«Na žal, ale ŭ hetaj historyi nie abyšłosia biez trahiedyi. Dvoje kiroŭcaŭ zahinuli ŭ horadzie Koraścień. Ukrainskija ŭłady zajavili, što vadzicieli trapili pad abstreł, atrymali apioki, niesumiaščalnyja z žyćciom. Ale ekśpiertyza, jakuju praviali pa viartańni ciełaŭ na radzimu, abviarhaje heta. Strašnyja padrabiaznaści!» — złaviesnym hołasam za kadram pramaŭlaje dyktar.
Zatym słova dajuć Iharu Škilevu, načalniku ŭpraŭleńnia sudova-miedycynskich ekśpiertyz upraŭleńnia DKSE pa Homielskaj vobłaści.
«Pareštki ŭ vyhladzie frahmientaŭ abharełych cieł byli vyvučanyja. Akramia ŭździejańnia połymia, na adnym z frahmientaŭ ściehnavoj kostki znojdzieny adpił kostki, jaki adbyŭsia paśla nastupleńnia śmierci», — kaža ekśpiert.
Kadr źmianiajecca vajennaj chronikaj z Ukrainy i złaviesny hołas pramaŭlaje: «Jašče raz, uvaha! Navošta va Ukrainie ździekavalisia z trupa?! Chacieli schavać ranieńni ci niešta jašče?»
Kab hladač nie sumniavaŭsia, vysnovu robić usio toj ža ananimny złaviesny hołas: «Mahčyma, našy vadzicieli padvierhnulisia katavańniam! Adkazaŭ tut pakul niama».
Aŭtaraŭ filma nie źbiantežyła, što adpił kostki zrobleny ŭžo paśla śmierci. Jak i nie źbiantežyła toje, što jość masa dokazaŭ hibieli biełaruskich dalnabojščykaŭ u vyniku avijaŭdaru rasijskaj avijacyi, jakaja prylacieła z terytoryi Biełarusi.
Davajcie raźbiaromsia, adkul moh źjavicca adpił na abvuhlenym ciele. Zvyčajna tak robiać dla taho, kab atrymać uzor DNK z metaj nastupnaj identyfikacyi zahinułaha.
Źvierniemsia da padručnika na ruskaj movie dla pracy va ŭmovach uzbrojenych kanfliktaŭ i inšych situacyj uzbrojenaha hvałtu, jakuju apublikavaŭ Mižnarodny Čyrvony kryž na svaim sajcie. Dapamožnik prymianiajuć dla analizu DNK i identyfikacyi čałaviečych pareštkaŭ. U punkcie 4 apisanyja techničnyja aśpiekty zboru i zachoŭvańnia ŭzoraŭ DNK.
Isnuje šerah techničnych momantaŭ, jakija abaviazkova varta vykonvać pry zbory uzoraŭ dla analizu DNK.
Uzory varta źbirać, karystajučysia sterylnymi palčatkami, kab skaracić ryzyku papadańnia na ŭzor čužoj DNK. Dla analizu DNK čałaviečych pareštkaŭ možna źbirać nastupnyja ŭzory:
— kostka (pieravažna cieła ściehnavoj kostki)*;
— zub (abo pažadana dva zuby) u nastupnym paradku pieravažnaj čarhovaści: malar, premalar, kłyk, piaredni zub;
— kroŭ, zabranaja šprycami z mahistralnych sasudaŭ*;
— abrezki paznohciaŭ;
— vałasy z hałavy, vyrvanyja z koraniem;
— luby kavałačak miakkich tkanak, kali heta śviežy trup (mienš za 48 hadzin paśla śmierci ŭ haračym klimacie).
Vidavočna, što sabrać materyjał na abvuhlenym ciele možna tolki z kostak. U dapamožniku prosta pakazana, što lepš brać uzor sa ściehnavoj kostki. Mienavita heta i było zroblena ŭ vypadku ź ciełami zahinułych biełaruskich dalnabojščykaŭ.
Nie ŭ pieršy raz prapahandysckija filmy vychodziać paśla taho, jak Alaksandr Łukašenka abjaŭlaje pra čarhovuju «siensacyju». Nahadajem, učora jon naŭprost abvinavaciŭ ukraincaŭ u zabojstvie biełaruskich kiroŭcaŭ.
«Na žal, pa-mojmu, dvum ludziam tak i nie ŭdałosia viarnucca dadomu, jany prosta nachabna byli zabityja ŭkraincami. Pryjdzie čas, my raźbiaromsia i ź imi», — zajaviŭ jon.
Nahadajem, dvoje biełarusaŭ zahinuli pry abstrele ŭ Koraścieni Žytomirskaj vobłaści 10 sakavika. Jany pa vypadkovaści znachodzilisia na terytoryi byłoha małakazavoda, jaki trapiŭ pad rasijskuju avijacyjnuju ataku. Kiraŭnik Koraścienia Uładzimir Maskalenka zajaviŭ tady, što horad abstrelvali samaloty, jakija vylecieli z terytoryi Biełarusi. Cieły zahinułych u Žytomirskaj vobłaści biełaruskich vadzicielaŭ-mižnarodnikaŭ byli dastaŭlenyja ŭ Biełaruś 17 sakavika.
Łukašenka zajaviŭ, što dvuch biełaruskich dalnabojščykaŭ «nachabna zabili ŭkraincy». Nasamreč kiroŭcy zahinuli ad rakiet, zapuščanych ź Biełarusi
Što za «śpiecapieracyja» biełaruskich śpiecsłužb na terytoryi Ukrainy dla vyzvaleńnia dalnabojščykaŭ? Padrabiaznaści
