Alesi 32 hady. Jana rodam z Maładziečna, da 2021-ha žyła i pracavała tam. Skončyła histfak BDU, apošnija hady pracavała ŭ turystyčnym biznesie — mieła nievialikuju turfirmu.
U 2011 hodzie jana paznajomiłasia ŭ Vilni ź viadomym aktyvistam Aleham Miacielicam.
«Praz paru hadoŭ u ich naradziŭsia syn. Alesia z małym zastavałasia ŭ Maładziečnie, Aleh žyŭ u Vilni, viarnuŭsia ŭ Biełaruś tolki ŭ 2014 hodzie. Małoha nazvali Kastusiom», — raskazaŭ «Našaj Nivie» blizki znajomy Alesi.
Jašče da vybaraŭ Miacielicu pakarali sutkami za ŭdzieł u maŭklivych «łancuhach salidarnaści».
Aleh Miacielica. Fota: «Viasna»
Jon vyjšaŭ na volu 15 žniŭnia 2020, užo na nastupny dzień vystupiŭ na mitynhu ŭ Białyničach. Amal adrazu praz hety vystup na Aleha zaviali kryminałku: abvinavacili ŭ paklopie. Jon vyrašyŭ źjechać ź Biełarusi, 26 žniŭnia pakinuŭ krainu.
Alesia zastałasia ŭ Maładziečnie. Paźniej i jana adsiedzieła na sutkach, bo prachodziła pa tak zvanaj «spravie łyžnikaŭ»: u lutym 2021 hoda siłaviki zatrymali amal dva dziasiatki čałaviek, jakija katalisia na łyžach i mieli bieła-čyrvona-biełuju simvoliku.
Pierad zatrymańniem łyžnikaŭ. Skrynšot: videa MUS
Alesia Bunievič tady atrymała 15 sutak.
U krasaviku 2021 hoda ŭ dziaŭčyny pamierła maci.
«Alesia pieraniesła heta vielmi baluča. Maci było niedzie kala 56 hadoŭ, navat jašče nie piensijanierka. Ale raptam zdaryŭsia insult.
Alesia była vielmi blizkaja z maci. Mama była tym, chto ŭtrymlivaŭ siamju, byŭ jaje symbalem… Dla Alesi śmierć maci była vielmi mocnym udaram», — zhadvajuć znajomyja.
Paśla biełaruska vyrašyła pierajechać u Vilniu. U mai jana pryjechała, kab aformić šlub z Aleham Miacielicam, kančatkova pierabrałasia ŭ Litvu ŭ pačatku leta.
«U Alesi pieršy pieryjad žyćcia ŭ Vilni byŭ vielmi niaprostym. Bo jana čałaviek z padvyšanym pačućciom adkaznaści i salidarnaści, čałaviek, jaki pieražyvaŭ za Biełaruś: a chto tam zastaniecca, kali ŭsie źjeduć? Pieražyvała i pra ludziej za kratami…
— zhadvaje siabar Alesi. — Na heta nakłałasia i śmierć maci».
Ź ciaham času žyćcio pacichu naładžvałasia. Kastusia addali ŭ biełaruskuju himnaziju, Alesia razam sa znajomaj adkryła nievialiki biznes u Vilni: drukavalny centr.
Ale ŭ krasaviku 2022 hoda Bunievič vyrašyła na karotki čas viarnucca ŭ Biełaruś. Dla jaje vielmi važna było pryjechać na hadavinu śmierci maci, kažuć znajomyja, plus jana płanavała vyrašyć niekatoryja pytańni z majomaściu, jakaja zastavałasia ŭ Maładziečnie. Spačatku jana płanavała razabracca z usimi siamiejnymi spravami, a paśla pryjechać u Vilniu, uziać syna, u jakoha pačynalisia kanikuły, i źjeździć razam ź im u Biełaruś jašče raz.
«Alesia padumvała, što heta, mahčyma, buduć apošnija jaje vizity na Radzimu, što bolš jeździć, moža, i nie varta», — kaža adzin ź jaje siabroŭ.
1 krasavika Alesia Bunievič pajechała ŭ Biełaruś. Spačatku ŭsio było narmalna. Razam ź siamjoj znajomych dziaŭčyna pajechała na ahrasiadzibu ŭ Hrodzienskaj vobłaści.
Tam jaje i zatrymali.
Pa infarmacyi «Našaj Nivy», u niejki momant siamja znajomych pajechała ŭ kramu. Alesia zastałasia adna na ahrasiadzibie. Vyjšła prahulacca — i źnikła.
Jak paviedamlajuć krynicy «Našaj Nivy», dziaŭčyna paśpieła adpravić znajomym karotkaje paviedamleńnie: tut niešta dziŭnaje adbyvajecca. U tekście było šmat abdrukovak, što było nietypova dla vielmi piśmiennaj Alesi, było zrazumieła, što paviedamleńnie nabirałasia ŭ śpiešcy.
Źviazacca sa znajomymi Alesi, jakija byli razam ź joju na ahrasiadzibie, «Našaj Nivie» nie atrymałasia.
Ale pa našaj infarmacyi, paśla źniknieńnia Alesi adrazu vyklikali milicyju, ratavalnikaŭ. Usie chvalavalisia, padazravali roznaje: moža na dziaŭčynu niechta napaŭ? Źviarnulisia da pamiežnikaŭ — ahrasiadziba znachodziłasia ŭ pamiežnaj zonie. Nichto nie moh ničym dapamahčy. Kudy i jak źnikła Alesia było nieviadoma.
Tolki ŭviečary stała viadoma, što Bunievič zatrymanaja i jaje padazrajuć u «ździajśnieńni terarystyčnaha akta hrupaj asob pa papiaredniaj zmovie» (č. 2 art. 289 KK RB).
Pa infarmacyi «Našaj Nivy», Alesiu Bunievič vinavaciać u dapamozie «čyhunačnym partyzanam», jakich zatrymali 30 sakavika sa stralboju pa nahach. Bunievič padazrajuć u tym, što jana mahła dapamahać «partyzanam» u padrychtoŭcy nielehalnaha pierachoda miažy ź Litvoj.
Znajomyja Alesi kažuć: «Jaje zatrymańnie vyhladaje prosta dziŭnym źbieham abstavinaŭ. Mahčyma, jana prosta akazałasia nie ŭ toj čas i nie ŭ tym miescy?»
Jašče ŭ vieraśni 2021 hoda Śledčy kamitet Biełarusi paviedamiŭ ab pačatku kryminalnaj spravy suprać hrupy asobaŭ, jakaja dapamahała biełarusam nielehalna ŭciakać u Litvu. Pa BT navat źniali pra heta čarhovy film, dzie vinavacili Natallu Kalehavu i Aleha Miacielicu ŭ dapamozie tym, chto bieh ź Biełarusi pa palityčnych pryčynach.
Ale ž Alesiu zatrymlivali ŭviečary 3 krasavika u Hrodzienskaj vobłaści. Na toj momant «čyhunačnyja partyzany» ŭžo niekalki dzion byli za kratami. Siłaviki paviedamili, što «partyzanaŭ» schapili jašče 30 sakavika, pryčym u Babrujskim i Barysaŭskim rajonach.
Ciapier Alesi Bunievič pahražaje ad 8 da 20 hadoŭ.
Bunievič znachodzicca ŭ mahiloŭskim SIZA. Viadoma, što Alesia nie pryznaje vinu, praz advakata pieradaje, što adčuvaje siabie narmalna.
Što viadoma pra chłopcaŭ, zatrymanych sa stralaninaj za dyviersii na čyhuncy?
