Žyły dom u Baradziancy. Fota Getty Images
Hazieta The New York Times daviedałasia ad byłoj zahadčycy škoły, 43-hadovaj Maryny Hanickaj, jakaja kiruje balnicaj usiaho dva miesiacy, jak ludzi pieražyli akupacyju. «Mieduza» pierakłała hety materyjał.
Z taho času, jak u kancy lutaha ŭ Baradzianku ŭvajšli rasijskija vojski, internat zastavaŭsia biez vady, elektryčnaści i aciapleńnia. Maryna Hanickaja nazirała z treciaha pavierchu kliniki, jak u pasiołak zajazdžali rasijskija hruzaviki, i naličyła 500 štuk. Bajučysia snajpieraŭ, rasijanie pačali abstrelvać žyłyja damy ŭzdoŭž trasy. Miascovyja słužby ratavańnia paviedamlali, što pad abłomkami zahinuli dziasiatki mirnych žycharoŭ.
Budynak internata, pabudavany jašče ŭ 1970-ja hady, ad vybuchovych chvalaŭ pastajanna skałynaŭsia. Heta vielmi niehatyŭna adbiłasia na stanie pacyjentaŭ ź nieŭrałahičnymi i psichijatryčnymi rasstrojstvami. U niekatorych raźvilisia ahresiŭnyja pavodziny. Inšyja byli ŭ panicy i stali chavacca pad łožkami abo ŭ šafach. Troje pacyjentaŭ źbiehli z kliniki i da hetaha času nie znojdzienyja.
Za čas akupacyi zahinuli bolš za 12 pacyjentaŭ PNI. Bolšaść — ad choładu i hoładu.
Tempieratura ŭnutry budynka apuskałasia da minus siami hradusaŭ Celsija. U balnicy nie było pratočnaj vady. Ludzi pačali pić vadu z basiejna i ŭsie zachvareli.
5 sakavika na terytoryi internata źjavilisia čačenskija vajskoŭcy. Sałdaty na ŭsiedarožnikach prabili varoty kliniki i zahadali vyvieści ŭsich pacyjentaŭ z pałat i pastroić u dvary. Jany naviali na Hanickuju aŭtamaty i zapatrabavali, kab usie ŭśmichnulisia i skazali na kamieru: «Dziakuj, Uładzimir Uładzimiravič Pucin». Adnak bolšaść pacyjentaŭ tolki płakała. Kab nie naškodzić ludziam, Hanickaja sabrałasia ź siłami i vypaliła: «Dziakuj, što vy nas nie zabivajecie», paśla čaho straciła prytomnaść.
Čačency, jakich ukraincy bajalisia macniej za ŭsio i ličyli bolš žorstkimi, u toj ža dzień źjechali dalej, ale śledam za imi pryjšli ruskija. Zrazumieŭšy, što ŭkrainskija vajskoŭcy nie stanuć atakavać internat, jany abstalavali na jaho terytoryi pazicyi z kulamiotami, hranatamiotami i ciažkim uzbrajeńniem. Usim, chto znachodziŭsia ŭ budynku, zabaranili jaho pakidać, navat u pošukach ježy. Pastajalcy internata stali žyvym ščytom dla rasijan, zajaviła buchhałtar PNI Taisija Tyškievič.
«Invalidaŭ, dziaciej uziali ŭ zakładniki! Bieź miedykamientaŭ i ježy, bieź śviatła i vady, pad abstrełami. Pamierłych chavali na vulicy», — raspaviadaŭ «Mieduzie» v.a. mera Baradzianki Hieorhij Jarko.
Rasijskija sałdaty, jakija zapomnilisia miascovym žycharam žorstkimi i niedyscyplinavanymi, adabrali telefony va ŭsich u internacie. Vajskoŭcy maradziorstvavali ŭ najbližejšych damach. Z apteki balnicy jany skrali i vypili ŭvieś miedycynski śpirt.
Hanickaj udałosia schavać svoj telefon. Ź jaho jana ŭpotaj, vyhladajučy z voknaŭ siastrynskaj, adpraŭlała SMS ukrainskim vajskoŭcam ab pierasoŭvańni rasijan. «Kali b my nie dapamahali takim čynam, bai išli b u Kijevie», — ličyć jana.
Kiraŭnica PNI sama hatavała ježu pacyjentam na vohniščy, jakoje raskłała kala budynka. Jana ž arhanizavała spalnyja miescy dla dziasiatkaŭ miascovych žycharoŭ, jakija pierabralisia ŭ internat sa svaich razburanych damoŭ.
13 sakavika Hanickaja zaŭvažyła na vulicy kałonu žoŭtych aŭtobusaŭ i adrazu pabiehła joj nasustrač.
«Ja viedała, što mianie albo zastrelać, albo ja vyratuju ludziej», — kaža jana.
Heta byli aŭtobusy humanitarnych arhanizacyj, jakija zdoleli damovicca ab vyvazie ludziej z horada. Tady rasijskija vajskoŭcy narešcie dazvolili pacyjentam PNI pakinuć budynak, i ich evakujavali ŭ mienš niebiaśpiečnyja rajony.
Pierad adstupleńniem ŭ kancy sakavika rasijskija sałdaty pakinuli na ścienach balnicy bohaźnievažalnyja pasłańni, zroblenyja ułasnymi ekskremientami. «Ja zvanitavała, kali ja heta ŭbačyła, — kaža Hanickaja. — Ja nie razumieju, kim i jak jany byli vychavanyja, i chto naohuł zdolny na takoje».
Čytajcie taksama:
«Ja bolnoj. Ja nienormalnyj». Jak rasijskija sałdaty zabivali mužčyn i hvałcili žančyn u siale Bahdanaŭka pad Kijevam
