«Sadysty ŭ vyšyvankach: što zabylisia va Ukrainie biełaruskija nacyjanalisty»
Materyjał z takim artykułam apublikavali rasijskija «Iźviestija». U im idzie havorka pra biełaruskich dobraachvotnikaŭ, jakija vajujuć na baku Ukrainy.
Prapahandysty śćviardžajuć, što metaj stvareńnia bataljona Kalinoŭskaha źjaŭlajecca «stvareńnie mifa ab nibyta isnujučaj supolnaści biełaruskich nacyjanalistaŭ, jakija nabyvajuć bajavy vopyt dla prymianieńnia na svajoj radzimie».
Vydańnie śćviardžaje, što za dziejnaściu biełaruskich dobraachvotnikaŭ stajać banalnyja pijar-akcyi: dla pryciahnieńnia sponsarskaj dapamohi, mabilizacyi prychilnikaŭ i prapahandy idej.
Voś tak, na dumku rasijskaha prapahandysta, vyhladaje biełaruski dobraachvotnik va Ukrainie:
«Da kryzisu siaredniaha ŭzrostu jany padyšli biez narmalnaha žyćciovaha i pracoŭnaha vopytu. Tamu zaŭsiodniki apazicyjnych tusovak, mitynhaŭ i «sieminaraŭ», što ni dnia nie prastajali la stanka, ni siezonu nie adpracavali ŭ poli, całkam pradkazalna apynulisia ŭ pole zroku viarboŭščykaŭ», — piša aŭtar, pry hetym nie zhadvajučy, za jakim stankom stajaŭ jon sam.
«Paŭtarajučy šlach ukrainskich nacyjanalistaŭ, kapijujučy ich napracoŭki ad «Dzion vyšyvanak» da idej i mietadaŭ pracy ź dziaržaparatam, biełaruskija nacyjanalisty faktyčna prahramujuć takuju ž katastrofu dla Biełarusi», — havorycca ŭ prapahandysckim materyjale.
Va ŭsioj hetaj situacyi prapahandyst abvinavačvaje, u tym liku, biełaruskich čynoŭnikaŭ.
«Ale za hetym faktam stajać sistemnyja pamyłki, i nie tolki biełaruskaj čynoŭnickaj «ideałahičnaj viertykali». Vidavočna, ilvinaja dola adkaznaści lažyć na joj. Jaje možna kankretyzavać, nazvać proźviščy i pasady ŭ roznych ministerstvach i viedamstvach — ad MZS i Minkultury da Rady biaśpieki. Biez stvareńnia spryjalnaha klimatu rusafobija nie zakvitnieła b tysiačami NKA, jakija pačali vykarčoŭvać tolki paśla šoku žniŭnia 2020 hoda», — piša aŭtar.
«Boža moj, jakija strachi i jakija pryznańni!»
Aŭtar rasijskaha «Kommiersanta» Andrej Kaleśnikaŭ va ŭłaścivaj dla siabie iraničnaj maniery napisaŭ pra sustreču Pucina i Łukašenki ŭ Dzień kasmanaŭtyki na kasmadromie «Uschodni».
Fota: kremlin.ru.
Kaleśnikaŭ spytaŭ u Łukašenki:
— Uładzimir Uładzimiravič Pucin daručyŭ Dźmitryju Alehaviču Rahozinu adpravić biełaruskaha kasmanaŭta ŭ kosmas. Skažycie, kali łaska, vy siabie nie chacieli b pasprabavać?
«Alaksandr Łukašenka vielmi blizka da serca pryniaŭ hetaje pytańnie», — piša rasijski žurnalist.
— Chacieŭ by! — uskliknuŭ Łukašenka. — Raniej dumaŭ, što starejšy brat moža mianie adpravić tudy i nazad nie viarnuć. Ciapier užo ja tak nie dumaju, — skazaŭ Łukašenka.
«Boh moj, jakija strachi i jakija pryznańni! Paśla 24 lutaha paradnilisia i praŭda ŭžo nie na žart», — kamientuje Kaleśnikaŭ.
«Rasija i Biełaruś farmirujuć adzinuju abaronnuju prastoru»
Rasijskaja dziaržaŭnaje prapahandysckaje vydańnie RT piša, što farmiravańnie adzinaj abaronnaj prastory Rasii i Biełarusi budzie praduhledžvać dalejšuju intehracyju armij dźviuch krain na stratehičnym i apieratyŭna-taktyčnym uzroŭniach.
«Biełaruś słužyć našym tryvałym fłanham padčas śpiecapieracyi na Ukrainie. Pieryjadyčna ŭźnikajuć niejkija pravakacyi z polskaha boku, ale Biełaruś staić jak kamień i strachuje Rasiju. Stanovišča Biełarusi dazvalaje rakietnaj zbroi, naprykład apieratyŭna-taktyčnym kompleksam «Iskander», pakryvać usiu Zachodniuju Jeŭropu», — havorycca ŭ materyjale.
Na terytoryi Biełarusi, jak i ŭ Kalininhradskaj vobłaści, mohuć być raźmieščanyja i hipierhukavyja rakiety «Kinžał», pišuć prapahandysty.
Hałoŭny redaktar časopisa «Nacionalnaja oborona» Ihar Karotčanka ŭ kamientary RT kanstatavaŭ, što dalejšaje farmiravańnie adzinaj abaronnaj prastory Rasii i Biełarusi budzie ŭklučać u siabie supolnaje vajennaje płanavańnie, umacavańnie sumiesnaj vajskovaj hrupy i raźviedki i ŭzajemnuju abaronu ŭ kanfliktnych situacyjach.
«Biełaruś varta rabić harantam rasijska-ŭkrainskich damoŭlenaściaŭ»
Biełaruś pavinna ŭdzielničać u pieramovach Rasii z Ukrainaj, bo jana nasamreč zacikaŭlena ŭ ich paśpiachovym zaviaršeńni. Da taho ž Biełaruś miažuje z abiedźviuma kanfliktujučymi bakami, pišuć aŭtary 360tv.ru.
Na dumku palityčnaha kamientatara Arešava, Biełaruś pavinna być niepasrednym udzielnikam lubych damoŭlenaściaŭ Rasii i Ukrainy, bo jana namnoha bolš zacikaŭlenaja ŭ paśpiachovym chodzie pieramovaŭ, čym taja ž Turcyja.
Pakul što ŭsie pahadnieńni i damoŭlenaści z Ukrainaj znachodziacca pad vialikim pytańniem i kazać ab harantach rana, upeŭnieny daniecki palityčny kamientatar Uładzimir Karniłaŭ. Dy i staŭleńnie ŭkrainskaha boku da biełaruskaha, pa jaho dumku, vielmi niehatyŭnaje.
«Peŭnyja asacyjacyi sa stalinskimi časami, viadoma, uźnikajuć»
Palityčny ahladalnik «Kommiersanta» razvažaje pra apošniuju spravu miedykaŭ-karupcyjanieraŭ u Biełarusi i znachodzić paraleli z anałahičnaj spravaj u časy Stalina.
«Možna ŭspomnić, što ŭ Alaksandra Ryhoraviča ź miedykami adnosiny apošnija dva hady skłalisia niaprostyja. Byli vypadki ich udziełu ŭ pratestach. I da hetaha — u pandemičnyja časy — nie ŭsie razumieli pazicyju lidara ŭ dačynieńni da hetaj chvaroby. Pamiatnaja historyja z łaźniaj i sta hramami śpirytusovaha napoju ŭ jakaści prafiłaktyčnych mier suprać COVID-19. I ciapier spadar Łukašenka ŭsialak daje zrazumieć: jon viedaje, adkul uziaŭsia virus, i hatovy prapanavać ułasny recept baraćby z hetym złom. Reč u tym, što jość palityka, a jość prafiesijnaja vyvučka, ale skryžavać adno z adnym atrymlivajecca nie zaŭsiody, tamu i ŭźnikaje nierazumieńnie.
Varta adznačyć, što Alaksandar Łukašenka apošni čas demanstruje nadzvyčajnuju daśviedčanaść. U jaho jość adkaz praktyčna na luboje vostraje pytańnie navat za miežami terytoryi svajoj ułasnaj krainy — ad Alaksieja Navalnaha da Bučy, i adpaviednyja dakumienty majucca, pierachopy, ahienturnyja danyja — usio jak maje być», — kaža rasijski žurnalist.
«Bataljon imia Kastusia Kalinoŭskaha stanovicca bajavym kryłom apazicyi»
Pra bataljon Kalinoŭskaha napisała i «Niezavisimaja hazieta». Na dumku vydańnia, z bataljona Zachad robić bajavoje kryło apazicyi, jakoje paźniej, pry žadańni, moža paŭpłyvać na situacyju ŭ samoj Biełarusi.
«Vielmi pakazalnaja asoba čałavieka, imiem jakoha nazvana padraździaleńnie. Vikiencij-Kanstancin Kalinoŭski — adzin ź lidaraŭ polskaha paŭstańnia suprać Rasijskaj imperyi 1863—1864 hadoŭ. Pachodziŭ z polskaha šlachieckaha rodu», — piša rasijskaje vydańnie pra Kastusia Kalinoŭskaha.
«Suviazi biełaruskaj apazicyi z Polščaj (u pryvatnaści, supolnyja hieroi) abumoŭlenyja nie tolki susiedstvam dźviuch krain. Reč šmat u čym u tym, što ŭ «ruski śviet» terytoryja Biełarusi ŭvachodzić całkam tolki ŭ 1795 hodzie, u vyniku treciaha padziełu Rečy Paspalitaj. A da hetaha stahodździami jana naležała da «polska-litoŭskaha śvietu», — dzielicca z čytačami svaimi histaryčnymi viedami žurnalist.
