U Žodzinie «Tarpieda» i «Dynama» praviali samy skandalny matč tura. Fota: vk.com/fc_torpedobelaz

U Žodzinie «Tarpieda» i «Dynama» praviali samy skandalny matč tura. Fota: vk.com/fc_torpedobelaz

Na stadyjonie «Tarpieda» adbyŭsia samy vynikovy i samy skandalny dvuboj tura. Haspadary pola, niahledziačy na toje, što prapuścili ŭžo na 22-j chvilinie, paśla nie prosta adnavili raŭnavahu, a dvojčy vyryvalisia ŭ lidary. Pry hetym «Tarpieda» nie biantežyŭ status supiernikaŭ: minskaje «Dynama» napiaredadni vychodnych vałodała ledź nie najlepšaj abaronaj Biełarusi. Tym nie mienš, dubl Pabudzieja prysaromiŭ zornych apanientaŭ, u składzie jakich za razbureńnie adkazvali hulcy nacyjanalnaj zbornaj krainy.

Adnak paśla pierapynku situacyja kardynalna źmianiłasia: trapnyja streły Biehunova dy Bykava znoŭ zrabili favarytam pary bronzavych pryzioraŭ vyšejšaj lihi. Paśla čaho stalica kaściami kłałasia, ale nie dazvalała «aŭtazavodcam» adnavić raŭnavahu — i taki źviezła z Žodzina try ački.

A voś hałoŭnamu arbitru sustrečy Siarhieju Kraśnikavu pachvalicca anałahičnaj sprytnaściu nie ŭdałosia.

Adrazu paśla zakančeńnia sustrečy da jaho padlacieŭ adzin ź miascovych fanaŭ dy niekalki razoŭ šturchanuŭ u hrudzi. Chulihana chutka adciahnuli ściuardy za miežy pola, ale i tam niezadavoleny zaŭziatar jašče kolki razoŭ šturchanuŭ jaho rukoj u plačo.

Fanata aburyŭ pienalci, jaki byŭ pryznačany ŭ bramu haspadaroŭ na 31-j chvilinie, a taksama abyjakavaść da foła dynamaŭca Navumava na miascovym futbaliście Čyžu. Kantakt adbyŭsia ŭ štrafnoj placoŭcy minčukoŭ pad zasłonu sustrečy — i moh pryvieści da ničyjoj u vypadku pryznačeńnia i realizacyi «tarpiedaŭcami» 11-mietrovaha.

Dziakujučy pieramozie «Dynama» nie adpuściła ŭ adryŭ lidara tablicy. Barysaŭski BATE svaju viktoryju aformiŭ u kudy bolš spakojnaj atmaśfiery. Trojčy hulcy Alaksandra Michajłava prabivali abaronu bresckaha «Dynama», a mahli i bolš, bo nie adčuvali realnaha supracivu.

«Bieła-błakitnym» nie dapamahła navat źmiena treniera: abaviazki zvolnienaha z pasady Siarhieja Kavalčuka časova vykonvaŭ asistent Alaksandr Chrapkoŭski. Adnak i jon nie zdoleŭ «pierazahruzić» kamandu. U vyniku čempijon krainy-2018 apuściŭsia na apošni radok tablicy i ryzykuje skiravacca ŭ pieršuju lihu, kali nie źmienić staŭleńnia da situacyi.

Uvohule ž tur vydaŭsia bahatym na hały: sumarna kalektyvy nabili ažno 32 miačy. Asabliva adznačym zarubu «Isłačy» i «Dniapra», bo dla skareńnia aŭtsajdara družynie ź Minskaha rajona spatrebiłasia ažno trojčy parušać ničyjny parytet. Chaj sabie na rachunku abłasnych futbalistaŭ miełasia pierad turam tolki adna pieramoha, jany prademanstravali vyklučnuju siłu voli. Nie chapiła kryšku majsterstva, kab na vyjeździe zabrać ački ŭ kudy bolš daśviedčanaha i zbałansavanaha supiernika.

Astatnija matčy tura skončylisia nastupnym čynam:

  • Šachcior — Viciebsk — 2:0
  • Minsk — Arsienał — 2:0
  • Słuck — Homiel — 2:2
  • Enierhietyk-BDU — Słavija — 5:0
  • Nioman — Biełšyna — 2:2

Paśla 10 turaŭ tablicu ačolvaje BATE z 23 ačkami, na rachunku bližejšaha pieraśledvalnika barysaŭčan, «Enierhietyka»-BDU 22 bałły, trecimi iduć minskija «dynamaŭcy» z 21 ačkom u aktyvie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?