Što heta značyć dla ŭkrainskaj armii, raspaviadaje vajenny ekśpiert Siarhiej Hrabski.
‒ Prezident ZŠA Džo Bajden ŭ čaćvier zajaviŭ, što vajna va Ukrainie pierachodzić u novuju fazu. Vy možacie rastłumačyć, u jakuju mienavita?
— Vajna pierachodzić u novuju fazu, a mienavita, Ukraina, vystajaŭšy i vymataŭšy sapiernika ŭ kryvavych abarončych bajach, ciapier budzie atrymlivać zbroju, jakaja pa jakaści, pa fiłasofii vykarystańnia nieparaŭnalnaja z tym, što vykarystoŭvałasia pierad hetym abodvuma supraćlehłymi bakami.
My havorym z vami pra raźviedvalna-ŭdarnyja, raźviedvalna-ahniavyja kompleksy, jakija ŭklučajuć u siabie mahutnuju artyleryju i sistemy vyjaŭleńnia i karekciroŭki celaŭ. My havorym pra rakiety pavyšanaj dalokaści, u tym liku takija, jak «Harpun», jakija dazvolać źmianić situacyju ŭ Čornym mory. Vy razumiejecie, nakolki krytyčnaja, naprykład, dla Ukrainy mahčymaść vykarystańnia partoŭ dla pieravozak, kab pracavała ekanomika.
My havorym pra jakasnaje uzmacnieńnie sistem supraćpavietranaj abarony, jakoje faktyčna źniščyć pieravahu rasijskaj avijacyi ŭ pavietry. Jana i tak ciapier dastatkova abmiežavanaja, tamu što lotčyki prosta bajacca apuskacca na vyšyniu, nižejšuju za siem kiłamietraŭ, bajučysia być źbitymi.
My havorym pra dalejšaje ŭzmacnieńnie i pavieličeńnie efiektyŭnaści srodkaŭ suviazi, heta značyć, my havorym pra zakrytyja sistemy suviazi, jakija buduć pastupać na ŭzbrajeńnie.
Dy navat elemientarnyja takija pakazčyki, jak pieradača Ukrainie amierykanskich kulamiotaŭ Browning abo niamieckich kulamiotaŭ MH4 — heta ŭžo vialiki krok napierad. Tamu što i chutkastrelnaść, i efiektyŭnaść vykarystańnia hetaj zbroi na paradak vyšejšyja, čym toje, čym vałodaje ciapier i ŭkrainskaje vojska, i toje, čym u asnoŭnym uzbrojenaje bieź pierśpiektyvy chutkaj zamieny rasijskaje vojska na siońniašni dzień.
Samy prosty prykład. Nibyta roźnica ŭsiaho ŭ try milimietry pamiž 152-milimietrovaj haŭbicaj, jakaja źjaŭlajecca asnoŭnaj haŭbicaj rasijskaj armii i pakul jašče ŭkrainskaj, i 155-milimietrovaj, dapuścim, šviedskaj haŭbicaj Archer. Ale kali savieckaje ŭzbrajeńnie stralaje na adlehłaść prykładna 20-30 km, to Archer stralaje z dastatkova vysokaj chutkastrelnaściu na adlehłaść 70 km.
Takim čynam, kali va ŭkrainskaj armii buduć i raźviedvalna-ŭdarny kompleks, jaki ŭklučaje ŭ siabie i 155-milimietrovyja haŭbicy, i drony, jakija buduć karektavać ahoń hetych haŭbic i ŭdakładniać cel, i sistemy kontrbatarejnaj baraćby, rasijskaja artyleryja prosta stracić mahčymaść nanosić udary. Tamu što ŭdary buduć nanosicca pa-za zonaj dziejańnia hetaj artyleryi: dzie 30 kiłamietraŭ i dzie 70. Adčujcie roźnicu, jak kažuć u Adesie.
— Administracyja ZŠA prosić u Kanhresa 33 miljardy dalaraŭ, ź jakich 20 miljardaŭ pavinna pajści na zbroju. Heta mnoha ci mała, kali paraŭnoŭvać u bolš zrazumiełych vieličyniach: u tankach, u Javelin?
— Ja b chacieŭ paźbiehnuć paraŭnańniaŭ u hetym pytańni, tamu što nielha ŭsio prosta źvieści da Javelin. Davajcie budziem ščyryja. Na siońniašni dzień va ŭkrainskaj armii ZRK Javelin i inšych srodkaŭ supraćtankavaj zbroi dastatkova, kab źniščyć usie braniavanyja celi rasijskaha vojska, jakija zadziejničanyja ŭ sučasnaj vajnie, pa try, a to i pa piać razoŭ. Tak što kazać pra heta dastatkova składana.
Kazać pra inšyja elemienty taksama składana, tamu što sama pa sabie, naprykład, zienitnaja niamieckaja ŭstanoŭka efiektyŭnaja, ale jana małaprydatnaja, kali jana budzie dziejničać u adryvie ad kompleksu inšych vidaŭ uzbrajeńniaŭ bajavoj techniki. Toje ž tyčycca i strałkovaj zbroi. Jana abjektyŭna daražejšaja, čym aŭtamat Kałašnikava: nie $75 za adzinku i nie $50 za prymityŭny «Kałašnikaŭ», jano ŭ dva razy daražejšaje.
Ale pa efiektyŭnaści ja b skazaŭ tak, što $20 młrd — heta moža być paraŭnalna navat ź biudžetam na abaronu niejkaj nievialikaj krainy. Heta bolš čym dastatkova, razumiejučy, ź jakim sapiernikam my majem spravu. I razumiejučy, jakaja zbroja i ŭ jakich kolkaściach pieradajecca. Tamu heta vielmi šmat.
ZŠA adkryvajuć lend-liz dla Ukrainy. Apošni raz takoje było dla baraćby z hitleryzmam
NATA praviadzie najbujniejšyja vučeńni va Uschodniaj Jeŭropie z udziełam armij Finlandyi i Šviecyi
