Pačatak chvali dziaržaŭnaha teroru ŭ Biełarusi, jaki praciahvajecca dahetul, adznačyła zatrymańnie błohiera Uładzimira Niaronskaha 8 traŭnia 2020 hoda. Niaronski byŭ aŭtaram apazicyjnaha YouTube-kanała i byŭ asudžany da troch hadoŭ turemnaha źniavoleńnia.
Usiaho praź niekalki tydniaŭ paśla taho dvoje kandydataŭ u prezidenty: Siarhiej Cichanoŭski i Viktar Babaryka — byli taksama aryštavanyja. Paśla jany atrymali surovyja terminy — 18 i 14 hadoŭ adpaviedna.
Represii ŭ ličbach
Libereco praanalizavała ŭsie vypadki palityčnych źniavoleńniaŭ, zadakumientavanyja biełaruskim pravaabarončym centram «Viasna».
U adpaviednaści sa spravazdačaj, kolkaść palityčnych źniavolenych pavialičyłasia sa 187 čałaviek u 2020 hodzie da 1 225 čałaviek pa stanie na siońniašni dzień. 119 novych vypadkaŭ źjavilisia ŭžo za pieršyja čatyry miesiacy hetaha hoda. 87% zatrymanych — mužčyny.
Piaciora palitviaźniaŭ znachodziacca pad vartaj bolš za 600 dzion, pry hetym jany navat nie byli asudžanyja da jakoha-niebudź turemnaha źniavoleńnia.
Ahułam 30% zatrymanych usio jašče čakajuć prysudu, u toj čas jak 70% palityčnych viaźniaŭ byli asudžanyja da turemnych terminaŭ ad 9 miesiacaŭ da 20 hadoŭ. Sumarny termin turemnaha źniavoleńnia pa ŭsich prysudach składaje ašałamlalnyja 2 756 hadoŭ, što pieravyšaje adzin miljon dzion.
Na momant publikacyi hetaj spravazdačy (12 traŭnia) ni ŭ čym nie vinavatyja palitviaźni ŭžo praviali ahułam bolš za 400 000 dzion u turmie. Adzin ź ich — Mikita Załataroŭ, samy małady palitviazień u krainie. 12 traŭnia jon adznačyŭ svoj 18-y dzień naradžeńnia ŭ turmie. Załataroŭ byŭ aryštavany va ŭzroście 16 hadoŭ, chvareje na epilepsiju i byŭ asudžany da 5 hadoŭ kałonii dla niepaŭnaletnich.
Vital Zaradziej, najstarejšy palitviazień u Biełarusi, taksama praviadzie svoj 70-y dzień naradžeńnia 6 červienia ŭ źniavoleńni, paśla taho jak byŭ asudžany da dvuch hadoŭ turmy.
