Havorka idzie pra čatyroch mužčyn, cieły jakich lažali kala budaŭničych materyjałaŭ na adnoj z vulic u Bučy. U niekatorych mužčyn byli źviazany za śpinaj ruki, takim čynam, jany byli zakładnikami. Zabojstva adbyłosia 18 sakavika, adnak cieły pralažali da pačatku krasavika, pakul u horad nie ŭvajšli ŭkrainskija vajskoŭcy i pravaachoŭniki.
Jak vyśvietlili prakurory, da rasstrełu byŭ datyčny 35-hadovy biełarus Siarhiej Kałacej. Jon kamandavaŭ adnym z padraździaleńniaŭ rasijskich akupantaŭ, jakija ździajśniali złačynstvy ŭ Bučy. Niekatorych mirnych žycharoŭ jany brali ŭ pałon i katavali, a inšych rasstrelvali prosta na vulicy.
Pieršy abvinavačany ŭ zabojstvach u Bučy biełarus? Moža być pamyłka: hety čałaviek dvojčy sudzimy
Momant zabojstva bačyli niekalki śviedak. Adzin ź ich zmoh navat zapisać na videa hetyja padziei, dzie vidać miesca rasstrełu i momant, kali adzin z akupantaŭ padymaje ruku sa zbrojaj i zatym razdajecca vystrał.
Śviedki paznali Siarhieja Kałaceja na videazapisie ź biełaruskaha paštovaha adździaleńnia, dzie kamiera zafiksavała, jak maradziory adpraŭlali narabavanuju va Ukrainie majomaść svaim svajakam u Rasiju. Pavodle paštovych dakumientaŭ i videa, Kałacej adpraŭlaŭ u horad Uljanaŭsk kryšku bahažnika aŭtamabila.
Žurnalisty pa prośbie pravaachoŭnikaŭ dapamahli identyfikavać asobu Siarhieja Kałaceja, praanalizavaŭšy jaho tvar na videazapisy i jaho danyja z paštovych dakumientaŭ.
Padazravany Kałacej naradziŭsia i vyras u Mazyry. Doŭhi čas zajmaŭsia adzinaborstvami, vystupaŭ na łakalnych spabornictvach. U svaich sacsietkach piša, što zatym pierajechaŭ u Rasiju, u pryvatnaści, u Maskvu.
Pavodle prakuratury Ukrainy, Kałacej maje dačynieńnie da padraździaleńnia Rashvardyi. Razam ź inšymi padraździaleńniami rasijskich akupantaŭ jon uvarvaŭsia na terytoryju Ukrainy, śćviardžajuć ukrainskija pravaachoŭniki.
Choć sam Kałacej admaŭlaje svaju vinu. Svaju viersiju jon vykazaŭ u razmovie z karespandentam «Možiem objaśniť».
«Ja nie słužu ŭ Nachvardyi. Vy što, z hłuzdu źjechali?» — zajaviŭ jon.
U jakaści dokazu viny Kałaceja Hienprakuratura Ukrainy apublikavała jaho fatahrafiju z paštovaha adździaleńnia. Žurnalisty ŭdakładniajuć, što momant zabojstva bačyli niekalki śviedak, paśla jany apaznali adnaho z zabojcaŭ na videazapisie z adździaleńnia kurjerskaj słužby SDEK u Mazyry, dzie rasijskija vajskoŭcy adpraŭlali dadomu rečy, jak miarkujecca, narabavanyja va Ukrainie. Hety čałaviek pierasyłaŭ kryšku bahažnika aŭtamabila.
Kałacej admaŭlaje ŭsie abvinavačvańni. «Tady ŭkrainskaja prakuratura pavinna abvinavacić usich, chto dasyłaje pasyłki ŭ Rasiju. Nahadaju vam, što hetaja arhanizacyja źjaŭlajecca paštovym adździaleńniem, dzie luby moža adpravić pasyłku kamu zaŭhodna i kudy zaŭhodna. Pierš čym kahości vinavacić u čymści, vyśvietlicie ŭsie detali, inakš vas abvinavaciać u pahrozach i paklopie na mirnych hramadzian inšych dziaržaŭ», — nastojvaje padazravany.
Mužčyna zajaviŭ, što nie źjaŭlajecca hramadzianinam Rasii, u jaho jość tolki pašpart Respubliki Biełaruś, dzie jon ciapier i znachodzicca. Mužčyna admaŭlaje, što apošni čas naviedvaŭ Ukrainu.
Jon taksama dadaŭ, što nie budzie źviazvacca z ukrainskimi ŭładami praz abvinavačvańni ŭ katavańniach i zabojstvach. «Niachaj svaje pamyłki i sami likvidujuć. Heta jany ŭ adkazie za paklop na inšych hramadzian», — skazaŭ na zakančeńnie jon.
