Fury na miažy
Z 9 krasavika biełaruskija fury nie mohuć zajazdžać na terytoryju ES. Mnohija hruzapieravozčyki z hetaj pryčyny cierpiać straty, bo jeŭrapiejski kirunak byŭ dla ich asnoŭny. Pradstaŭnik adnoj ź nievialikich kampanij, jakaja zajmałasia hruzapieravozkami ŭ ES, raskazaŭ, što z pačatku krasavika fury prastojvajuć.
«Jeŭrapiejskija fury jeździać u Biełaruś, u ich usio dobra. My čakali, što miežy zakryjuć. Maleńkija kampanii, u jakich pa 5—10 fur, cierpiać najbolš. My vazić ciapier ničoha nie možam. My nie razumiejem, čamu fury ź ES mohuć prosta zajazdžać, a biełaruskija fury tudy nie puskajuć. My nikudy jeździć nie možam ni pa Biełarusi, ni ŭ ES», — kaža pradstaŭnik firmy.
Kiroŭcy, jakija raniej pracavali ŭ Biełarusi, ciapier dumajuć, kab źjechać pracavać za miažu.
«Z 9 krasavika začynili dla biełaruskich furaŭ ujezd u ES, i z taho času my nie pracujem. Situacyja pryviadzie da taho, što našy kiroŭcy źjeduć pracavać u ES, u Polšču, u Litvu. Buduć pryvozić hrošy rodnym», — kaža pieravozčyk.
Nie vypadaje taksama i źmianić kirunak, bo pa rasijskich darohach mašyny chutka znošvajucca.
«My nie chočam źbivać fury pa rasijskich darohach. Prosta razabjem sabie mašyny, nie zarablajučy, heta nie vyjście.
Najlepšaje vyjście, kab miažu zakryli całkam, tady b kiraŭnictva krainy šukała, što rabić. A tak my prastojvajem, a ekspart usio adno idzie, bo jeŭrapiejcy siudy jeździać», — kaža pieravozčyk.
«Z Azijaj taksama prablemy»
Pradstaŭnik inšaj bujnoj łahistyčnaj kampanii raskazaŭ, što «ciapier staić pałova parku».
«Pałova parku prastojvaje, pałova — jeździć na Rasiju i Kazachstan. U ES našy fury nie mohuć jeździć. Isnujuć niejkija vyklučeńni, ale pakul niezrazumieła, jak heta pracuje. Z Azijaj taksama prablemy, fury tudy jeduć doŭha. Fury ź ES zajazdžajuć u Biełaruś, ale dajazdžajuć tolki da Lidy, dalej šlach zakryty, tam jany taksama prastojvajuć u čakańni razhruzki», — kaža surazmoŭca.
Jašče adzin surazmoŭca, jaki pracuje kiroŭcam, raskazaŭ, što biełaruskija pieravozčyki damaŭlajucca ź jeŭrapiejskimi. Heta dazvalaje abminać zabaronu na pierasiačeńnie miažy.
«Jeŭrapiejskija hruzapieravozčyki mohuć pryjazdžać u Biełaruś tolki na bližejšuju mytniu dla pierahruzki hruzu, a heta dadatkovyja traty.
Biełaruskija kampanii damaŭlajucca ź jeŭrapiejskimi pieravozčykami: biełaruskaja mašyna pryciahvaje hruz na mytny łahistyčny centr, a jeŭrapiejskaja fura viazie jaho dalej. Jeŭrapiejskaja fura pryvozić hruz u Biełaruś, i dalej jaho viazie biełaruskaja fura.
Ale heta dadatkovyja hrošy: za stajanku pry vyjeździe ź miažy viešajuć navihacyjnuju płombu, jakaja kaštuje 100 jeŭra, raniej jaje viešali tolki na tranzitnyja fury», — kaža pieravozčyk.
U śfiery transpartu ŭ Biełarusi pracuje 293,3 tysiačy čałaviek, heta 6,8% ad usich zaniatych u ekanomicy. Heta prybytkovaja śfiera. Čysty prybytak ad pracy transpartu za 2020 hod — 645 miljonaŭ rubloŭ, rentabielnaść — 7,6%.
Letaś Biełaruś akazała inšym krainam transpartnych pasłuh na 4,3 miljarda dalaraŭ. Vialikuju dolu ŭ hetym zajmajuć transpartnyja pasłuhi dla krain ES.
