Ciaham 19 hadoŭ Raman Abramovič namahaŭsia zrabić «Čełsi» lepšym kłubam śvietu. Kałaž: thesun.co.uk
Nabyŭ za 140 miljonaŭ funtaŭ, pradaŭ za 4,25 młrd
U 2003 hodzie Raman Abramovič staŭ pieršym ruskim uładalnikam kłuba Premjer-lihi: usiaho za 10 chvilin z pačatku pieramoŭ jon uchvaliŭ afarmleńnie rekordnaj na toj momant uhody ŭ historyi brytanskaha futboła. Aliharcha nie źbiantežyła ni nieabchodnaść addać 59,3 młn za kantrolny pakiet akcyj, ni patreba zakryć 80 młn łondanskich pazyk. Dla paraŭnańnia: były ŭłaśnik «Čełsi» Kien Bejts, što stajaŭ na čale «ilvoŭ» z 1982 hoda, vydatkavaŭ na pakupku simvaličny adzin funt — dy jašče paŭtara miljona na spraŭdžvańnie bankavych abaviazacielstvaŭ.
Siońnia ž Abramovič pieradaje kłub kansorcyumu miljarderaŭ u składzie Toda Baeli (na rachunkach — 4,5 młrd dalaraŭ), Marka Uołtera (3,9 młrd) dy Chansa-Jorha Visa (5 młrd). Košt uhody — 4,25 młrd funtaŭ. Pry hetym 1,75 młrd pojduć niepasredna na raźvićcio «Čełsi»: infrastruktury, mužčynskaj i žanočych kamand, akademii i hetak dalej. A jašče 2,5 młrd vydatkujucca na dabračynnaść, bo sankcyi zabaraniajuć Abramoviču atrymlivać luby prafit pa apieracyjach u Brytanii.
Vydatkavaŭ na tranśfiery 2,1 młrd funtaŭ
Palityka dziejańniaŭ Abramoviča na tranśfiernym rynku akreślivałasia maksimalna prosta: «nabyvać zornych hulcoŭ, niahledziačy na košty». Užo ŭ debiutnym siezonie na čale «Čełsi» jon vypisaŭ u Łondan sapraŭdnych topaŭ kštałtu forvarda Ernana Krespa dy paŭabaroncy Chuana Siebaśćiana Vierona. Ahulny ž ček «zakupaŭ»-2003/04 skłaŭ nievierahodnyja 153 młn funtaŭ!
Vydatki «Čełsi» na tranśfiery pry Ramanie Abramovičy. Statystyka: footballtransfers.com
Dalej kanviejer pa abnaŭleńni tranśfiernych rekordaŭ tolki nabiraŭ moc. Paŭsotni miljonaŭ funtaŭ za Fiernanda Toresa, 70 — za Kaja Chavierca, 97,5 — za Ramiełu Łukaku, što zrabiła bielhijca samym darahim forvardam u futbolnaj historyj… Rasijski aliharch nie spyniaŭsia ni pierad čym, kali mieŭ namier uzmacnić «Čełsi» hulcom, jaki jamu pryjšoŭsia da spadoby. Pry hetym časta biznesmien nie braŭ va ŭvahu patreby treniera — i šerahu spartsmienaŭ tym samym sapsavaŭ karjery. Jak prykład, ukrainiec Andrej Šaŭčenka: vaładar «Załatoha miača», jaki bliskuča vystupaŭ za «Miłan», paddaŭsia na ŭhavory Abramoviča dy źmianiŭ Italiju na Anhliju. Adnak u Łondanie z-za niezapatrabavanaści nie prademanstravaŭ i 10 pracentaŭ svajho patencyjału.
Usie nabytki «Čełsi» na tranśfiernym rynku ciaham «ery Abramoviča». Statystyka: thesun.co.uk
Zdaralisia i śmiešnyja historyi. Letam 2004-ha aliharch patrabavaŭ ad padnačalenych padpisać u «Čełsi» chaŭbieka Hijuły. Skaŭty «ilvoŭ» pierakulili z noh da hałavy ŭsie lihi tureckaha čempijanatu, a taksama samych viadomych lehijanieraŭ z toj krainy. Adnak patrebnaha vykanaŭcu nie znajšli. I tolki praź niekatory čas vyśvietliłasia, što Abramovič mieŭ na ŭvazie Ludavika Žiuli (Ludovic Giuly), jaki pryvioŭ francuzski «Manaka» ŭ finał Lihi čempijonaŭ-2004.
Całkam ža bałans prafitu dy strat «Čełsi» ŭ dačynieńni da tranśfieraŭ składaje admoŭnuju sumu ŭ 1,03 młrd funtaŭ. I heta jašče z ulikam banu na nabyćcio hulcoŭ letam 2019 hoda. Tady «ilvy» panieśli pakarańnie za parušeńnie praviłaŭ padpisańnia maładych hulcoŭ — i mahli raźličvać vyklučna na tych, chto ŭžo byŭ na kantraktach u składzie.
Samyja darahija tranśfiery ŭ historyi «Čełsi» pry Abramovičy. Statystyka: thesun.co.uk
Dadamo, što samym darahim łotam, jaki «Čełsi» addaŭ u inšy kłub, staŭ Eden Azar. Letam 2019 hoda toj pierajšoŭ u madrydski «Reał» za 98,4 młn funtaŭ. Adpaviedna, nivodzin prodaž łondancaŭ da «stoli» ŭ 100 młn tak i nie daciahnuŭ, jak Abramovič ni namahaŭsia i hetuju płanku pieraadoleć.
Za zvalnieńni trenieraŭ zapłaciŭ 112,5 młn
Abramovič patrabavaŭ ad «Čełsi» pieramahać tut i zaraz. Tamu nastaŭniki, što zastupali na kapitanski mastok, chaj sabie i mieli kałasalny tranśfierny resurs, adnak pracavali litaralna da pieršaj pamyłki. Za 19 hadoŭ kiravańnia rasijanina «ilvy» 15 razoŭ mianiali trenieraŭ — i vyklučna elitnych. Naprykład, u Zachodni Łondan zavitvali Karła Ančałoci, Rafa Bianites, Antonija Konte, Tomas Tuchiel… Žaze Muryńja i Hus Chidzink uvohule kłub uznačalvali dvojčy, adnak heta tolki padkreślivała, što niedatykalnych u składzie «błakitnych» niamašaka.
Kožny daterminovy razryŭ kantrakta z koŭčam kaštavaŭ Abramoviču miljony funtaŭ. Samym balučym atrymałasia z Muryńja: sumarna partuhalcu kampiensavalisia vydatki ŭ pamiery 34,5 młn funtaŭ. Ahułam ža daterminovaje spynieńnie adnosin z trenierami abyšłosia aliharchu ŭ 112,5 młn funtaŭ.
Vyjhraŭ 21 trafiej — kožny z mahčymych dla jeŭrapiejskaha kłuba
Za 98 hod isnavańnia «Čełsi» da prodažu rasijanina ŭ kłubnuju skarbonku dadałosia ŭsiaho 11 trafiejaŭ. Pryčym u pieršynstvie Anhlii «ilvy» pieramahali tolki ŭ 1950-m. Tady jak pry Abramovičy ŭžo na druhi hod kaapieracyi razžylisia Kubkam miascovaj lihi. Nadalej uznaharody zdabyvalisia stachanaŭskimi tempami. Pryčym łondancam skaralisia jak rehijanalnyja turniry, tak i Liha čempijonaŭ. Usiaho rasijski biznesoviec uzdymaŭ nad hałavoj razam z kamandaj 21 kubak — u tym liku za pieramohu na kłubnym čempijanacie śvietu dy za tryumf u Supierkubku Jeŭropy.
Adzinaja ŭznaharoda, što zastałasia pa-za miežami ŭpłyvu Abramoviča, — Liha Kanfierencyj UEFA. Adnak jaje možna pakinuć za dužkami, bo turnir debiutavaŭ u kantynientalnym kalendary tolki sioleta. Tady jak rasijanina adchilili ad kłubnaha kiravańnia jašče ŭzimku. Tamu, faktyčna, u «Čełsi» navat tearetyčnaha šancu pazmahacca za hety trafiej pry aliharchu nie było.
