Pomnik Čapajevu staŭ susiedam inšaha hieroja Hramadzianskaj vajny Rasii ‒ Mikałaja Ščorsa. Jaho pomnik staić u skviery ŭžo daŭno.
Terytoryju vakoł biusta Čapajeva akulturvajuć. Tam užo źjavilisia łavački i śmietnicy — usio ŭ styli «military».
Kali i čamu prybrali Čapajeva?
U lutym 2019 hoda haradskija słužby źniali z pastamienta na vulicy Vasilka biust hieroja hramadzianskaj vajny ŭ Rasii Čapajeva. Pomnik abiacali adrestaŭravać da 75-hodździa Hrodzienskaj vobłaści.
Žychary horada aktyŭna abmiarkoŭvali los pomnika i mahčymyja jamu alternatyvy. Adna z prapanoŭ ‒ zamianić Čapajeva na pomnik paetu Michasiu Vasilku, imia jakoha nosić ciapier vulica. 31 sakavika 2019 hoda stała viadoma, što biust Čapajeva adpraviać u muziej. Haradskija ŭłady padtrymali prapanovu ab pieranosie pomnika.
Rasijskaje infarmacyjnaje ahienctva «Čyrvonaja Viasna» adpraviła zapyt u MZS RF. Dypłamaty ŭ krasaviku 2020 sustrelisia z pradstaŭnikami Hrodzienskaha abłvykankama. Tyja dali zrazumieć, što demantaž biusta Čapajeva nie źjaŭlajecca «baraćboj z savieckimi manumientami».
U žniŭni 2020 hoda ŭnučataja plamieńnica Čapajeva Maryna Čapajeva źviarnułasia da Łukašenki z prośbaj pieradać pomnik u Rasiju. Jana pisała, što biust Vasila Čapajeva «pa-varvarsku otbojnymi małatkami źnieśli, nibyta dla restaŭracyi pa patrabavańniu vašych nacyjanalistaŭ z «Małady front».
Paśla demantažu pomnik Čapajevu znachodziŭsia na adnym z pradpryjemstvaŭ ŽKH, u Hrodzienski historyka-archieałahičny muziej jaho tak i nie pieradali.
Ci byŭ kali niebudź Čapajeŭ u Hrodnie?
Čapajeŭ nikoli nie byŭ ni ŭ Hrodnie, ni ŭ Biełarusi. Pa adnoj ź viersij, jakuju raspaviadaŭ krajaznaŭca Viktar Sajapin, biust hieroja Hramadzianskaj vajny ŭ Rasii trapiŭ u Hrodna vypadkova: jaho pieradali «ŭ nahruzku» razam z budaŭničymi materyjałami z ukrainskaha kambinata.
U saviecki čas u Hrodnie była vulica Čapajeva, ale ŭ 1994 hodzie jaje pierajmienavali ŭ honar biełaruskaha paeta Michasia Vasilka, jaki žyŭ na joj. Pomnik Čapajevu pry tym zastavaŭsia na vulicy.
