Piepa Hvardyjoła staŭ pieršym niebrytanskim trenieram, jaki čatyry razy tryŭmfavaŭ u APŁ. Fota: bestcarsbrands.com
Anhlija
Pierad apošnim turam usiaho adzin bał adździalaŭ lidara APŁ, «Mančester Sici», ad hałoŭnaha kankurenta, «Livierpula». U supiernikach mankunijancaŭ značyłasia ścipłaja «Astan Viła» — i ekśpierty čakali, što samy darahi skład śvietu lehka znojdzie ŭ svaich šychtach haleadora, kab zamacavać pieravahu. Adnak za 20 chvilin da zakančeńnia sustrečy favaryt «pałaŭ» 0:2 i ryzykavaŭ zastacca ni z čym, bo paralelna «Livierpul» rabiŭ ŭsio, kab skaryć «Vułvierchemptan».
Hranda ŭratavała sieryja zamien, ź jakich asabliva vyłučym aktvizacyju Iłkaja Hiundahana. Jaho aktyŭnaść dapamahła «Sici» adznačycca trojčy (!) ciaham piaci chvilin dy ŭratavacca ŭ situacyi, što vyhladała biezvychodnaj. «Kambek» dapamoh «Mančesteru» nie tolki abaranić status najmacniejšaha ŭ krainie, ale i zrabić nastaŭnika Piepa Hvardyjołu pieršym niebrytanskim trenieram, jaki čatyry razy tryumfavaŭ u APŁ.
Što da «Livierpula», to viktoryja 3:1 ničoha ŭ jaho srebranym stanoviščy nie źmianiła. Chiba što paciešyła samalubstva: vynikovyja 92 punkty — fantastyčny vynik dla sučasnaha ŭzroŭniu kankurencyi ŭ Anhlii. Kampiensavać ža niehatyŭ ad niaŭdačy ŭ APŁ «čyrvonyja» zmohuć užo na tydni, kali ŭ finale Lihi čempijonaŭ paspračajucca za samy prestyžny mižnarodny trafiej dla jeŭrapiejskich kłubaŭ.
Hiermanija
Budzionnaje čempijonstva «Bavaryi» azmročyŭ razryŭ adnosin z kalektyvam Robierta Levandoŭskaha. Najlepšy forvard śvietu ŭ svaje 33 tak i nie staŭ vaładarom «Załatoha miača». Dyj novaha kantrakta z palapšeńniem finansavych umoŭ ad miunchiencaŭ nie dačakaŭ. Tamu adrazu paśla tryumfu ŭ Bundeślizie palak zapatrabavaŭ tranśfier — cikavaść da jaho asoby z boku katałonskaj «Barsiełony» daŭno viadomaja na ŭvieś śviet.
Kłubnyja bosy pakul marudziać, bo znajści zamienu top-majstru składana. Dy i hrošaj niemcy płanujuć atrymać bolš, čym 35 młn jeŭra. Na ich baku hod pa kantrakcie, jaki Levandoŭski jašče pavinien adpracavać. Adnak ci možna prymusić Robierta vykładacca na sto adsotkaŭ, kali jon zhubić impet da pracy? Dy i jak potym «Bavaryi» žyć ź plamaj pryhonu na imidžy, što abaviazkova sapsuje biezdakornuju reputacyju kłuba? Ad adkazaŭ na hetaje pytańnie napramki zaležyć efiektyŭnaść «rekordmajstra», a taksama atmaśfiera ŭ raspranalni nastupnym siezonam.
Cikava, što letam zhubić zornaha forvarda i asnoŭny kankurent Miunchiena. Dortmundskaja «Barusija», jakaja finišavała druhoj, za 75 młn jeŭra adpuściła ŭ «Mančester Sici» vunderkinda-haleadora Erlinha Chołanda. Tym samym nie tolki surjozna skaraciła ŭłasny atakujučy patencyjał, ale i źniziła vizualnuju pryvabnaść Bundeślihi jak pieršynstva. Bo mienavita na takich hienijach, jak Levandoŭski dy Chołand, šmat u čym trymalisia TB-rejtynhi turniraŭ.
Francyja
Toje, što «Pary Sen-Žermen» tradycyjna pieramahaje ŭ čempijanacie, usprymajecca jak aksijoma z časoŭ, kali kłub nabyli inviestary z Kataru. A voś pierapadpisańnie Kilijana Mbape — heta ŭžo sapraŭdny dokaz pieraŭtvareńnia «miecha z hrašyma» ŭ supierkłub. Palavańnie na forvarda ceły hod vieŭ sam madrydski «Reał», jaki statusam brenda, historyjaj pośpiechaŭ dy finansavymi prapanovami zvyčajna biŭ usie kazyry kankurentaŭ ŭ tranśfiernych sprečkach. Adnak najlepšy małady forvard śvietu stereatyp złamaŭ, admoviŭšy ispancam.
Chtości skaža, što Mbape elemientarna pradaŭsia, bo zarobak 50 młn jeŭra ŭ hod plus 130 młn u jakaści bonusaŭ pieravažyŭ usie karjernyja vykliki kštałtu sproby siabie ŭ zamiežnym pieršynstvie. Adnak Kilijan razam z hanararam uziaŭ na siabie abaviazak pieratvarycca ŭ fłahmana prajekta dy pryvieści kamandu da pieramohi ŭ Lizie čempijonaŭ. I heta misija, jakuju jašče nichto i nikoli ŭ Lizie adzin nie vykonvaŭ. Tamu pośpiech Mbape, što razam z kantraktam prydbaŭ prava navat skład PSŽ farmiravać, budzie aznačać pačatak zusim novaj ery ŭ historyi suśvietnaha futboła.
Italija
Ciaham 11 siezonaŭ «Miłan» nie moh zavajavać «skudeta» — i ŭ hetym hodzie asnoŭnym pretendentam na tytuł nie nazyvaŭsia. Adnak Złatan Ibrahimavič u čarhovy raz vykraśliŭ słova «niemahčyma» z futbolnych vakabularaŭ. U svaje 40 hod forvard ciaham čempijanatu adznačyŭsia vosiem razoŭ dy zrabiŭ try vynikovyja pieradačy, čym dapamoh «čyrvona-čornym» apiaredzić i «Juvientus», i «Inter», i «Romu» z «Napali».
Na ŭznaharodžańnie lehiendarny švied vyjšaŭ z butelkaj šampanskaha dy siharaj, bo moh sabie takoje dazvolić — załaty miedal staŭ 12-m (!) u jaho prafiesijnaj karjery pry ahulnych 32 trafiejach.
Dla paraŭnańnia: hałoŭny trenier «Miłana» Stefana Pjoli, niahledziačy na 23 siezony prafiesijnaha kiravańnia kłubami, upieršyniu damohsia niejkaj vartaj uvahi ŭznaharody. I tamu nie vielmi dobra viedaŭ, jak ź miedalem abychodzicca — padčas śviatkavańnia čempijonstva załatuju blambu niechta skraŭ. Kiraŭnictva lihi, praŭda, paabiacała chucieńka zrabić kopiju dy paŭtorna paviesić jaje na šyju tryumfataru.
Adnak trenieru treba karektavać pavodziny — mienavita ź jaho novaja hienieracyja hulcoŭ biare prykład. A junych futbalistaŭ u składzie «rosanery» bolš čym dastatkova. Kłub staŭ samym maładym čempijonam Italii z 1994 hoda — siaredni viek vykanaŭcaŭ skłaŭ 26 hadoŭ.
Ispanija
Karła Ančełoci ŭ pieršy hod paśla viartańnia da rula «Reała» adrazu vyvieŭ padnačalenych u čempijony. Da taho ž sam kančatkova pieratvaryŭsia ŭ čałavieka-lehiendu: nichto raniej usie piać topavych jeŭrapiejskich pieršynstvaŭ nie skaraŭ. Italjaniec zamknuŭ koła — i płanuje upryhožyć jaho załatym naniasieńniem za košt tryumfu ŭ Lizie čempijonaŭ na tydni.
Zapomniłasia i «Barsiełona», chaj sabie finišavała tolki druhoj. Chavi Ernandes, pryznačany hałoŭnym trenieram pa zimie, nie prosta ŭźniaŭ katałoncaŭ z tabličnych hłybiń (zvolnieny Ronald Kuman pakinuŭ kalektyŭ na dziaviataj pazicyi), ale i pryščapiŭ im pryvabny kambinacyjny styl. Z ulikam finansavych prablem i dysbałansu ŭ składzie «błaŭhrana» skaknuła vyšej za hałavu.
A voś «Atletyka» rasčaravaŭ. Kamanda Dyjeha Simieone biazvolna raźvitałasia ź Lihaj čempijonaŭ, nie vytrymała temp «Reała» pa nabory punktaŭ u Ła Lizie dy pravalilisia u Kubku. Jak vynik, samy darahi trenier kantynientu navat łakalnymi pośpiechami pachvalicca nie moža. Adnak kredytu davieru arhienciniec nie zhubiŭ, a tamu pasprabuje ŭ novym siezonie viarnuć Madrydu vielič, da jakoj sam fanaŭ i pryvučyŭ.
