Sustreča na vajskovaj bazie «Ramštajn» adnosna vajennaj padtrymki Ukrainy
U zachodniaj ekśpiertnaj i palityčnaj supolnaści nabiraje siłu chvala abmierkavańniaŭ, što Ukrainie varta było b «prycišyć ambicyi» i sieści za stoł pieramovaŭ z RF. I kali dzie-nidzie ŭ hetych dyskusijach prykmietna tyrčać vušy rasijskich łabistaŭ, to mierkavańnie eks-dziaržsakratara ZŠA Hienry Kisindžera niekatoryja analityki ličać choć i sprečnym, ale dosyć važkim.
Nakolki vierahodna, što ZŠA i Jeŭropa prysłuchajucca da razmoŭ ab terytaryjalnych sastupkach i prytarmoziać pastaŭki ŭzbrajeńniaŭ va Ukrainu, schilajučy jaje da «błahoha miru»? Ci antypucinskaja kaalicyja dastatkova mocnaja, kab ihnaravać ultymatumy Rasii i nie vieścisia na šantaž?
— Kisindžer — jon, viadoma, lehiendarnaja fihura, — adznačaje Alaksandr Frydman, — ale pierabolšvać jahony ŭpłyŭ usio-taki nie varta. Pohlady, jakija jon na praciahu vielizarnaj kolkaści času vykazvaje, nikoli nie byli tajamnicaj. Jon i raniej, kali nie pamylajusia, vykazvaŭsia nakont Kryma, i razhladaje Rasiju jak faktar jeŭrapiejskaj stabilnaści, heta taksama ŭsim viadoma.
Heta značyć, ničoha pryncypova novaha Kisindžer nie skazaŭ. Akramia taho, Kisindžer zaŭsiody byŭ blizki ŭ Amierycy da Respublikanskaj partyi, a ciapier u ZŠA va ŭładzie demakratyčnaja administracyja.
Jość šmat inšych palitykaŭ, čyje vykazvańni adlustroŭvajuć mierkavańnie administracyi Bajdena, a vykazvańni Kisindžera ŭsio ž taki adlustroŭvajuć mierkavańnie samoha Kisindžera, nie bolš.
Kali kazać pra Jeŭropu — tak, časta čujucca razmovy ab tym, što nieabchodna spynić hetuju vajnu. Ale niama surjoznych jeŭrapiejskich palitykaŭ, hatovych adkryta skazać, kab Ukraina sastupiła svaje terytoryi. Tamu što jany viedajuć, što Ukraina heta adchilaje, što hetaja pazicyja nieprymalnaja i na taki mir albo pieramirje, jak zaŭhodna heta možna nazyvać, Ukraina nie pojdzie.
Naohuł, kali abmiarkoŭvajuć hetuju temu, to niama hałoŭnaha: razumieńnia, jak heta ŭsio pavinna vyhladać, pra jakija mienavita terytoryi moža iści havorka, jak heta moža być zamacavana, i inšaje, i inšaje.
Bolš taho, adznačaje ekśpiert, litaralna ŭčora Ołaf Šolc paŭtaryŭ: dyktat Rasii, naviazanaja Ukrainie mirnaja damova sa strataj terytoryi źjaŭlajecca nieprymalnaj — i dla Jeŭropy, i dla Ukrainy.
Adzin z samych jarkich łabistaŭ pieramirja, italjanski premjer-ministr Maryjo Drahi, paśla telefonnaj razmovy z Pucinym 26 maja taksama vymušany byŭ kanstatavać, što «nie ŭbačyŭ nadziei na mir» va Ukrainie.
— Heta značyć, u publičnaj prastory padobnych vykazvańniaŭ (zaklikaŭ da Ukrainy «prycišyć ambicyi») niama, — kanstatuje Alaksandr Frydman. — Što tyčycca niabačnaj, zakulisnaj častki — tam, chutčej za ŭsio, niešta takoje jość. Ale, tym nie mienš, byli aficyjnyja zajavy ŭkrainskaha boku na hetuju temu, pazicyja Ukrainy ŭsim zrazumiełaja.
Što tyčycca pastavak uzbrajeńniaŭ, tut, viadoma, taksama davoli supiarečlivaja situacyja. Z adnaho boku, hety praces idzie daloka nie tak chutka, jak chaciełasia b Ukrainie. Ź inšaha — niama nijakich razmoŭ ab tym, kab spynić ci zapavolić pastaŭki.
— Kali aceńvać tanalnaść publikacyj u zachodniaj presie i vystupaŭ jeŭrapiejskich palitykaŭ, nakolki, na vaš pohlad, Zachad hatovy znoŭ aktyvizavać praces mirnych pieramovaŭ?
— Davajcie adšturchoŭvacca ad taho, što było skazana ŭ publičnaj prastory. Naprykład, vykazvańnie Šolca, davoli adnaznačnaje.
Šolc skazaŭ dźvie rečy: pa-pieršaje, što Rasija nie pavinna vyjhrać hetuju vajnu — i jon zychodzić z taho, što jana jaje nie vyjhraje.
Pa-druhoje, što Pucin zrazumieje, što jon nie dasiahnie svajoj mety va Ukrainie, i kali zrazumieje, to siadzie za stoł pieramovaŭ i budzie mir.
U hety ž dzień hienieralny sakratar NATA Stołtenbierh zajaviŭ, što sajuźnikam treba być hatovymi doŭhaterminova pastaŭlać zbroju, bo vajna va Ukrainie ŭsio bolš robicca vajnoj na źniasileńnie.
Na surjoznym uzroŭni, za vyklučeńniem zajaŭ Kisindžera, mnie bolš nie traplałasia vystupleńniaŭ palitykaŭ — dziejnych palitykaŭ, jakija prymajuć rašeńni, — jakija zajavili b, što Ukraina pavinna pastupicca svaimi intaresami.
A voś kali my pahladzim na ŭzrovień abyvacielski — viadoma, u Jeŭropie chapaje ludziej, jakija marać pra toje, kab hetaja vajna niejak skončyłasia. I kali jana skončycca šlacham straty Ukrainaj niejkich terytoryj, mnohich jeŭrapiejskich abyvacielaŭ heta nie źbiantežyć.
Toje, što zaraz havorycca z nahody Jeŭrasajuza — ab inicyjatyvie Italii, Kipra i Vienhryi ŭklučyć u vynikovy dakumient samita ES zakliki da spynieńnia ahniu i adnaŭleńnia pieramoŭ pamiž Ukrainaj i ES — u hetym ničoha niezvyčajnaha niama. Bo nie skazana ani słova pra toje, što Ukraina abaviazanaja achviaravać terytoryjami, havorka idzie tolki pra imknieńnie niejkim čynam dasiahnuć pieramirja.
Ale pieramirje — toje pytańnie, da jakoha nie hatovy nivodzin z bakoŭ. Ni Rasija, jakaja nie dasiahnuła svaich aktualnych metaŭ, ni Ukraina, jakaja nie choča zamarozić kanflikt.
Pry hetym i raściahvańnie vajny na doŭhi pieryjad taksama nikomu nie treba, padkreślivaje ekspert: dla Rasii heta budzie aznačać niemahčymaść urehulavańnia situacyi na jeŭrapiejskim kirunku, dla Ukrainy — kałasalnyja straty…
— Hledziačy na padziei apošnich dzion, składvajecca adčuvańnie, što my idziem da vielmi niebiaśpiečnaj eskałacyi, — kaža Alaksandr Frydman. — Praciahvajecca rasijskaje nastupleńnie, jakoje pryvodzić da vialikich strat z abodvuch bakoŭ. My majem spravu z charčovym, zbožžavym kryzisam, jaki pahražaje skončycca hoładam u Afrycy i Azii — Rasija hatovaja pajści na heta i pahruzić śviet u jašče bolšuju niestabilnaść.
I jość zajava Łaŭrova, jaki pałochaje, što kali buduć adbyvacca dalejšyja pastaŭki ŭzbrajeńniaŭ, to raźviažacca suśvietnaja vajna: choć vajnoj jon heta nie nazyvaje, ale praktyčna pahražaje.
Heta vielmi niebiaśpiečnaja faza eskałacyi. Prytym situacyja dynamičnaja, pastajanna mianiajecca, i nas čakaje vielmi ciažki i niervovy čas. Jano i da hetaha było tak sabie, miakka kažučy, a ciapier budzie jašče horš.
