U zajavie Sinoda UPC MP śćviardžajecca:
«Zamiest jadnańnia naroda ŭ imknieńni da pieramohi i adnaŭleńni mirnaha žyćcia ŭ krainie razharajecca ŭnutrany, relihijny front. Tak, hrupaj narodnych deputataŭ Ukrainy, praz nadumanyja i zahadzia iłžyvyja abvinavačvańni byli padadzienyja na razhlad u Viarchoŭnuju Radu Ukrainy zakonaprajekty ab zabaronie dziejnaści našaj Carkvy.
Z sumam kanstatujem, što ŭsie hetyja fakty źjaŭlajucca nastupstvam pamyłkovaj relihijnaj palityki časoŭ prezidenctva Piatra Alaksiejeviča Parašenki i razburalnaj ideałohii tak zvanaj Pravasłaŭnaj Carkvy Ukrainy. Upeŭnienyja, što mienavita takaja dziejnaść papiaredniaj ułady i PCU stała adnoj z padstaŭ dla vajennaha ŭvarvańnia va Ukrainu».
Akramia taho, kiraŭnictva Carkvy adznačyła, što ŭsie prychody molacca za zachavańnie ŭkrainskaj dziaržaŭnaści i nastupleńnie miru, ale ŭ vyniku pieramovaŭ, a nie ŭzbrojenaha supraćstajańnia. Asobna jany padkreślili, što rasijskaje ŭvarvańnie va Ukrainu źjaŭlajecca hrachoŭnym.
U zajavie Sinoda havorycca, što zabarona dziejnaści UPC MP budzie «nacyjanalnym samahubstvam», bo, maŭlaŭ, miljony ŭkraincaŭ, jakija abaraniajuć Ukrainu, naležać mienavita da hetaj carkvy.
U najbližejšy čas kiraŭnik UPC MP mitrapalit Anufryj płanuje sklikać schody z udziełam śviataroŭ, manachaŭ i manachiniaŭ, a taksama śvieckich carkoŭnych dziejačaŭ, kab vyrašyć budučyniu Carkvy ŭ takich umovach. Sinod choča paźbiehnuć raskołaŭ i parušeńnia carkoŭnych kanonaŭ.
U kancy sakavika ŭ Viarchoŭnuju Radu Ukrainy ŭnieśli zakonaprajekt ab zabaronie dziejnaści Maskoŭskaha patryjarchata na terytoryi Ukrainy. Zakonaprajekt prapanuje zabaranić «dziejnaść Maskoŭskaha patryjarchata — Ruskaj pravasłaŭnaj carkvy i relihijnych arhanizacyj, jakija źjaŭlajucca častkaj Ruskaj pravasłaŭnaj carkvy, u tym liku Ukrainskaj pravasłaŭnaj carkvy».
Čytajcie taksama:
U Viarchoŭnuju Radu Ukrainy ŭnieśli zakonaprajekt ab zabaronie dziejnaści Maskoŭskaha patryjarchata na terytoryi Ukrainy
«Hrech Kaina». Jak Maskva straciła ciapier užo i ŭkrainskich pravasłaŭnych Maskoŭskaha patryjarchata
