Čaściej za ŭsio ŭ našaj krainie pradajuć abjekty hramadskaha charčavańnia, sałony pryhažości i stancyi techničnaha absłuhoŭvańnia aŭtamabilaŭ. Ale siarod inšaha sustrakajucca i davoli ekzatyčnyja prapanovy.
Tannaja elektryčnaść dla majninhu kryptavaluty
U vioscy Prylepy Smalavickaha rajona zdajecca ŭ arendu hatovy biznes u vyhladzie profilnaha pamiaškańnia, pryznačanaha pad majninh-hatel (pamiaškańnie dla zdabyčy kryptavaluty), data-centr, sierviernuju zału.
«Nizkija taryfy na elektraenierhiju, sučasnaja sihnalizacyja, jakaja adpaviadaje ŭsim patrabavańniam dla hetaha pamiaškańnia. Novyja KTP mahutnaść 630 i 160 KVt, videanazirańnie, vysakachutkasny internet», — paznačana ŭ apisańni da abjekta.
Pryznačeńnie pamiaškańnia — administracyjny centr majninhu i dyjahnostyki kampjutarna-elektronnaj techniki.
Košt arendy — 2600 dalaraŭ za miesiac.
Vytvorčaść śmietnic z «lidzirujučaj pazicyjaj na rynku»
U Babrujsku za 70 000$ pradajecca biznes pa vytvorčaści śmietnic. Pradpryjemstva pracuje ŭžo čatyry hady. Štat naličvaje 12 čałaviek. Ciapierašni ŭłaśnik abiacaje, što ŭžo praz hod patračanyja na kuplu biznesu hrošy viernucca.
«Śpiecyjalizujemsia na pastaŭkach mietaličnych kantejnieraŭ i bunkieraŭ. U hetym siehmiencie zajmajem lidzirujučuju pazicyju na rynku. Biznes dziejny i prybytkovy, całkam abstalavany i adładžany. Majecca patencyjał dla dalejšaha raźvićcia», — zavablivajuć u apisańni.
Zbor sasnovaj žyvicy i łožki dla piersanału
Na terytoryi Minskaha rajona za amal sto tysiač dalaraŭ pradajecca vytvorčaść pa zbory sasnovaj žyvicy. Zajaŭleny čas akupnaści — 12-14 miesiacaŭ.
U aktyvie pradpryjemstva značycca lasny fond 600 Ha (plus rezierv 400 Ha), 205 tysiač štuk pryjomnaha abstalavańnia žyvicy, piać aŭtamabilaŭ UAZ, adzin pryčep da UAZa i 4 lehkavyja aŭtamabili.
Na pradpryjemstvie arhanizavanaje pražyvańnie rabočaha piersanału, tamu, aproč vyšej pieraličanaha, za 98000$ novy haspadar biznesu atrymaje 12 łožkaŭ, 12 matracaŭ, 3 bulerjany (pieč) dla troch bytavych vahonaŭ, 2 bienzahienieratary, chaładzilnik, 2 televizary, 3 hazavyja plity i h.d.
Seks-šop: Pryčyna prodažu — pierajezd u inšuju krainu
Za 16 tysiač dalaraŭ pradajecca internet seks-šop, jaki pracuje z 2018 hoda.
«Pradajecca paśpiachovy seks-šop ź biznes-płanam na bližejšy hod. U kramy biezdakornaja reputacyja siarod klijentaŭ (nie było ni vodnaha drennaha vodhuku za ŭvieś čas pracy, a ŭsie adzinkavyja niehatyŭnyja momanty zaŭsiody vyrašalisia adrazu ž z poŭnym zadavalnieńniem klijenta). Dziakujučy hetamu, krama maje vialikuju zvarotnaść klijentaŭ», — havorycca ŭ apisańni.
Aproč samoha sajta, novy ŭłaśnik atrymaje naładžanuju kampaniju ŭ Google Ads, akaŭnty ŭ sacyjalnych sietkach, bazu pastaŭščykoŭ i navat supravadžeńnie pracy ciaham pieršych troch miesiacaŭ.
Pradaviec śćviardžaje, što pry zachavańni tempu pracy termin akupnaści kramy składzie paŭtara hoda.
Zajaŭlenaja pryčyna prodažu kramy — pierajezd uładalnika ŭ inšuju krainu na PMŽ.
Vytvorčaść instrumientaŭ, jakaja pracuje z savieckich časoŭ
Za 150 tysiač rubloŭ (kala 60000$) pradajecca pradpryjemstva pa vytvorčaści abraziŭnaha i mietałareznaha zvyšćviordaha instrumienta. Vytvorčaść naładžanaja jašče ŭ časy SSSR.
«Pradajecca poŭny kamplekt abstalavańnia dla vyrabu abraziŭnaha (kruhi, hałoŭki, bruski) i mietałareznaha instrumientu (biez budynka). Vytvorčaść isnuje 32 hady. Klijentami źjaŭlajucca viadučyja zavody respubliki (MTZ, BMZ, BiełAZ, MAZ i inšyja) i Rasii. Usiaho bolš za 100 spažyŭcoŭ», — pišuć ŭ abjavie.
Detejlinh-centr u Minsku
Za 600 tysiač rubloŭ (kala 243 tysiač dalaraŭ) u Minsku pradajecca detejlinh-centr (tam akazvajucca pasłuhi poŭnaha dohladu aŭto).
«Pradajecca sučasnaja detejlinh-studyja ŭ Minsku z usim abstalavańniem i tavarnym znakam. Pamiaškańnie abstalavanaje i śpiecyjalizavanaje pad akazańnie pasłuh pa detejlinhu. Majecca istotny zapas chimii», — havorycca ŭ apisańni.
Pamiaškańnie ŭ košt biznesu nie ŭvachodzić. 537 m² znachodziacca ŭ arendzie. Samo pradpryjemstva zasnavanaje ŭ 2020 hodzie. Pra terminy akupnaści infarmacyja nie paznačanaja.
Tajamničaja burhiernaja
Z bolš zvykłaha ŭ Minsku pradajuć restaran-burhiernuju za 350000$. Dakładnaje miescaznachodžańnie, nazvu ŭstanovy i fota interjeru pradaviec chavaje ŭ tajamnicy.
Paśla apisańnia ŭsich pieravah ustanovy, jakaja znachodzicca ŭ «vielmi prachadnoj łakacyi», pradaviec dadaje, što nieabchodnaja finansavaja infarmacyja, a taksama inšyja źviestki pra biznes paviedamlajucca tolki pa zapycie.
Restaran, «jaki pracuje pieršy hod i tolki nabiraje abaroty»
U dva razy tańniej za tajamničuju staličnuju burhiernuju pradajecca restaran u centry Lidy na sto pasadačnych miescaŭ.
«Viadomaje i papularnaje miesca ŭ horadzie, naładžanaja klijenckaja baza, pastajanny stabilny dachod», — rekłamujuć svaju ŭstanovu ciapierašnija haspadary restarana, vystaŭlenaha na prodaž za 170 tysiač dalaraŭ.
«Restaran pracuje 3 dni na tydzień (piatnica-niadziela), navat pry hetaj minimalnaj zahružanaści štomiesiačny prybytak składaje 15 tysiač rubloŭ. Pry hetym restaran pracuje pieršy hod i tolki nabiraje svaje abaroty», — adznačajuć haspadary.
