Tradycyjna najbolš papularnym kirunkam u biełaruskich šopinh-turystaŭ źjaŭlajecca Polšča. Da taho ž, u adroźnieńni ad toj ža Litvy, hetaja kraina całkam admianiła kavidnyja abmiežavańni pry pierasiačeńni miažy, dy i minimalnaja suma dla viartańnia PDV tut nižejšaja. Akramia taho, z 1 lutaha hetaha hoda ŭ Polščy abnulili PDV na pradukty charčavańnia.
Tym nie mienš, zadumvajučysia pra šopinh u susiedniaj krainie, nie varta zabyvać i ab transpartnych vydatkach.
Kali vy pajedziecie na aŭto, to da vydatkaŭ na paliva nieabchodna dadać košt strachoŭki, minimalnaja suma — 30 jeŭra (stolki kaštuje polis na 15 dzion). Taksama nie varta zabyvać pra miascovy zbor za pierasiačeńnie miažy — heta plus adna bazavaja (32 rubli).
Bilet na aŭtobus ci maršrutku ź Minska da Biełastoka kaštuje 75 rubloŭ, z Hrodna — 60. Šop-tury troški daražejšyja — 100 rubloŭ ź Minska i 80 z Hrodna.
U Polščy vyhadniej za ŭsio kuplać bytavuju chimiju, kavu, adzieńnie, abutak, bytavuju techniku i niekatoryja aŭtatavary.
Naprykład, pačak kavy Dallmayr Prodomo vahoj 500 h u anłajn-hipiermarkiecie «Je-dastaŭka» kaštuje 34 rubli 99 kapiejek. U Polščy takaja ž kava pradajecca pa 23—27 złotych (13,4 — 16,5 rubla) za 500 h. U cełym u Litvie kava krychu daražejšaja, čym u Polščy, ale tut časta ładziać akcyi. Padčas adnoj ź ich taki pačak možna było nabyć za 3.79 jeŭra (mienš za 11 rubloŭ).
Kala 10 rubloŭ možna sekanomić na maleńkaj butelcy vadkaha srodku dla myćcia bializny Persil. Z pavieličeńniem abjomu zekanomlenaja suma pavialičvajecca.
Padhuźniki — jašče adzin papularny tavar, jaki nabyvajuć u Polščy. Naprykład, pačak padhuźnikaŭ Pampers piataha pamieru na 152 štuki ŭ Biełarusi kaštuje 149 rubloŭ. U Polščy taki ž — 92 rubli. Pry nabyćci dvuch možna aformić viartańnie PDV. Tady košt źnižajecca da 75 rubloŭ za pačak. U Biełastoku kavu, słodyčy, padhuźniki i bytavuju chimiju vyhadna kuplać na rynku «Fasty». Dla zručnaści ŭ bolšaści kram pradaŭcy adrazu vystaŭlajuć canu bruta/nieta.
Kali suma ŭ čeku pieravyšaje 200 złotych (kala 120 rubloŭ), to ŭ mnohich kramach možna aformić Tax Free. Kab viarnuć PDV (12—18,5% ad sumy pakupki), vam nieabchodna vyvieźci tavar za miežy ES, adznačyŭšysia na mytni pry viartańni ŭ Biełaruś. Minimalnaja summa dla afarmleńnia Tax Free u Litvie składaje 55 jeŭra (kala 150 rubloŭ)
Najbolš adčuvalnaja ekanomija vychodzić na darahich tavarach. Firmovaje adzieńnie i technika ŭ Polščy kaštuje krychu tańniej, čym u Biełarusi, a paśla viartańnia PDV roźnica ŭ canie moža dasiahać navat 30—40%.
Naprykład, Iphone 11 na 64 GB u Biełarusi pradajuć pa cenach ad 1650 rubloŭ (kala 590 jeŭra). U Polščy taki ž smartfon kaštuje ŭ rajonie 2500 złotych (kala 530 jeŭra). Z ulikam viartańnia PDV, cana źnižajecca da 430 jeŭra. U Litvie na biahučy momant 11-y Iphone možna znajści pa akcyjnaj canie ŭ 499 jeŭra. Paśla viartańnia PDV jaho košt składzie kala 430 jeŭra. Na adnym telefonie možna adbić darohu i jašče vyjhrać.
Adpaviedna, čym vyšejšaja cana tavaru, tym bolš adčuvalnaj budzie roźnica ŭ patračanych hrošach.
Taksama, pry ŭmovie viartańnia PDV, možna sekanomić kala 20-25% na kupli noŭtbukaŭ.
Adznačym, što mienavita dziakujučy časovamu pavyšeńniu limitaŭ u biełarusaŭ źjaviłasia mahčymaść uvozić darahuju techniku biez vypłaty pošliny. Limit byŭ pavyšany z 500 da 1000 jeŭra.
Taksama možna niadrenna sekanomić na kupli aŭtamabilnych tavaraŭ. Naprykład, matornaje masła Shell HX 7 10w40 abjomam 4 litry ŭ Biełarusi pradajecca pa canie ad 105 rubloŭ. U Polščy jaho cana składaje 100 złotych (kala 60 rubloŭ).
U Litvie matornaje masła taksama tańniejšaje, čym u Biełarusi. Čatyry litry Shell HX 8 5w40 u zvyčajnym supiermarkiecie kaštujuć 40 jeŭra (kala 112 rubloŭ). U Biełarusi — 160 rubloŭ.
Sekanomić niemałuju sumu možna i na šynach. Asabliva, kali havorka idzie pra lehkavoje aŭto. Z pazadarožnikami i mikraŭtobusami składaniej, bo para pakryšak dla takoha rodu transpartu moža lohka «pieravažyć» zapavietny 31 kiłahram.
Šyny vyhadna pieravozić mienavita ŭ jakaści bahažu, u advarotnym vypadku ekanomija budzie mienšaj. Bo kali pakryški pastavić na aŭtamabil, to vy zhubicie mahčymaść viarnuć PDV. Aproč hetaha, vam daviadziecca vykinuć staryja pakryški, pakolki ŭ Biełaruś zabaronieny ŭvoz byłych va ŭžyvańni šyn.
Naprykład, ceny na pakryški Hankook Kinergy Eco 2, 205/55 R16 u Biełarusi i Polščy amal adnolkavyja: 201 rubiel u Biełarusi suprać 190 rubloŭ u Polščy. Tamu kankretna na hetaj madeli ekanomija stanie zaŭvažnaj tolki paśla viartańnia PDV (155 rubloŭ).
Značna bolšaja roźnica ŭ canie nazirajecca na prykładzie pakryšak Michelin Primacy 4+, 205/55 R16 91 V. Cana ŭ Biełarusi — 327 rubloŭ, u Polščy — 240 rubloŭ, a pry ŭmovie viartańnia PDV jana źmienšycca da 205 rubloŭ.
Važna! Uvozić pakryški biez apłaty pošliny maje prava tolki ŭłaśnik transpartnaha srodku.
Taksama ŭ Polščy i Litvie vyhadna kuplać brendavaje adzieńnie i abutak. Naprykład, bolšaść madelaŭ krasovak New Balance u Litvie kaštujuć 55—75 jeŭra (150-210 rub).
Akramia taho, u hetych krainach pa raniejšamu pracujuć kramy H&M, Jysk i inšyja. Najbližejšyja dla biełarusaŭ hipiermarkiety IKEA znachodziacca ŭ Vilni i Varšavie. U Biełastoku majecca tolki punkt vydačy.
Što da praduktaŭ, to tut pa-roznamu. Štości tańniejšaje ŭ Biełarusi (hrečka, małočnyja pradukty, alej), štości — u Polščy i Litvie (miasa, sadavina, harodnina).
Taksama ŭ Jeŭrasajuzie značna daražejšyja paliva i cyharety. Tam niama dastupnaha ałkaholu, ale ŭ toj ža čas, ceny na elitny ałkahol tam nižejšyja.
U Polščy pradukty ŭ cełym krychu tańniejšyja, čym u Litvie. Asabliva heta stała prykmietna paśla taho, jak polski ŭrad pryniaŭ rašeńnie časova abnulić PDV na charčy.
Čytajcie taksama:
Ułady prydumali, jak jašče dadatkova zarabić na miažy
«Biez asablivaj ryzyki možna atrymać kala 100 dalaraŭ». Kolki ciapier zarablajuć na pieravozcy paliva i cyharet u Polšču i Litvu
