Fota: pixabay.com
Najaŭnaść siabroŭ — važny faktar dabrabytu čałavieka. Supraćlehłyja jamu paniaćci, adzinota i sacyjalnaja izalacyja, mohuć być źviazanyja z pavyšanaj ryzykaj depresii i tryvožnaści ci z chvarobami nakštałt infarktu ci insultu. Jość navat danyja, što adzinota moža być takoj ža škodnaj fizičnamu zdaroŭju, jak kureńnie 15 cyharet u dzień.
Kolki ž siabroŭ dastatkova mieć, kab nie adčuć na sabie nastupstvy adzinoty? Kali vaša meta — prosta źmiakčyć drenny ŭpłyŭ adzinoty na zdaroŭje, treba mieć u svaim žyćci jak minimum adnaho važnaha čałavieka. Heta moža być nie tolki siabar, ale, naprykład, svajak ci kachany, piša New York Times.
Ale kali vam chočacca vieści bolš źmiastoŭnaje žyćcio i adčuvać siabie źviazanym ź inšymi, to čym bolš u vas budzie siabroŭ, tym lepš.
Samaja viadomaja teoryja pra toje, kolki siabroŭ moža być u čałavieka, źviazanaja z brytanskim psichołaham i antrapołaham Robinam Danbaram. Jon padličyŭ, što ludzi mohuć adnačasova padtrymlivać tolki kala 150 suviaziej (inšyja daśledavańni dajuć bolš vysokuju ličbu), i hetaja ličba ŭklučaje ŭ siabie mahčymaść mieć kala piaci blizkich siabroŭ.
Inšyja daśledavańni dajuć padobnyja ličby. Naprykład, pa adnych danych ludzi, jakija mieli šeść siabroŭ i bolš, adroźnivalisia na praciahu žyćcia lepšym zdaroŭjem. Inšaja praca, zroblenaja prafiesarkaj Sjuzan Dehz-Uajt z univiersiteta paŭnočnaha Ilinojsa, śviedčyć — žančyny siaredniaha ŭzrostu, jakija mieli troje siabroŭ ci bolš, byli bolš zadavolenyja žyćciom.
Taja samaja Dehz-Uajt niadaŭna praviała jašče adno daśledavańnie, zhodna ź jakim bolšaść ludziej sami adčuvajuć, kolki siabroŭ im treba. 55% ź jaje respandentaŭ paličyli, što lepš za ŭsio mieć 2-3 blizkich siabra, a 31% vybraŭ varyjant u 4-6 siabroŭ.
I ŭsio-tki nichto lepš za vas nie adkaža, ci treba vam mieć bolš siabroŭ. Prosta zadajcie sabie pytańnie: ci adčuvaju ja siabie adzinokim? Kali tak, to treba imknucca da bolš ciesnych suviaziej ź inšymi ludźmi.
Viadoma, što zavodzić novych siabroŭ u darosłym uzroście ciažka, tamu možna pasprabavać adnavić staryja suviazi. Vaźmicie na siabie inicyjatyvu i pamiatajcie, što kolkaść času, praviedzienaha razam z budučym siabram, taksama maje značeńnie — čym daŭžej vy razam, tym jakaśniej vaša suviaź.
Ale nie treba tracić čas na adnosiny ź ludźmi, jakija zdajucca vam nienadziejnymi, zanadta vas krytykujuć ci jašče niejkim čynam prymušajuć adčuvać siabie niekamfortna. Takoje «siabroŭstva», naadvarot, moža naškodzić zdaroŭju.
«Našu Nivu» finansujuć jaje čytačy — padtrymać prosta
Čytajcie taksama:
«Paznajomilisia — i razam pačali partyzanić». Biełaruski raskazali, jak padčas pratestaŭ sustreli blizkich ludziej
