Usie fota: kino-teatr.ru
Padmurkam dla «Ptalemieja Hreja» pasłužyŭ raman Uołtera Mośli, jaki vyjšaŭ u 2010 hodzie. Z taho samaha času Džeksan niastomna šukaŭ mahčymaści dla ekranizacyi tvora. Nie ŭsio ŭdałosia pry ŭvasableńni idei, ale ŭsie mahčymyja niedachopy stužki kampiensujucca ašałamlalnaj ihroj vykanaŭcaŭ hałoŭnych rolaŭ, piša Variety.
Ptalemiej Hrej (Džeksan) — heta 91-hadovy chvory na demiencyju, jaki žyvie adzin u zaniadbanaj kvatery ŭ paŭdniovaj Atłancie. U jaho ciažkim stanie Hreju i tak było b niaprosta vychodzić na vulicu, ale susied-narkaman robić heta i ŭvohule niemahčymym. Jon napadaje na staroha i patrabuje ad jaho hrošy kožny raz, kali Hrej aśmielvajecca vyjści na dvor. Adzinaja suviaź staroha sa śvietam — heta jaho plamieńnik Redžy, jaki kłapocicca pra Hreja i sočyć, kab ź im ničoha nie zdaryłasia.
Pieršuju sieryju «Ptalemieja» hladzieć ciažka, bo aŭtary stužki jarka adlustroŭvajuć žyćcio hałoŭnaha hieroja, napoŭnienaje biezvychodnaściu. Režysior Ramin Bachrani vykarystoŭvaje składanyja pryjomy, kab pakazać, što heta takoje — być Ptalemiejem Hrejem, naprykład, ustaloŭvaje kamieru na hrudzi, kab pieradać dezaryjentacyju hałoŭnaha hieroja.
Ale ž Džeksanu nie patrebnyja hetyja inavacyi. Znakamity akcior i tak raźbivaje serca svaim vykanańniem roli chvoraha staroha, jaki cełymi dniami jeść baby prosta ź blašanki i zmahajecca z pryvidami sa svajho minułaha. Naprykład, u siem hadoŭ Ptalemiej staŭ śviedkam linčavańnia svajho dziadźki Kojdaha, a praź dziesiacihodździ pieražyŭ stratu žonki Sensii, ź jakoj u jaho byli niaprostyja adnosiny — i ŭsie hetyja ŭspaminy paźniej źjaviacca ŭ sieryjale.
Raptam staroha vyklikajuć u dom svajaka, i vyśviatlajecca, što jaho plamieńnika Redžy zabili ŭ vyniku dziŭnaj i biespryčynnaj stralaniny. Hetaja strata zanadta vialikaja dla Hreja, i toj, niahledziačy na svoj stan, klaniecca znajści zabojcu plamieńnika i pryciahnuć da adkaznaści.
Z hetaj metaj Hrej prymaje prapanovu ad doktara Rubina pryniać udzieł u miedycynskich dośledach, jakija zdajucca ledźvie nie mahičnymi. Rubin raspracavaŭ leki, jakija paśla ŭviadzieńnia adnoviać uspaminy Ptalemieja prykładna na miesiac. Ale ž hetaje akno nielha pavialičyć, i praź miesiac demiencyja Ptalemieja vierniecca ŭ jašče bolš žorstkaj formie, čym raniej.
Nie abyšłosia i biez historyi kachańnia — praŭda, miłaj i płataničnaj. Pustatu ŭ sercy Hreja, što źjaviłasia tam paśla śmierci Redžy, zapaŭniaje (spačatku nieachvotna) 17-hadovaja sirata Robin, jakaja šukaje prytułku. Jana pierajazdžaje da Ptalemieja pa nieabchodnaści, zaviazvaje ź im piaščotnaje siabroŭstva i potym pačynaje achoŭvać jaho, kali machinacyi doktara Rubina robiacca zusim nieprymalnymi.
Robin pieratvarajecca ŭ najbližejšaha sajuźnika Hreja, u kahości nakštałt paplečnika detektyva. U ich suviazi jość lohkaja dvuchsensoŭnaść, i vyhladaje, što kali b nie 70-hadovaja roźnica pamiž imi, hetaja suviaź mahła b stać ramantyčnaj. Džeksan i Daminik Fišbek, jakaja hraje Robin, nastolki abajalnyja razam, što lubaja scena sieryjała, dzie niama ich abodvuch, padajecca lišniaj — navat kali jana važnaja dla raźvićcia siužeta.
Sieryjał abjadnoŭvaje jak vydatnuju akciorskuju ihru hałoŭnych zorak, tak i jakasny scenar. I kali heta ŭsio sabranaje razam, adarvacca ad stužki niemahčyma. Na praciahu niekalkich sieryj my bačym usiebakovaje i śpiełaje daśledavańnie cikavaha piersanaža. Ptalemiej moža padacca niekamu zanadta mudrym dla sapraŭdnaha čałavieka, ale aŭtary stužki robiać jaho asobaj, ad jakoj niemahčyma adarvać pozirk.
Rejtynhi na vialikich suśvietnych resursach:
IMDB — 7,8 / 10,
Rotten Tomatoes — 87%.
Čytajcie taksama:
Što pahladzieć. «Prajekt «Adam» — padarožžy ŭ časie, zorny skład i vysokija rejtynhi na Netflix
