Byłaja ŭkrainskaja deputatka Taćciana Čarnavoł vajuje jak apieratarka kompleksu «Stuhna». Fota:24tv.ua

Byłaja ŭkrainskaja deputatka Taćciana Čarnavoł vajuje jak apieratarka kompleksu «Stuhna». Fota:24tv.ua

Supraćtankavyja rakietnyja kompleksy «Stuhna-P» pačali aktyŭna pastupać na ŭzbrajeńnie ŭkrainskaj armii ŭ 2019-m. Tahačasny ministr abarony Ukrainy Ściapan Pałtarak adznačaŭ, što pastaŭki ich u rajon Danbasa istotna źmianili raskład siłaŭ i vymusili rasijskija siły praktyčna całkam admovicca ad vykarystańnia tankaŭ u zonie bajavych dziejańniaŭ.

U ciapierašniaj vajnie, kali vorah maje kolkasnuju pieravahu, ukraincy vynajšli efiektyŭnuju taktyku. Mabilnyja hrupy vajskoŭcaŭ z zasady na šlachach pieramiaščeńnia varožaj techniki źniščajuć braniemašyny, bienzavozy i navat viertaloty rasijskaj armii z dapamohaj supraćtankavych rakiet «Stuhna-P». Kanstrukcyja kompleksu dazvalaje apierataru dystancyjna kiravać im, znachodziačysia za dziasiatki mietraŭ ad puskavoj ustanoŭki, što minimizuje ryzyki dla raźliku navat u vypadku, kali vorah vyjavić supraćrakietny kompleks i adkryje pa im ahoń.

Na pačatku krasavika źjaviłasia videa źniščeńnia rasijskaha ŭdarnaha viertalota Ka-52, jaki zavis nad ziamloju na niekalki siekundaŭ. Hetaha času chapiła ŭkrainskim desantnikam, kab zrabić trapny streł. Paśla pusku rakiety bačna, što apieratar nie trymaje viertalota ŭ prycele. Heta zroblena dla taho, kab sistemy abarony viertalota nie papiaredzili piłota pra ataku, i tolki ŭ apošni momant nakiroŭvaje rakietu ŭ cel.

Rakietny kompleks «Stuhna-P» raspracavany ŭkrainskim kanstruktarskim biuro «Łuč». Hetaje ž pradpryjemstva raspracoŭvała i supraćkarabielnyja rakiety «Nieptun», jakimi byŭ patopleny fłahman Čarnamorskaha fłota Rasii krejsier «Maskva». U časy SSSR hetaje pradpryjemstva raspracoŭvała aŭtamatyku dla tarpied, rakiet i kiravanych bomb.

Kompleks składajecca z trynohi z zamacavanaj sistemaj naviadzieńnia, rakiety ŭ puskavym kantejniery i pulta dystancyjnaha kiravańnia, z dapamohaj jakoha apieratar, jaki moža znachodzicca za 50 mietraŭ ad ustanoŭki, nakiroŭvaje rakietu da celi. Rakiety kalibru 130 mm mohuć mieć roznyja bajavyja častki — tandemna kumulatyŭnyja, pryznačanyja dla źniščeńnia braniravanaj techniki i zdolnyja prabivać da 800 mm brani za dynamičnaj abaronaj (dynamičnaja abarona — heta kubiki, jakimi abviešanyja sučasnyja tanki, u ich utrymlivajecca vybuchoŭka, jakaja detanuje nasustrač snaradu), a taksama askiepkava-fuhasnyja i termabaryčnyja dla źniščeńnia žyvoj siły.

Pakieta moža lacieć z chutkaściu 200 m/s i źniščać celi na adlehłaści ad 100 mietraŭ da 5000 mietraŭ udzień i 3000 mietraŭ unačy.

Cistema naviadzieńnia napaŭaŭtamatyčnaja, rakieta kirujecca z dapamohaj łaziernaha pramiania. Apieratar bačyć cel na manitory — dadzienyja pieradajucca ź sistemy naviadzieńnia, naciskaje knopku zapusku i, kali cel ruchajecca, praciahvaje trymać jaje ŭ prycele.

Treba adznačyć, što adzin streł «Stuhny-P» našmat tańniejšy za Javelin: košt adnoj ukrainskaj rakiety składaje kala 23 000 dalaraŭ, amierykanskaj — 78 000.

Na videa ŭ internecie časta bačnyja nadpisy pa-arabsku na dyspłei dystancyjnaj sistemy kiravańnia — heta ekspartny varyjant supraćtankavaha kompleksu, pryznačany dla krain Blizkaha Uschodu, viadomy na rynku jak «Skif». Dadzienaja madyfikacyja paŭstała ŭ vyniku kałabaracyi ź biełaruskim pradpryjemstvam «Pielenh».

Cikava, što da vajny Kijeŭ, dzie vyrablajucca rakiety, i Minsk, dzie vyrablajucca pryceły, dastatkova ščylna supracoŭničali ŭ vajennaj śfiery. U vyniku hetaj supracy źjaviŭsia nie tolki «Skif», ale i supraćtankavy rakietny kompleks «Šeršań». Abodva hetyja kompleksy mohuć stralać bolš mahutnymi rakietami kalibru 152 mm.

Va ŭmovach vajny ekspartnyja «Skify» taksama adpravilisia na front, dzie źniščajuć techniku ahresara.

Jak Ukraina robić staŭku na bieśpiłotniki ŭ abaronie ad Rasii

Usie čakajuć vyrašalnaj bitvy za Danbas. Ad čaho zaležyć, chto ŭ joj pieramoža?

«Technika nie jedzie, zabieśpiačeńnia tałkovaha niama». Jakija chiby pakazała rasijskaja armija va Ukrainie

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?