Pilna sočać za siabrami niezaležnych prafsajuzaŭ
Na biełaruskich naftapierapracoŭčych zavodach uzmacniŭsia cisk na supracoŭnikaŭ. Bolš za ŭsio ŭvahi ciapier nadajuć nie tym, chto pazaletaś padpisvaŭsia za novyja vybary, a byłym siabram niezaležnych prafsajuzaŭ.
«Ciapier u pieršuju čarhu sočać za tymi, chto byŭ členam prafsajuza, a taksama za tymi supracoŭnikami, jakija raniej byli asudžanyja pa «narodnym» artykule 23.34, ale da hetaha času zastalisia pracavać na zavodzie. Hetym zajmajucca supracoŭniki adździeła ŭłasnaj biaśpieki, pracu jakich kuryruje KDB.
Paśla zatrymańnia kiraŭnikoŭ niezaležnych prafsajuzaŭ jany znoŭ stali bolš aktyŭnymi. Zabirajuć ludziej prosta z pracoŭnych miescaŭ», — kaža Alaksandr Sakałoŭ, pradstaŭnik «Rabočaha ruchu».
Pa słovach Sakałova, «padazronych» rabotnikaŭ zavodziać u asobny kabiniet, dzie ŭ ich praviarajuć telefony, a taksama dajuć padpisać fiktyŭny dakumient, dzie tyja abaviazvajucca nie ŭstupać i nie prymać udzieł u jakich-niebudź «ekstremisckich» arhanizacyjach.
Na pracoŭnym miescy možna razmaŭlać tolki pra pracu
«Ale jeść miery, jakija raspaŭsiudžvajucca na ŭsich supracoŭnikaŭ. Naprykład, im razdajuć «dakumienty», dzie treba aznajomicca z tym, što na pracoŭnym miescy nielha abmiarkoŭvać jakija-niebudź temy i pytańni, jakija nie datyčacca pracoŭnaha pracesu», — adznačaje surazmoŭca.
Taksama ŭ «Rabočym ruchu» paćvierdzili toj fakt, što na naftapierapracoŭčych pradpryjemstvach mocna źniziłasia zahruzka.
«Abjomy vytvorčaści skaracilisia bolš, čym na pałovu. Na kožnym NPZ jość pa dźvie AVT ustanoŭki — ciapier na kožnym ź ich pracuje tolki adna i to na minimalnaj mahutnaści.
Pieryjadyčna zapuskajuć katkrekinh i spadarožnyja ŭstanoŭki. Paśla vytvorčaści peŭnaha abjomu pradukcyi ich znoŭ spyniajuć, pakolki ŭ abstalavańnia jość peŭny minimum mahutnaści, na jakoj jano moža funkcyjanavać».
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Ułady bajacca strajkaŭ
Skaračeńnie pradukcyjnaści z-za sankcyj i adsutnaści rynku zbytu niepaźbiežna pryvodzić da źnižeńnia zarobkaŭ, što ŭ svaju čarhu pavyšaje niezadavolenaść siarod supracoŭnikaŭ. Na dumku Alaksandra Sakałova, aściarohi taho, što skaračeńnie zarobkaŭ moža pryvieści da strajkaŭ, i jość asnoŭnaj pryčynaj, čamu ŭłady ŭzialisia za niezaležnyja prafsajuzy i ich členaŭ.
«Całkam łahična, što ŭłady mienavita hetaha i bajacca. Arhanizavać i abviaścić strajk moža tolki prafsajuz. Praŭładnyja prafsajuzy rabić hetaha dakładna nie stanuć, tamu ŭłady ŭzmacnili represii ŭ dačynieńni da niezaležnych prafsajuzaŭ i ich členaŭ», — ličyć Sakałoŭ.
Čytajcie taksama:
Łukašenka padpisaŭ rasstrelnyja papraŭki za «zamach na teraryzm». Interpretacyja taho, što takoje «teraryzm», vielmi šyrokaja
U Breście adbyŭsia samy chutki sud nad «karahodnikami». Los dvaich abvinavačanych vyrašyli mienš čym za hadzinu
