Siarhiej Kavalčuk
24 sakavika Alaksandr Łukašenka pravioŭ čarhovy schod pa pytańniach sportu. Pa tradycyi, jon vykazaŭ niezadavalnieńnie vynikami Alimpijskich hulniaŭ u Piekinie, a čynoŭniki, taksama pa tradycyi, pakivali hałovami, zapeŭniŭšy, što vysnovy buduć zroblenyja. A jašče chutka znajšli krajniaha, jaki adkazaŭ za pravał na Zimovych Hulniach. Im staŭ namieśnik ministra sportu Michaił Partnoj, jaki pracavaŭ na pasadzie z 2015 hoda. Zrešty, pakarali čynoŭnika nie vielmi surova — chutka jon stanie kiraŭnikom RCAP pa koniehadoŭli «Ratamka».
Pavodle infarmacyi «Trybuny», na toj ža naradzie Łukašenka daručyŭ Kavalčuku ŭzmacnić ideałahičnuju pracu ŭ sporcie, a jakimi sposabami — čynoŭniki pavinny byli vyznačyć sami.
Hałoŭnaje, kab praca była praviedziena efiektyŭna i pryniesła vyniki dla režymu.
U vyniku Kavalčuk i jaho pamočniki naradzili čarhovuju ideju z razradu viedać tekst himna RB abo davać kamientary žurnalistam tolki ź ministerskaha błasłavieńnia. Ideja zaklučajecca ŭ tym, kab znajści ŭ kamandach pa roznych vidach sportu ludziej, jakija buduć prasoŭvać idei režymu i sačyć za čyścinioj dumki ŭ kalektyvach. Heta prapanova ŭžo atrymała adabreńnie naviersie.
Jak udałosia daviedacca «Trybunie», Minsportu zaraz źbiraje prapanovy ad nacyjanalnych kamand pa ŭsich vidach sportu (jak kamandnych, tak i indyvidualnych) pa kandydaturach tak zvanych «kapitanaŭ» kalektyvaŭ (choć pravilniej ich było b nazyvać kamisarami).
Pa zadumcy, rolu «kapitana» pavinien vykonvać adzin z spartsmienaŭ kamandy, dublavać jaho funkcyju budzie pradstaŭnik trenierskaha štaba. Usie kandydatury buduć razhledžany i zaćvierdžany Kavalčukom.
Jakaja ž rola advodzicca «kapitanam»? Pavodle infarmacyi «Trybuny», hałoŭnaja ich zadača — ideałahičnaja praca ŭnutry kamand, prasoŭvańnie idej režymu i adsočvańnie abstanoŭki ŭ kalektyvach.
Pry vyjaŭleńni jakich-niebudź adstupleńniaŭ ad palityki partyi «kapitany» pavinny buduć dakładvać pra heta navierch, pa sutnaści, danosić na svaich kalehaŭ. Rabicca heta budzie nie ŭ pryvatnym paradku
Jak akazałasia, płanujecca stvaryć svojeasablivy «saviet spartsmienaŭ i trenieraŭ» pry Ministerstvie, dzie jak raz i buduć abmiarkoŭvacca ideałahičnyja pytańni.
Akramia taho, atlety i treniery, nadzielenyja statusam «kapitanaŭ», pa zmaŭčańni stanoviacca abaviazkovymi ŭdzielnikami praŭładnych mierapryjemstvaŭ — naprykład, viełaprabiehaŭ, akcyj u padtrymku režymu i hetak dalej.
