Illa Novikaŭ

Illa Novikaŭ

«Naša Niva» źviarnułasia da jaho, kab pahavaryć pra toje, što moža čakać paranienych bajcoŭ słavutaha pałka» Azoŭ», jakich rasijskija vojski vyvieźli na aŭtobusach na padkantrolnyja Rasii terytoryi. U RF prakuratura prosić pryznać połk «Azoŭ» terarystyčnaj arhanizacyjaj, Viarchoŭny sud razhledzić spravu 26 maja. Ale dla čaho heta budzie zroblena? I što tady budzie z bajcami «Azova»?

«Toje, što adbyvajecca na «Azoŭstali», heta nie evakuacyja — ludziej prosta biaruć u pałon, — tłumačyć Novikaŭ. — Pryčym, navat heta budzie nie zusim dakładnaj farmuloŭkaj.

Ludziej biaruć u pałon z punktu hledžańnia taho, što Rasija abaviazanaja rabić, ale, pakolki Rasija nie prytrymlivajecca kanviencyjnaha prava z nahody abychodžańnia z pałonnymi, to, kali vas cikavić sutnaść, a nie nazva, skažu tak: ludziej z «Azoŭstali» prosta biaruć u zakładniki. Bieź jakich-niebudź harantyj».

Ale ŭ Rasii ŭžo abviaścili, što «Azoŭ» u chutkim časie pryznajuć terarystyčnaj arhanizacyjaj. Što tady budzie z bajcami? Ich buduć pakazalna sudzić?

«Vy tak kažacie, niby ŭsio budzie adbyvacca ŭ adpaviednaści z zakonam. Rasija prosta atrymała hetych ludziej u svajo rasparadžeńnie. Adzin sa sposabaŭ, jak ich mohuć vykarystoŭvać, akramia taho, što buduć prosta tarhavacca i mianiać na kahości, — heta ładzić pakazalnyja sudy. Dla hetaha naohuł nie maje značeńnia, ci buduć ich kimści pryznavać abo mianiać zakon.

Mohuć choć zajavić, što sałdaty dziaciej jeli na «Azoŭstali» — usio ŭ roŭnaj stupieni lohka projdzie praz rasijski sud, — kaža Novikaŭ. — Tamu mnie vielmi nie padabajecca, kali pra hetuju situacyju kažuć tak, niby ŭ joj jość niejkaje pravavoje vymiareńnie. U joj pravavoha vymiareńnia paprostu niama. Pastanovačny sud — heta nie pravavoje vymiareńnie.

Adroźnieńnie ad papiarednich hadoŭ u tym, što, z adnaho boku, Rasija ciapier mienš adčuvalnaja da mižnarodnaha cisku: naŭrad ci sankcyi praz adzin praces prykmietna pavialičacca na fonie taho, jak jany i tak pavialičvajucca z kožnym tydniem praz vajnu.

Tamu kali taki sud i praviaduć, to tolki ŭ tym vypadku, kali nie prajhrajuć hetuju vajnu kančatkova za toj čas, jaki im patrabujecca na padrychtoŭku pracesu. I heta budzie taki sud… dla ŭnutranaha karystańnia. Jašče adzin sud, jakich u Rasii šmat i jaki nikomu, akramia «Pieršaha kanała», u jakaści suda nie cikavy».

«Ja suprać taho, kab pra sud nad «Azovam» (kali jon adbudziecca) havaryli, jak pra štości, što možna pierakłaści na anhlijskuju słovam trial. Kali vy jaho nazaviacie tak — značyć prosta hulajecie ŭ adnoj źviazcy z Sałaŭjovym. Tak nielha.

Možna nazvać hety sud show trial, kangaroo court (anhlijskija idyjomy, jakija aznačajuć parodyju na pravasudździe, niesumlenny sud, pryhavor jakoha pradvyznačany zahadzia.«NN»). Ale heta nie sud. Tamu što rašeńnie hetaha suda budzie napisanaje zahadzia».

Taksama Illa Novikaŭ paprasiŭ nie ŭsprymać jaho słovy, jak kamientaryj rasijskaha jurysta. Jon vykazvajecca jak ukrainiec, jaki ličyć, što azoŭcaŭ uratujuć tolki pieramohi Ukrainy na froncie.

«Ja baču taki šlach. Kali chtości bačyć inšy, i viedaje, jak ich abaraniać u rasijskim sudzie, kab stała lepš, a nie horš, što ž, okiej, chaj sprabuje.

Kali vašy čytačy ŭbačać moj kamientaryj jak jurysta, to mohuć padumać, što hetaja historyja pra prava, kali ja juryst. I akažacca, što my z vami ich padmanuli».

Dla čaho tady naohuł hetaje pryznańnie «Azova» terarystyčnaj arhanizacyjaj?

«Ludziam, jakija zajmajucca jurydyčnaj absłuhaj Pucina, taksama treba niečym siabie zaniać. I siońnia, kali ty zajmaješsia čymści, što maje dačynieńnie da vajny, ty bolšy małajčyna, čym toj, chto zajmajecca kišennymi kradziažami, — tłumačyć Illa Novikaŭ. —

Viarchoŭny sud zrobić svaju pracu, prakuror zrobić svaju pracu, deputaty niejak tam prahałasujuć — ludzi pry spravie.

Kazać, što los kankretnaha azoŭca budzie zaležać ad taho, ci pryznaje jaho Rasija terarystam, niemahčyma. Jaho los budzie zaležać ad taho, jak pojdzie vajna i ad taho, što atrymajecca ź pieramovami pa vynikach hetaj vajny.

A kazać pra dypłamatyju, pravasudździe, humanitarnaje vymiareńnie — heta, na žal, nie vyjście. I sami azoŭcy razumiejuć heta lepš za nas z vami».

Ale ci mahčyma, što «Azoŭ» pryznajuć terarystami, kab vyklučyć mahčymaść abmienu ich jak vajennapałonnych?

«A navošta tak składana? Usio praściej: nie zachacieli, nu i nie pamianiali.

Vy dumajecie, Pucin stavicca da ludziej, zychodziačy z taho, što zakon kaža? Što kali zakon zabaraniaje, to ich nie buduć mianiać?

U minułyja hady da Pucina pastajanna chadzili roznyja deputacyi: prasili adpuścić Siancova, Saŭčanka, Chadarkoŭskaha i hetak dalej.

Ciapier da jaho nichto chadzić nie budzie, kaštoŭny dośvied Makrona pakazaŭ, što z Pucinym nie treba ni pra što havaryć. Va ŭsiakim vypadku, ja spadziavajusia, što ciapier takich chadakoŭ nie budzie. Mohuć znajścisia i niejkija durni, jakija pojduć. Ale tady zakon prymuć tolki dziela taho, kab hetym durniam Pucin adkazaŭ: «Nie, voś u nas taki zakon, deputaty pryniali, ja nie mahu paŭpłyvać»?

Abmien azoŭcaŭ zaležyć vyklučna ad situacyi na froncie i dobraj voli Pucina. I čym horš dla Pucina budzie składvacca situacyja na froncie, tym bolš u jaho budzie dobraj voli. A moža i naohuł, heta budzie ŭžo nie jon», — adznačaje Novikaŭ.

Azoŭcy, padkreślivaje Novikaŭ, — «zakładniki, ad taho asudziać ich ci nie, ničoha nie źmienicca, jany tak i zastanucca zakładnikami. Jany nie padazravanyja, nie abvinavačanyja — jany zakładniki. Ich buduć trymać pad zamkom, mahčyma, što ź ich buduć ździekavacca. Ale heta nijak nie budzie źviazana ni ź jakimi rasijskimi zakonami», — kaža juryst.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?