— Sam sa Smalavičaŭ, žyvu ŭ rajonie Kurhana Słavy, pa hetaj trasie jezdžu časta. Z ulikam taho, što ciapier dom zdajom pa sutkach, heta zručna: pa darozie zajechać, vyrašyć pytańni z zasialeńniem — vysialeńniem haściej, — tłumačyć Andrej.
Barnchaŭs — heta architekturny styl, natchniony vyhladam śvirana, haspadarčych pabudoŭ. Taki dom Andrej vyrašyŭ budavać na bazie staroj chaty. Karkas jaje byŭ całkam prydatny, «rodny» brus — u dobrym stanie.
Chata da pierabudovy
— Ale z ulikam vopytu, maja parada: lepš znosić i budavać z nula. Tamu što inakš usio ž uźnikajuć peŭnyja prablemy ŭ pracesie budaŭnictva: niedzie ścieny hulajuć, inšyja pytańni zjaŭlajucca.
Ad staroha doma zastalisia karkas i padmurak.
— Płošča była 6 na 9 mietraŭ. Ja nadtačyŭ dom błokami — novaja pabudova vyjšła płoščaj 6 na 12. Staruju i novuju častku zmacavaŭ, uciapliŭ — atrymałasia takaja kanstrukcyja.
Karkas atrymanaha doma abšyli zvyčajnaj abraznoj doškaj, afarbavanaj u čorny koler. Pakłali nachlostam. Na dachu — klikfalc.
Unutry — adkrytaja prastora, pachnie drevam.
— Płastyku tut minimum. Elektračajnik, naprykład, — uśmichajecca haspadar doma.
Pad dacham abstalavany druhi pavierch, tam znachodzicca spalnia.
— Leśvica biez parenčaŭ, tamu što nie chaciełasia zahruvaščvać imi prastoru. Naohuł lublu skandynaŭski styl, padabajecca, kali ścieny nie dušać.
Aciaplajecca dom elektryčnaściu.
— Kali bolš kankretna, to padłohi vodna-elektryčnyja. Kažuć, KKD ad takich bolš. Za chałodny siezon — a dom časta byŭ zaniaty — vyjšła niešta kala 500 rubloŭ za aciapleńnie.
Pryčym dla takoha abahravańnia nie patrebnyja dadatkovyja pamiaškańni pad kacielni. Jość maleńkija datčyki, jany padłučanyja da vajfaja, i ja mahu praz mabilnuju prahramu nastrojvać tempieraturu.
Dla zručnaści jość kamin.
— Heta charvacki čyhunny kamin Plamen Nera, kaštavaŭ kala 3 tysiač rubloŭ. Kali raptam adklučycca elektryčnaść, zdolny całkam abahravać dom.
Plitka na padłozie — kieramahranit.
Meblu surazmoŭca rabiŭ svaimi siłami: była svaja nievialikaja meblevaja vytvorčaść. Kuchonnyja i inšyja šafki zroblenyja z faniery «Barysaŭdreva». Padstaŭku pad televizar i časopisny stoł Andrej zrabiŭ svaimi rukami z brusoŭ, što zastalisia paśla budoŭli.
Da pasłuh dyzajnieraŭ i architektaraŭ haspadar doma nie źviartaŭsia. Idei pa vonkavym vyhladzie i interjery znachodziŭ, hartajučy Instagram i Pinterest.
Ścieny zvonku i znutry pakryvali finskaj farbaj Teknos.
— Anałah «Cikuryły», ale nie takaja raśpijaranaja. Šafki pakryvaŭ farbaj Rubio. Ličycca, što zachoŭvaje ad vilhaci. Adna blašanka kaštuje 160 rubloŭ, zatoje dobra padychodzić dla pavierchniaŭ, jakija časta vykarystoŭvaješ (dźviercy, kuchonnyja šafki).
Ramy voknaŭ u padłohu — z PVCH.
— Vokny pastavili za dzień. Zvyčajna kažuć, što kali vialikaja płošča škleńnia, to kandensat źbirajecca. Ale dziakujučy tamu, što ŭ chacie niama kanviektaraŭ, a jość ciopłyja padłohi, tut narmalnaja abaračalnaść pavietra, — śćviardžaje haspadar.
Andrej nie nazyvaje dakładnaj sumy, u jakuju abyšłosia budaŭnictva barnchaŭsa, ale daje aryjencir:
— Z ulikam hrošaj, vydatkavanych na ziamlu, ukłaŭsia da sta tysiač dalaraŭ.
Suadnosna z kuplaj novaj dvuchpakajovaj kvatery.
Kali kuplaŭ, daroha była jašče nie takoj šyrokaj: jaje pašyryli pad raźvićcio horada-spadarožnika.
— Płanavalisia šumaachoŭnyja ekrany, ale ich z našaha boku ŭ vyniku nie pastavili. U dvary trasu čuvać, ale ŭ domie amal nie. Zatoje tut zusim niedaloka Smalavickaje vadaschovišča. Da jaho lohka dajści, tamu što pabudavali padziemny pierachod.
Pryjšłosia pavazicca i z učastkam, pryvieźci niamała ziamli, kab vyraŭnavać łandšaft.
Uładalnik barnchaŭsa sprabuje siabie ŭ haściničnym biznesie: zdaje dom na sutki. Cikavaść u minčukoŭ da takoj nieruchomaści jość, ale paśla taho, jak biełaruskija kvatery i siadziby adklučyli ad bujnych servisaŭ braniravańnia nakštałt Booking, situacyja pahoršyłasia.
— Ciapier pra nas daviedvajucca ŭ asnoŭnym praz Instagram.
Haspadar stylnaha doma maje namier raźvivać prajekt dalej. U najbližejšych płanach — znos staroha chlava, jaki pakul jašče staić u dvary.
— Hetym razam ja ŭžo zrabiŭ sabie prajekt, budu budavać z nula.
