Haradskija fantany z mahčymaściu nabrać pitnoj vady ŭ śpioku nadzvyčaj papularnyja. Fota: AP
Ahienctva papiaredziła, što ispancaŭ čakaje samaja mocnaja śpioka za mnohija hady.
40-hradusnaja haračynia była zafiksavanaja ŭ piatnicu ŭ horadzie Chaen na poŭdni Ispanii, a taksama i ŭ Sievilli.
Uletku takoj śpiakotaj ispancaŭ ciažka ździvić. U minułym žniŭni na poŭdni krainy tempieratura pavietra dasiahała 49°C. Adnak dla maja takoje nadvorje niezvyčajnaje. Pa słovach mietearołahaŭ, klimatyčnyja źmieny robiać padobnyja źjavy bolš častymi i ekstremalnymi.
Na hety raz niezvyčajnaja dla maja śpiakota abumoŭlenaja ciopłymi pavietranymi patokami z Paŭnočnaj Afryki, u vyniku siaredniaja tempieratura pavietra ŭ krainie akazałasia na 15 hradusaŭ vyšejšaj za zvyčajnuju dla hetaha miesiaca.
Najbolš haračaje nadvorje — na poŭdni krainy ŭ Andałusii, Ekstremadury na paŭdniovym uschodzie, u Madrydzie i rajonie Kastylija-Ła-Manča (administracyjny centr Taleda) u centralnaj častcy krainy, a taksama ŭ Arahonie na paŭnočnym uschodzie.
Nočy ŭ Ispanii ciapier taksama niezvyčajna ciopłyja — tempieratura pavietra nie apuskajecca nižej za 25°C u šerahu rajonaŭ krainy.
Navukoŭcy ličać, što praz hłabalnaje paciapleńnie haračaje nadvorje letam stanie bolš častaj źjavaj u śviecie i budzie naziracca ŭ bolšaj častcy rehijonaŭ płaniety.
Tym časam ułady Ispanii pryniali pastanovu adkryć krainu dla ŭsich padarožnikaŭ pry najaŭnaści PŁR-testa na kavid, paviedamlaje «Interfaks» sa spasyłkaj na partał La Informacion.
«Z 21 maja hramadzianie krain, što nie ŭvachodziać u Jeŭrasajuz, ale jakija zajazdžajuć u Ispaniju pa mory abo pavietranaj avijacyjaj, mohuć pradjaŭlać pa prybyćci tolki daviedku z PŁR abo antyhien-testam, zroblenymi nie raniej, čym za 72 i 24 hadziny da pajezdki adpaviedna», — piša vydańnie.
Akramia taho, turysty, jakija prybyvajuć moram, a taksama vandroŭniki ź ličbavym siertyfikatam JEZ, bolš nie pavinny zapaŭniać formu sanitarnaha kantrolu.
Pa słovach ministra pramysłovaści, handlu i turyzmu Ispanii Maryi Rejes Marota, popyt na pajezdki ŭ krainu ŭžo ciapier blizki da taho, što naziraŭsia da pačatku pandemii kavidu, a dalejšyja pasłableńni tolki stymulujuć napłyŭ turystaŭ.
