Zakat nad Batumi
Što treba mieć, kab pierasiekčy miažu z Hruzijaj?
Kab prajści miažu, vam patrebnyja dźvie rečy:
- pašpart,
- PŁR-test, nie starejšy za 72 hadziny, abo siertyfikat ab vakcynacyi, navat rasijskaj vakcynaj.
Zapisacca na zdaču PŁR u Minsku možna, naprykład, tut, tut abo tut.
Jakija prablemy mohuć čakać na miažy z Hruzijaj?
Kali vy budziecie vyjazdžać praz Rasiju, vas čakaje apytańnie abo dopyt na baku Rasii, jaki zojmie ad ličanych chvilinaŭ da niekalkich hadzinaŭ u zaležnaści ad nastroju i źmieny. Niekatorych na suchaputnaj miažy dapytvajuć supracoŭniki, jakich miascovyja nazyvajuć «feesbešnikami». Taksama vas mohuć paprasić razbłakavać telefon i pakazać źmiest sacyjalnych sietak.
Na miažy z Hruzijaj vas taksama čakaje dahlad i, mahčyma, nievialiki dopyt. Vas zapytajucca, navošta vy prylacieli, ź jakoj metaj, dzie vy spyniciesia, mohuć pravieryć pašpart — i heta taksama zojmie čas.
Padobnaje apytańnie vas moža čakać i na inšych učastkach miažy z Hruzijaj, naprykład, z boku armianskich pamiežnikaŭ.
Taksama byvajuć dni, kali miažu Rasija-Hruzija začyniajuć praz prablemy na Vajenna-Hruzinskaj darozie.
1. Pramy pieralot ź Minska
Košt: 415-500 dalaraŭ.
Čas pajezdki: mienš za sutki.
Plusy: chutka.
Minusy: abmiežavanaja dazvolenaja kolkaść bahažu, davoli doraha, ciažka znajści kvitok na samalot.
Ź Minska ŭ Batumi jość pramyja rejsy. Na sajcie Biełavija možna nabyć kvitki tolki na kaniec lipienia pa canie 400-450 dalaraŭ. Jość jašče varyjant nabyć kvitok na samalot Minsk-Tbilisi pa toj ža canie, a paśla dabiracca da Batumi pa ziamli.
Kali vy prylacicie spačatku ŭ Tbilisi, to, kab dabracca, jość try tannyja varyjanty — abo mašrutka za 30-35 łary (10 dalaraŭ), abo aŭtobus za 36 łary (12 dalaraŭ), abo ciahnik za 25-60 łary ŭ zaležnaści ad kłasu absłuhoŭvańnia (8-20 dalaraŭ). Varyjanty nadziejnyja i zojmuć ad 5 da 7 hadzin.
Maršrutka apłočvajecca na miescy. Chodzić ź dźviuch łakacyj — centralnaha aŭtavakzała Tbiłsi abo sa stancyi mietro «Dzidube». Aŭtobusy taksama chodziać z «Dzidube», kvitki na ich tut. Kvitki na ciahnik zamaŭlajcie na sajcie hruzinskaj čyhunki.
Taksama ŭ Hruzii davoli tannaje taksi, tamu ŭnutry horada vy zdolejecie pieramiaščacca na im, kab nie raźbiracca z maršrutami. U Hruzii pracujuć Bolt i «Jandeks», ad borta nie siadajcie, bo košt tam u razy vyšejšy.
Z ulikam tranśfieru da aeraportaŭ košt uzraście jašče na sumu ad 6 da 30 dalaraŭ, u zaležnaści ad vidu transpartu.
2. Doŭhi, ale samy tanny i cikavy
Vid na hory z Vajenna-Hruzinskaj darohi padčas pierajezdu
Košt: 120-200 dalariaŭ u zaležnaści ad sposabu pieravozki.
Čas pajezdki: ad troch da čatyroch sutak.
Plusy: samy tanny maršrut, jaki daje mahčymaść pavandravać, paznajomicca ź ludźmi i atrymać cikavy dośvied. Taksama kolkaść bahažu faktyčna nieabmiežavanaja, kali vy zdolejecie jaho ciahnuć na sabie.
Minusy: samy doŭhi maršrut, jaki patrabuje vytrymki.
Vam daviadziecca dajechać da Maskvy aŭtobusam (40-45 rubloŭ) abo ciahnikom (80 rubloŭ). Daviadziecca taksama zapłacić za pierajezd unutry Maskvy ad 45 da 100 rasijskich rubloŭ za mietro (2-4 biełaruskija rubli).
Dalej treba znajści tranśfier da horada Uładzikaŭkaz. Heta abo ciahnik, abo paputčyki, abo samalot. Košt — ad 3000 da 5000 rasijskich rubloŭ.
Kali heta spadarožnaja mašyna, to najbolš nadziejny varyjant — šukać na jediem.rf. Mašynaj jechać kala sutak.
Kvitki na ciahnik varta nabyvać praz aficyjny sajt RČ (dastupny tolki ź Biełarusi i Rasii) abo praz aficyjny dadatak RČ dla Android abo iPhone. Uličvajcie, što RČ prymaje tolki rasijskija kartki abo kartku MIR. Taksama paśla kupli kvitka možna zamović sabie dastaŭku ježy prosta na pieron u horad Rastoŭ u mieniu «Dadatkovyja pasłuhi». Ciahnik idzie ad 36 da 37 hadzinaŭ i kaštuje ad 3500 rasijskich rubloŭ.
Kvitok na samalot varta šukać na Aviasales, bo pa Rasii lotaje proćma kampanij i chutka ŭ ich razabracca davoli ciažka. Samaloty kaštujuć ad 4500 rasijskich rubloŭ.
Taksama vam budzie patrebny PŁR, kali vy nie zrobicie jaho zahadzia. Va Uładzikaŭkazie ich robiać u adnym miescy, na vuł. Barbašova, 39 z 8.30 da 17.00. Vydača 4 razy na dień u 13, 15, 17 i 19 hadzin. Kaštuje jon tam usiaho 440 rasijskich rubloŭ (kala 7 dalaraŭ).
Paśla daviadziecca šukać tranśfier da Tbilisi abo adrazu da Batumi. Heta praściej znajści zahadzia praz telehram-čaty, da prykładu — hety abo hety. Lepš sabrać niekalki prapanoŭ pieravozčykaŭ i vybrać najbolš zručny i tanny varyjant.
Zaŭvažcie, što dalary na rubli dla apłaty tranśfiera ŭ Hruziju vyhadniej mianiać u Maskvie — bo kurs najaŭnaha dalara na 10 rasijskich rubloŭ vyšejšy za aficyjny.
Jak dajechać z Tbilisi da Batumi, my apisali ŭ pieršym punkcie.
3. Minsk-Armienija-Batumi
Vid na viačerni Batumi
Košt: 250-300 dalaraŭ.
Čas pajezdki: da dvuch sutak.
Plusy: davoli chutka i nie vielmi doraha.
Minusy: daviadziecca ŭzhadnić davoli šmat tranśfieraŭ i być uvažlivym pry vybary dataŭ.
Kampramisny varyjant — spačatku dabracca da Armienii samalotami ź pierasadkami (bo pramyja rejsy Biełavija ciapier vielmi darahija), abo lacieć tak praz Maskvu. Košt pieralotu kala 200 dalaraŭ, adšukać kvitki možna tut.
Dalej vaźmicie ciahnik Jerevan-Tbilisi na sajcie Paŭdniova-Kaŭkazskaj čyhunki. Jon budzie kaštavać kala 25 dalaraŭ. Uličvajcie, što ciahnik načny i chodzić raz na dva dni i heta treba ŭzhadnić z časam prylotu.
Paśla šukajcie tranśfier u Batumi — heta abo ciahnik, abo maršrutka, apisanyja ŭ pieršym punkcie.
4. Maršrutka Minsk-Batumi
Košt: 180-250 dalaraŭ (z ulikam dapłaty za mateli).
Čas pajezdki: troje sutak.
Plusy: prosty i niedarahi pierajezd.
Minusy: nie fakt, što vy niekudy źjedziecie, taksama heta davoli doŭha, a maršrutka — nie samy zručny vid transpartu.
Ź Minska da Batumi chodzić maršrutka. Kaštuje jana ad 180 da 220 dalaraŭ i idzie amal 4 sutak (ź piatnicy da paniadziełka). Načavać vam daviadziecca abo ŭ maršrutcy, abo ŭ prydarožnych matelach. Znajci ich možna ŭ telehram-čatach, da prykładu, tut abo tut.
Hałoŭny minus varyjanta — nienadziejnaść. Hetyja pajezdki arhanizujuć turystyčnyja apieratary, i jany zaklučajuć damovu tolki za dzień da vyjezdu. To-bok, vy možacie zahadzia zapłanavać adjezd, a ŭ apošni dzień vam skažuć pra admienu pajezdki.
5. Niepramyja pieraloty
Zakat nad Čornym moram, Hruzija
Košt: ad 600 dalaraŭ.
Čas pajezdki: mienš za sutki.
Plusy: chutka, nie treba «vyłoŭlivać» kvitki Biełavii.
Minusy: samy darahi varyjant.
Kali vy nie chočacie čakać, pakul źjavicca volny kvitok Biełavii, ale nie hatovyja da doŭhich pierajezdaŭ, to znajdzicie niepramy pieralot ź Minska. Pieralot da Batumi takim šlacham zojmie kala 11 hadzinaŭ i budzie kaštavać ad 600 dalaraŭ.
Jość i bolš składanyja za 300-400, ale jany zajmajuć da 3 sutak z ulikam doŭhich tranśfieraŭ i lacieć na ich niama vialikaha sensu.
