— Ad samaha dnia zasnavańnia ŭ 1995 hodzie i da siońnia hałoŭnaja misija našaj arhanizacyi — abarona pravoŭ žurnalistaŭ i miedyja. Na žal, apošnija hady biełaruski miedyjasiektar vymušany pracavać pad udaram niebyvałych represij z boku ŭładaŭ, — kamientujuć u BAŽ.
Bolš za tysiaču vypadkaŭ parušeńnia pravoŭ žurnalistaŭ: sotni aryštaŭ, pieratrusaŭ, prymianieńnia hvałtu suprać pradstaŭnikoŭ miedyja. Razhromlenyja redakcyi, vymušany vyjezd z krainy albo doŭhija hady turemnych terminaŭ. 24 pradstaŭniki miedyja za kratami — u takich umovach siońnia prychodzicca pracavać biełaruskim žurnalistam.
Uvieś hety čas naša arhanizacyja praciahvała pracu dla padtrymki i abarony žurnalistaŭ. BAŽ rasceńvaje vysokuju ŭznaharodu JUNIESKA jak padtrymku ŭsioj niezaležnaj žurnalisckaj supolnaści Biełarusi. I spadziajecca, što rašeńnie ab prysudžeńni premii zmoža pryciahnuć uvahu da paharšeńnia situacyi sa svabodaj ŚMI ŭ Biełarusi.
Suśvietnaja premija JUNIESKA/Hiljerma Kana za ŭniosak u spravu svabody presy prysudžajecca za sadziejničańnie abo značny ŭniosak u spravu abarony svabody słova. U lutym 46 dziaržaŭ, u tym liku 27 krain — siabroŭ ES, vyłučyli BAŽ na atrymańnie premii JUNIESKA. Padtrymali vyłučeńnie BAŽ i mnohija žurnalisckija arhanizacyi śvietu.
Ź lipienia 2021 hoda ofis BAŽ u Minsku zastajecca zabłakavanym paśla napadu siłavikoŭ, a režym Łukašenki pazbaviŭ arhanizacyju rehistracyi. Niahledziačy na heta, BAŽ praciahvaje pracu, zastajecca siabram Mižnarodnaj i Jeŭrapiejskaj fiederacyj žurnalistaŭ.
