što nieŭzabavie kožny hod my zmožam sa ščyraj radaściu adznačać Dzień Voli na vulicach svabodnych Biełarusi i Ukrainy!»
