«Ludzi źbirajucca stajać i na vychodnych, kab u paniadziełak padacca»
21 sakavika hałoŭnaje konsulskaje ŭpraŭleńnie MZS Biełarusi adnaviła pryjom dakumientaŭ na apastyl. Pierad hetym, 10 sakavika, nibyta z-za techničnych pryčyn prymać dakumienty pierastali.
Z samaj ranicy 21 sakavika kala konsulstva sabrałasia vializnaja čarha z achvočych pastavić apastyl. Ludziej nie stała mienš i paśla taho, jak 22 sakavika stała viadoma, što ciapier lehalizacyja adnaho dakumienta budzie kaštavać 32 rubli (raniej — 16 rubloŭ), a apastyl na adnym dakumiencie — 160 rubloŭ (raniej — 16 rubloŭ).
Čarha na atrymańnie apastylu paśla adnaŭleńnia pryjomu dakumientaŭ u Minsku. 22 sakavika 2022 hoda. Fota: Čytačy Zerkalo.io
Pačali źjaŭlacca paviedamleńni, što čarhu sprabavali razahnać. Surazmoŭca «Biełsata» (imia paprasiŭ nie nazyvać), jaki ŭžo dva tydni staić pad MZS u čakańni apastylu, kaža, što ŭ pieršyja dni ludzi stajali la samych dźviarej, była šturchanina, i milicyi daviałosia ŭmiašacca, kab supracoŭniki konsulstva mieli mahčymaść prajści.
Kali čarha stanaviłasia tolki bolšaj, ludzi zrazumieli, što treba niejak samaarhanizoŭvacca. Źjavilisia vałanciory, jakija składali śpisy, pačali ładzić dziažurstvy pa 5-6 čałaviek pa dźvie hadziny, kruhłasutačna. Ludzi źmianialisia, mahli chadzić na pracu, raskazvaje minčuk. Prychodzili adpaviedna sa svaimi numarami i spakojna padavalisia. Nie było nijakaha šumu, čarha nikomu nie pieraškadžała.
— Ale ŭčora (31 sakavika) niejkamu supracoŭniku MZS raptam nie spadabałasia, što ludzi samaarhanizavalisia, i paśla pryjomu jon zahadaŭ — usich vałancioraŭ i śpisy prybrać, — raskazvaje mužčyna. — U vyniku ludzi znoŭ pačali zajmać čarhu z 5 hadzin viečara, kab siońnia padacca.
Znoŭ stajać pad dźviaryma MZS pa 12—15 hadzin. Siońnia, kali ja sychodziŭ, było 200 čałaviek. Kažuć, što źbirajucca i na vychodnych tam stajać, kab u paniadziełak trapić u konsulstva.
«Takich čerhaŭ kala MZS nie bačyŭ navat paśla vybaraŭ 2020 hoda»
Čym supracoŭnikam MZS nie spadabałasia samaarhanizacyja ludziej u čarzie, jany nie patłumačyli, kaža naš surazmoŭca. Adnak paabiacali prymać dakumienty chutčej.
— Siońnia vyjšaŭ supracoŭnik, padzialiŭ čarhu na tych, u kaho adzin dakumient, i ŭ kaho dva i bolš, — kaža minčuk. — U kaho adzin dakumient, adrazu ich paźbirali i zanieśli ŭsiaredzinu, a ludziam potym addavali kvitki. Astatnija zastalisia čakać, ich prymali ŭ zvyčajnym režymie.
Akramia taho, pavialičyli čas pryjomu dakumientaŭ — kali raniej prymali z 8 da 10:30 hadzin ranicy, to ciapier — da 12:00.
Za hety čas paśpiavajuć pryniać 70—100 čałaviek, ale heta vielmi mała, kaža surazmoŭca «Biełsata».
— U śpisach vałancioraŭ było amal 3000 čałaviek. Ź ich, padacca, paśpieli tolki kala 800, — zaznačaje minčuk. — Ja takich čerhaŭ kala MZS nie bačyŭ navat paśla padziej žniŭnia 2020 hoda.
Apastyl — heta admysłovy štamp, jaki lehalizuje dakumienty. Dakumient, vydadzieny ŭ adnoj dziaržavie, atrymlivaje jurydyčnuju siłu ŭ inšaj paśla prastaŭleńnia apastylu. Staviać jaho na asabistyja, dziełavyja dakumienty, a taksama ich kopii i pierakłady, zavieranyja nataryjalna.
Čytajcie taksama:
U Minsku milicyjanty papiaredžvajuć ludziej u čerhach na apastyl pra adkaznaść za niesankcyjanavany schod
