Pra vyzvaleńnie pieršym 23 maja paviedamiŭ načalnik pamiežnaj zastavy «Vostraŭ Źmiainy» Bahdan Hocki ŭ efiry nacyjanalnaha telemarafona.
Hocki skazaŭ, što dostup da radyjostancyi na vostravie mieli tolki pamiežniki. Rasijanie ž, jakija vystavili patrabavańnie abaroncam Źmiainaha, prapanoŭvali im pracu, vialikija zarobki i stabilnaść. Ale tyja admovilisia.
«U adnaho z vajskoŭcaŭ łopnuła ciarpieńnie i jon pakazaŭ napramak karablu. Heta moj padnačaleny. Jon znachodziŭsia paŭtara miesiacy ŭ pałonie, ciapier na svabodzie», — zajaviŭ Hocki.
Raniej aŭtarstva hetaj frazy ŚMI pamyłkova prypisvali marskamu piechacincu Ramanu Hrybavu. I choć Dziaržaŭnaja pamiežnaja słužba Ukrainy ad pačatku adznačała, što rasijanam adkazaŭ ich padnačaleny, raspaŭsiudžany mif dziaržaŭnyja orhany nie śpiašalisia raźvienčvać, a časam i sami spryjali jaho raspaŭsiudžvańniu.
U razmovie z «Bi-bi-si» śpikier Dziaržaŭnaj pamiežnaj słužby Andrej Dziemčanka patłumačyŭ situacyju tym, što ŭ pałonie zastavałasia šmat ludziej, u tym liku pamiežnikaŭ. Tamu niejkija piarečańni abo paćvierdžańni aŭtarstva frazy mahli im naškodzić.
«Kali kazać pra Ramana Hrybava, jakoha ličyli aŭtaram frazy, to heta była peŭnaja apieracyja prykryćcia dla tych, chto zastavaŭsia», — zapeŭniŭ Dziemčanka. «My śviadoma nie raskryvali imia aŭtara frazy, pakolki heta mahło paškodzić čałavieku ŭ momant znachodžańnia ŭ pałonie. Ciapier jon užo vyzvaleny. Adnak praz faktary, źviazanyja ź biaśpiekaj, my nazaviom jahonuju asobu paźniej», — dadaŭ jon. I zapeŭniŭ, što na hety raz heta nie «apieracyja prykryćcia».
Nahadajem pieradhistoryju hetaha pytańnia. 24 lutaha ŭkrainskija ŭłady paviedamili, što rasijskija vojski zachapili ŭkrainski vostraŭ Źmiainy ŭ Čornym mory, u vyniku čaho zahinuła 13 pamiežnikaŭ. Da vostrava padyšli dva rasijskija vajennyja karabli, krejsier «Maskva» i patrulny karviet «Vasilij Bykaŭ», i prapanavali bajcam Izmailskaha pamiežnaha atrada, jakija byli raźmieščanyja na vostravie, zdacca. Jany admovilisia, adkazaŭšy: «Ruski vajskovy karabiel, idzi na ***».
Niejki čas ličyłasia, što ŭsie abaroncy vostrava Źmiainy zahinuli, pra heta ŭ adnym z vystupleńniaŭ skazaŭ navat sam prezident Ukrainy Uładzimir Zialenski. Ale praź niekalki dzion vyśvietliłasia, što nasamreč vajskoŭcy patrapili ŭ pałon.
A fraza, jakoj adzin z abaroncaŭ Źmiainaha adkazaŭ na prapanovu rasijan zdacca dobraachvotna, pajšła ŭ narod i jaje ciapier viedajuć nie tolki va Ukrainie, ale taksama i daloka za jaje miežami. Jana adkryta ci zavualavana prysutničaje na mnohich art-abjektach u roznych kutkach śvietu, a «Ukrpošta» navat raspracavała tematyčnyja paštovyja marki.
Cikava pry hetym, što prezientacyja pieršaj marki na hetuju temu praktyčna supała z hibiellu fłahmana rasijskaha Čarnamorskaha fłota krejsiera «Maskva», jaki ź vialikaj vierahodnaściu i byŭ tym samym vajskovym karablom ź lehiendarnaj frazy.
Čytajcie taksama:
«Ukrpošta» prezientavała novuju marku ź sieryi pra ruski vajskovy karabiel
Na kijeŭskim Hałoŭpaštamcie vystraiłasia vialikaja čarha pa marku z rasijskim vajskovym karablom FOTAFAKT
Z rasijskaha pałonu viarnuŭsia aŭtar miema «Ruski vajskovy karabiel, idzi na***». Zusim ścipły chłopiec
