Jany prachodziać stacyjanarnaje lačeńnie ŭ rodnym horadzie — Asipovičach (Mahiloŭskaja vobłaść).

Jak paviedamiŭ BiełaPAN načalnik adździeła hihijeny, epidemijałohii i prafiłaktyki Ministerstva achovy zdaroŭja Juryj Fiodaraŭ, ciapier školniki, jakija viarnulisia ź Vialikabrytanii, dzie jany znachodzilisia na azdaraŭleńni ŭ składzie hrupy, atrymlivajuć adekvatnaje lačeńnie i «adčuvajuć siabie dobra». Ni ŭ adnaho ź dziaciej niama ŭskładnieńniaŭ, padkreśliŭ Fiodaraŭ.

Ciapier, pavodle jaho słoŭ, pravodzicca abśledavańnie ludziej, jakija kantaktavali z chvorymi dziećmi.

Pradstaŭnik Ministerstva achovy zdaroŭja zaklikaŭ «nie bajacca hrypu A(N1N1) i nie panikavać».

Hryp «nie taki niebiaśpiečny, jak my ŭjaŭlali sabie raniej», i lečycca hetak ža, jak zvyčajny, siezonna, dla jaho lačeńnia ŭ Biełarusi jość usie nieabchodnyja miedykamienty, zajaviŭ Fiodaraŭ. Jon patłumačyŭ, što špitalizavać ludziej, u jakich vyjaŭleny hryp A(N1N1), nieabchodna nie z‑za ciažkaści zachvorvańnia, a pa rekamiendacyi SAZ, dla nieraspaŭsiudžańnia infiekcyi.

Vialikaja kolkaść śmiarotnych vypadkaŭ, vyklikanych hrypam A(N1N1) (u śviecie, pavodle źviestak SAZ, pamierli 2 tys. 349 čałaviek) Fiodaraŭ patłumačyŭ tym, što «značnaja častka pamierłych nie atrymała svoječasovuju prafiesijnuju miedycynskuju dapamohu», bo nie mieła da jaje dostupu.

U adpaviednaści z zahadam Ministerstva achovy zdaroŭja, dzieci, jakija viartajucca ŭ Biełaruś paśla arhanizavanaha azdaraŭleńnia ŭ krainach, niespryjalnych pa hrypie A(H1N1), buduć prachodzić tydniovy karancin. Da takich krain adniesieny Italija, Vialikabrytanija, Hiermanija, Ispanija, Irłandyja, Bielhija i Aŭstryja. Hety pieralik pastajanna ŭdakładniajecca i moža być źmienieny. Karancin zakranie bolš jak 13 tys. dziaciej, jakija ciapier adpačyvajuć za miažoj i pavinny viarnucca ŭ krainu z 23 žniŭnia pa 1 vieraśnia.

Pavodle słoŭ Fiodarava, ciapier udakładniajucca śpisy dziaciej, jakija adpačyvajuć za miažoj, kab paśla ich viartańnia arhanizavać miedycynskaje abśledavańnie kožnaha.

Pradstaŭnik Ministerstva achovy zdaroŭja zaklikaŭ hramadzian źviartacca da ŭračoŭ pry vyjaŭleńni pieršych prykmietaŭ hrypu: hałaŭnaja i myšačnaja boli, vanitavańnie, rasstrojstva straŭnikava‑kišačnaha traktu, łamota ŭ sustavach.

Na hety čas, nahadajem, u Biełarusi łabaratorna paćvierdžany čatyry vypadki hrypu A(N1N1). Pieršy fakt zaražeńnia virusam hrypu A(N1N1) byŭ zafiksavany ŭ aśpiranta BDU, hramadzianina Kitaja, jaki viarnuŭsia ŭ Biełaruś z KNR 10 žniŭnia paśla kanikułaŭ. 21 žniŭnia jon vypisaŭsia ź Minskaj haradskoj kliničnaj infiekcyjnaj balnicy.

Alena Spasiuk, BiełaPAN

Клас
0
Панылы сорам
0
Ха-ха
0
Ого
0
Сумна
0
Абуральна
0