Chto z zatrymanych lekaraŭ moh abśledavać Łukašenku? Jość niekalki viersij

Praz try tydni paśla pačatku masavaha zatrymańnia artapiedaŭ pa ŭsioj krainie źjavilisia pieršyja aficyjnyja kamientaryi. Na naradzie ź ministram achovy zdaroŭja, hienieralnym prakuroram i kiraŭnikom KDB Alaksandr Łukašenka zajaviŭ, što za kratami ciapier znachodzicca 35 miedykaŭ. Siarod ich jon nazvaŭ i svajho lekara, «jaki nie raz jaho abśledavaŭ». Zerkalo.io vyznačyła, chto heta moža być.

Alaksandr Łukašenka na naradzie ź ministram achovy zdaroŭja Dźmitryjem Pinievičam, kiraŭnikom KDB Ivanam Ciercielem i hienieralnym prakuroram Andrejem Šviedam. 18 krasavika 2022 hoda. Fota: president.gov.by

— Sumna, što tudy patrapipiŭ i, hruba kažučy, doktar, jaki lečyć prezidenta (ja jaho ŭ dvukośsiach tak nazyvaju), jaki nie adnojčy prezidenta abśledavaŭ. Ja vielmi zasmučany hetym faktam, ale zakon jość zakon. Jon adziny dla ŭsich, — Łukašenka raźvioŭ rukami.

Imia śpiecyjalista jon nie zhadaŭ. Chto z zatrymanych moh abśledavać Łukašenku?

Były lekar-artapied z RNPC artapiedyi i traŭmatałohii Rustam Ajzatulin, jakoha zvolnili za hramadzianskuju pazicyju, nazyvaje imiony čatyroch lekaraŭ, jakija mahli abśledavać Łukašenku.

— Ciapier u śpisie zatrymanych praktyčna ŭsie vysakakłasnyja śpiecyjalisty. Ale kali prahartać śpis imionaŭ, jaki nam viadomy, to heta moh być Pavieł Ryhoravič Skakun, — tłumačyć Ajzatulin. — Tamu što jon źnikaŭ z našaj kliniki ŭ tyja momanty, kali sam Alaksandr Łukašenka źnikaŭ sa svaimi prablemami.

Albo heta moh być Alaksandr Biańko (urač Minskaj abłasnoj balnicy). Sprava ŭ tym, što Biańko sam pa sabie vielmi dobry śpiecyjalist i viedaje patałohiju kalennaha i tazaściohnavaha sustava. Plus jon kansultavaŭ i apieryravaŭ u Respublikanskim kliničnym miedcentry Upraŭleńnia spravami prezidenta. Tam staviŭ zamiežnyja pratezy, jak tazaściohnavyja, tak i kalennyja.

Ajzatulin taksama nie vyklučaje, što niejkija zaklučeńni mahli davać i namieśnik dyrektara RNPC traŭmatałohii i artapiedyi Alaksandr Murzič, i zahadčyk artapiedyčnaha adździaleńnia №1 taho ž RNPC Ivan Minakoŭski.

— Usie hetyja lekary supierprafiesijanały, ale Murzič, da prykładu, bolš śpiecyjalizujecca pa tazaściohnavych sustavach i patałohii taza. Jak i Minakoŭski, — tłumačyć były kaleha zatrymanych. — Tak, svajo słova jany mahli skazać, ale ŭsio ž taki profil u ich krychu inšy.

Što viadoma pra hetych lekaraŭ?

Pavieł Skakun. Zahadčyk artapiedyčnaha adździaleńnia № 2 RNPC traŭmatałohii i artapiedyi. Jamu 58 hadoŭ. Ź ich 30 hadoŭ pracuje ŭ artapiedyi.

Pavieł Skakun. Fota: ortoped.by

«Maksimalny ŭ Respublicy Biełaruś dośvied pieršasnaha i revizijnaha endapratezavańnia kalennych sustavaŭ z vykarystańniem roznych impłantaŭ», — piša pra jaho sajt ab miedturyźmie ŭ Biełarusi.

Na praciahu bolš čym 20 hadoŭ prachodziŭ stažyroŭki ŭ artapiedyčnych klinikach Hiermanii, Aŭstryi, Šviejcaryi, ZŠA, Polščy i Rasii. Skakun kandydat miedycynskich navuk, vykładaŭ na kafiedry spartyŭnaj miedycyny BiełMAPA, taksama jon aŭtar 7 patentaŭ. U 2013 hodzie jaho ŭznaharodzili ordenam Ajčyny III stupieni.

Alaksandr Biańko. Dacent kafiedry traŭmatałohii i artapiedyi BiełMAPA. Jamu 46 hadoŭ, jon kandydat miedycynskich navuk, aŭtar dvuch patentaŭ.

Alaksandr Biańko. Fota: staronka Alaksandra ŭ Ok.ru

U 2009 hodzie za raspracoŭku i ŭkaranieńnie novych technałohij lačeńnia traŭmatyčnych defiektaŭ miakkich tkanak kaniečnaściaŭ atrymaŭ stypiendyju prezidenta dla talenavitych maładych navukoŭcaŭ. Biańko prachodziŭ stažyroŭki ŭ najbujniejšych artapiedyčnych centrach Jeŭropy. Źjaŭlajecca členam Suśvietnaj arhanizacyi traŭmatołahaŭ i artapiedaŭ.

Alaksandr Murzič. Sa studzienia hetaha hoda staŭ namieśnikam dyrektara pa navukovaj rabocie RNPC traŭmatałohii i artapiedyi.

Alaksandr Murzič. Fota: doktora.by

Jamu 45 hadoŭ. Jon kandydat miedycynskich navuk. U 2015 hodzie atrymaŭ hramatu ad Ministerstva achovy zdaroŭja, a ŭ 2017-m — zvańnie «Vydatnik achovy zdaroŭja Respubliki Biełaruś». U tym ža hodzie staŭ pieramožcam konkursu «Urač hoda Respubliki Biełaruś» u naminacyi «urač-chirurh». Maje čatyry patenty, bolš za dvaccać jaho technałohij ukaranionyja ŭ praktyku. Jon člen Mižnarodnaha tavarystva traŭmatołahaŭ AO Trauma.

Ivan Minakoŭski. Zahadčyk artapiedyčnaha adździaleńnia № 1 RNPC traŭmatałohii i artapiedyi. Jamu 57 hadoŭ, staž pracy 34 hady. Vydatnik achovy zdaroŭja, maje try patenty na sposaby lačeńnia i miedycynskija vyraby.

Ivan Minakoŭski. Fota: RNPC traŭmatałohii i artapiedyi