BPŁA Arłan/ Fota: Minabarony Rasijskaj Fiederacyi / Facebook
«Hetaha nie moža być, vy nas razyhryvajecie», ‒ tak reahavali zachodnija ekśpierty na fatahrafii rasijskaha bieśpiłotnika «Arłan», jaki trapiŭ u ruki ŭkrainskich vajskoŭcaŭ.
Na apublikavanych ukraincami fota i videa vidać, što ŭ sistemie padačy paliva «Arłana» vykarystoŭvajecca butelka z-pad minieralnaj vady, a za fota-i videazdymku adkazvaje fotaaparat Canon, prymacavany lipučkaj i klejem. Pry hetym rasiejskamu biudžetu «Arłan-10» abychodzicca ŭ $100 000, piša The Moscow Times.
Pryčynaj takoj darahoŭli moža być karupcyja. Letaś stała viadoma pra afioru z pastaŭkaj kamplektujučych dla bieśpiłotnikaŭ «Arłan-10». Rajonny sud Kazani nakłaŭ aryšt na čamadan z 48,6 młn rubloŭ, jakija apieratyŭniki UFSB pa Tatarstanie kanfiskavali pry asabistym dahladzie ŭ kiraŭnika kampanii, jakaja pracavała nad prajektam bieśpiłotnych kompleksaŭ «Arłan-10».
U suviazi ź mierkavanym «adkatam» u Kazani zatrymali 51-hadovaha namieśnika dyrektara pa finansavych pytańniach «STD-Radyks» Andreja Pałškova. Jaho vinavacili ŭ zmovie z dyrektaram AT «Kazanski zavod «Elektraprybor» Paŭłam Šackim i kradziažy 446 młn rubloŭ ź biudžetu, vydzielenych u 2017—2020 hadach u ramkach dziaržabaronzakazu, z dapamohaj zavyšeńnia koštu kamplektujučych dla vytvorčaści bieśpiłotnikaŭ «Arłan-10» u picierskim TAA «Śpiecyjalny technałahičny centr».
Kradziažy pačalisia daloka nie letaś. Jašče ŭ 2017 hodzie Centrabank sihnalizavaŭ, što banki, jakija pracujuć z hrašyma Minabarony, zamiašanyja ŭ cieniavych apieracyjach i vyvadzie kapitału. Da takoj vysnovy pryjšoŭ CB, pravieryŭšy 27 kredytnych arhanizacyj, praź jakija prachodziać srodki dziaržabaronzakazu.
U «abnaličku» sychodzić ad 50% da 70% dziaržabaronzakazu, paviedamlała krynica «Viedamaściaŭ», blizkaja da Centrabanka i Raśfinmanitorynhu. Dziaržprahrama madernizacyi ŭzbrajeńnia, jakaja dziejničała z 2011 pa 2020 hod, była raźličana na 20 trłn rubloŭ.
Biez abarony
21 krasavika 2022 hoda da ćviarskoj nabiarežnaj Vołhi, achutanaj kłubami ščylnaha čornaha dymu, ściahvalisia pažarnyja raźliki, mašyny chutkaj dapamohi i viertaloty Mi-8.
Hareŭ Centralny navukova-daśledčy instytut vojskaŭ pavietrana-kaśmičnaj abarony (CNDI PKA). Masiŭny čatyrochpaviarchovy budynak, jaki zajmaje ceły kvartał, vyhareŭ daščentu. Pažar udałosia likvidavać tolki ranicaj nastupnaha dnia, zahinuli 22 čałavieki.
Sakretny instytut, jaki zajmaŭsia raspracoŭkaj rakietnaha kompleksu «Iskander», viadomy taksama, jak NDI-2, zhareŭ z-za niaspraŭnaj pravodki.
Pakul śledčyja šukajuć vinavatych u parušeńni pažarnaj biaśpieki, ich kalehi z Hałoŭnaj vajennaj prakuratury vyvučajuć bolš za 350 tamoŭ kryminalnaj spravy ab kradziažach u NDI-2.
Pa hetaj spravie jašče ŭ lutym 2019 hoda byŭ aryštavany hienierał-major u adstaŭcy Siarhiej Jaholnikaŭ, jaki ŭznačalvaŭ tady NDI-2. U Jaholnikava vialikaja bijahrafija: u NDI-2 jon pracavaŭ jašče z kanca 1970-ch, za plačyma doktara techničnych navuk i adstaŭnoha vajennaha bolš za 300 navukovych prac. Ale, pa viersii śledstva, u apošnija hady jon pabudavaŭ schiemu, praź jakuju byli vykradzieny šmatmiljonnyja sumy ź biudžetaŭ, jakija vydzialajucca Minabarony na sakretnyja raspracoŭki.
Aryštu Jaholnikava papiaredničali skarhi dziasiatkaŭ ćviarskich piensijanieraŭ u palicyju. Piensijaniery skardzilisia na miascovuju kampaniju «Radyjotechničnyja i infarmacyjnyja sistemy pavietrana-kaśmičnaj abarony» (RTIS), jakaja raptam pačała patrabavać ź ich nibyta vypłačanyja hrošy pa niekatorych dahavorach. Paviedamleńniami ćviarskich piensijanieraŭ zacikavilisia supracoŭniki FSB.
Vyśvietliłasia, što, pa spravazdačach RTIS, ćviarskija piensijaniery ŭ 2014-2018 hadach stvaryli pa zamovie Minabarony sistemu «Sirena», jakaja sočyć za rakietnymi puskami z boku Alaski, i prajekt pavietrana-kaśmičnaj suviazi «Akacyja».
U realnaści ž, pa viersii śledstva, usiu pracu vykonvali supracoŭniki NDI-2 pad kiraŭnictvam Jaholnikava. A RTIS, u jakoj siamji hienierał-majora naležała 19%, prosta atrymlivała hrošy ad Minabarony. Zatym hrošy raźmiarkoŭvalisia siarod sotni «miortvych duš» ‒ tych samych piensijanieraŭ, jakija da raspracovak RTIS adnosin nie mieli. Takim čynam, ličyć śledstva, Jaholnikaŭ vykraŭ amal 300 młn rubloŭ.
Biez rakiet
25 sakavika 2022 hoda ŭłady Lvova abjavili ab rakietnych udarach z boku rasijskaj armii. U hety ž dzień u Vaskrasienskim sudzie Maskoŭskaj vobłaści ŭziali pad vartu byłoha kamiercyjnaha dyrektara karparacyi «Taktyčnaje rakietnaje ŭzbrajeńnie» (KTRU) Viktara Vahana.
Vahana pryhavaryli da vaśmi hadoŭ kałonii strohaha režymu, pryznaŭšy vinavatym u kradziažy zbroi. Roznyja terminy ŭ kałonijach ahulnaha režymu atrymali jašče try čałavieki, u tym liku Mikałaja Jakaŭleva, hiendyrektara «Turajeŭskaha mašynabudaŭničaha kanstruktarskaha biuro «Sajuz», što ŭvachodziła ŭ KTRU.
Kryminalnaja sprava ciahnułasia z 2018 hoda, a kradziažy byli ŭčynieny jašče raniej.
U 2010 hodzie Vahan i Jakaŭleŭ daviedalisia ab tym, što na adnym z padmaskoŭnych palihonaŭ płanujecca ŭtylizavać avijacyjnyja kryłatyja rakiety Ch-55. U vyniku ruchaviki ad rakiet byli pradadzienyja ŭkrainskaj kampanii «Mator Sič», a pakinuty łom adpraŭleny na pierapracoŭku. «Mator Sič» za pastaŭlenyja ruchaviki zapłaciła $2,4 młn.
U 2011 hodzie afiora paŭtaryłasia. Usio na tym ža palihonie (jaho były dyrektar atrymaŭ piać hadoŭ kałonii) pavinny byli utylizavać jašče 37 rakiet Ch-55.
Zamiest hetaha zapčastki rakiet i vybuchovyja rečyvy z bajavych častak byli vykarystanyja KTRU dla vytvorčaści 15 novych rakiet kłasa «pavietra-pavierchnia» Ch-31A. Za hetyja rakiety Minabarony zapłaciła KTRU 255 młn rubloŭ.
Biez suviazi
U 2017 hodzie namieśnik načalnika Hienštaba Uzbrojenych sił Rasii Chalił Arsłanaŭ atrymaŭ zvańnie hienierał-pałkoŭnika. Praz dva hady jaho abvinavacili ŭ machlarstvie ŭ asabliva bujnym pamiery, a ŭ lutym 2020 hoda aryštavali supracoŭniki FSB. Nieŭzabavie pakazańni suprać Arsłanava daŭ inšy hienierał, Alaksandr Ahłoblin.
Ahłoblin raspavioŭ, što ŭ 2015 hodzie pa pratekcyi Arsłanava atrymaŭ pasadu načalnika 1-ha ŭpraŭleńnia suviazi Minabarony. Jakraz tady išła poŭnym chodam prahrama cyfravizacyi rasijskaha vojska, i Ahłobinu było nieabchodna šukać pastaŭščykoŭ techniki i damaŭlacca ab zavyšeńni koštu.
Tak, naprykład, machinacyi pry zakupkach maršrutyzataraŭ praz AT «Vajentelekam» mieli nacenku ŭ 20-25%. Pa takoj schiemie było vykradziena 1,6 młrd rubloŭ, Ahłoblin pryznaŭ svaju vinu i ŭ siaredzinie lutaha 2022 hoda atrymaŭ čatyry hady kałonii ahulnaha režymu.
Arsłanaŭ svaju vinu nie pryznaje, i jaho sprava da hetaha času razhladajecca. Pry hetym, pa viersii śledstva, zasnavanaj na pakazańniach Ahłoblina, asnoŭny ŭpor u afiory rabiŭsia na radyjostancyi novaha pakaleńnia «Azart», ceny na jakija zavyšalisia ŭdvaja.
Jašče ŭ pačatku 2022 hoda śledstva aceńvała škodu ad zakupak 60000 «Azartaŭ» u 6,7 młrd rubloŭ. Na pačatku maja Hienprakuratura nakiravała ŭ sud abvinavačańnie pa spravie Arsłanava. U spravie zastalisia epizody, źviazanyja z «Vajentelekamam», a voś mierkavanyja machinacyi z «Azartami» u jaho nie ŭvajšli.
Biez kateraŭ
Poźniaj vosieńniu 2019 hoda paŭnočnyja padraździaleńni Rashvardyi pryniali partyju śniehachodaŭ i kateraŭ. Apošnija pryznačalisia dla achovy arktyčnych partoŭ. Ale na pieršym ža bajavym dziažurstvie korpusy kateraŭ nie vytrymali marozu i tresnuli.
Fota: wrk.ru
U chodzie rasśledavańnia Śledčy kamitet vyjšaŭ na piaciarych supracoŭnikaŭ Rashvardyi, jakich zaraz abvinavačvajuć u atrymańni chabaru i kradziažy biudžetnych srodkaŭ. Inicyjataram afiory śledstva ličyć pałkoŭnika Šałvu Musielijani, jaki ŭ mai 2018 hoda zvolniŭsia z hałoŭnaha ŭpraŭleńnia pazaviedamasnaj achovy Rashvardyi, dzie adkazvaŭ u tym liku za baraćbu z kryminałam.
Schiema była prostaja: u žniŭni 2018 hoda na Adzinaj handlovaj placoŭcy byŭ apublikavany tender na zakupku śniehachodaŭ i kateraŭ. Košt tenderu zahadzia byŭ pavialičany na 10% mierkavanaha adkatu ‒ pra heta pakłapaciŭsia Siarhiej Varabjoŭ, jaki adkazvaje ŭ Rashvardyi za technałahičnuju palityku. Adzinym udzielnikam i pieramožcam tenderu staŭ kancern «Abaronnyja technałohii». Suma kantrakta skłała 376 młn rubloŭ. Uviesnu 2019 hoda Musielijani damoviŭsia z saŭładalnikam «Abaronnych technałohij» ab adkacie ŭ 30 młn rubloŭ. Z hetaj sumy, miarkuje śledstva, aficer atrymaŭ 19 młn rubloŭ.
Za hetyja hrošy rashvardziejcy, jakija prymali techniku, zakryli vočy na iaje niedachopy. Karpusy kateraŭ byli zrobleny z polietylenu drennaj jakaści, upeŭniena śledstva, i nie vytrymali vyprabavańniaŭ.
Škoda ad dziejańniaŭ rashvardziejcaŭ aceńvajuć u 262 młn rubloŭ. Musielijani abjaŭleny ŭ vyšuk.
