U rasśledavańni zhadvajecca rezanansnaja historyja ajcišnicy Viery Lavonik-Šylajevaj, jakaja 10 listapada 2020 hoda napisała danos na žycharoŭ ŽK«Kaskad» u Minsku (jany vyviešvali znakamity vielizarny ściah na domie). A zatym žančyna ź siamjoj jak IT-rełakant źjechała ź Biełarusi ŭ Litvu. Pra hetuju historyju padrabiazna pisała «Naša Niva». Pavodle infarmacyi BYPOL, jeŭrapiejskaja historyja Lavonik-Šylajevaj dahetul nie skončyłasia.
Akramia hetaha, BYPOL ahučvaje nieviadomyja historyi byłych milicyjantaŭ, jakija ŭdzielničali ŭ zadušeńni biełaruskich pratestaŭ.
Adzin ź ich — Słabyšaŭ Alaksandr Iharavič, były ŭčastkovy inśpiektar Pastaŭskaha RAUS, 1996 hoda naradžeńnia. 5 krasavika 2021 hoda zjechaŭ ź Biełarusi ŭ Polšču.
Słabyšaŭ — hałoŭny śviedka pa spravie Alaksieja Kazłoŭskaha, 1997 hoda naradžeńnia.
Zhodna z pratakołam, jaki cytuje BYPOL, uviečary 16 kastryčnika 2020 hoda Słabyšaŭ z tavaryšam ubačyŭ chłopcaŭ, jakija iduć ad doma №20 pa vulicy Zialonaj u Pastavach, u rukach adnaho ź ich byŭ «pradmiet, padobny da bałončyka z farbaj». Kala doma Słabyšaŭ ubačyŭ na asfalcie nadpisy «3%», «Saša, ty zvolnieny» i malunak bieła-čyrvona-biełaha ściaha.
Słabyšaŭ patelefanavaŭ kaleham i sam rušyŭ uśled za kampanijaj. Pavodle infarmacyi BYPOL, apaznać chłopcaŭ dla Słabyšava nie składała ciažkaści, bo jon byŭ znajomy ź imi asabista.
Na pracesie nad znajomymi Słabyšaŭ asabista nie prysutničaŭ, spasłaŭsia na słužbovyja abstaviny.
Kazłoŭski viny nie pryznaŭ. Suddzia Natalla Žukava prysudziła jamu štraf u pamiery 2160 rubloŭ, choć kamunalniki aceńvali škodu ŭ 25 rubloŭ, i padsudzimy škodu kampiensavaŭ. Akramia taho, chłopiec atrymaŭ try hady z adterminoŭkaj.
U kancy śniežnia taho ž hoda Słabyšaŭ napisaŭ rapart pa fakcie jaho abrazy ŭ telehram-kanale «Padsłuchana Pastavy».
Ciapier były milicyjant pracuje ŭ Varšavie. Z MUS, pa infarmacyi BYPOL, jon byŭ zvolnieny z-za praviny, jakaja vyklučaje mahčymaść dalejšaha prachodžańnia słužby. Padrabiaznaści BYPOL nie nazyvaje.
Adnak pryvodzić skryn adkazu Słabyšava pra historyju z Kazłoŭskim. Pry jakich abstavinach napisanaje paviedamleńnie, nie zhadvajecca.
«Usio nie zapomnić. Za malavalščykaŭ nie soramna, možna i pa-inšamu svaju pazicyju vykazvać. Z-za ich taksama šmat ludziej pakutavała. A toje, što z administracyjnaha artykuła zrabili kryminalny, dyk heta ŭsio ź vierchu pryjšło», — havorycca ŭ adkazie Słabyšava.
Druhi milicyjant, jaki zjechaŭ ź Biełarusi ŭ ES, — Tasojeŭ Pavieł Erykavič, siaržant milicyi PPSM UUS Bresckaha abłvykankama, 1993 hoda naradžeńnia.
Paśla žniŭnia 2020 hoda pa rapartach Tasojeva byli raspačatyja dźvie kryminalnyja spravy, pa jakich jon byŭ pryznany paciarpiełym.
U čacie «Brest 97%» pad fatahrafijaj Tasojeva byŭ raźmieščany kamientaryj z «niehatyŭnaj acenkaj» jaho, to-bok była «publičnaja abraza pradstaŭnika ŭłady». Pa hetaj kryminalnaj spravie na try hady chimii byŭ asudžany Alaksandr Hrynievič, pryznany palitviaźniem.
U kastryčniku 2020 hoda za toje ž — abrazu Tasojeva — na dva hady chatniaj chimii byŭ asudžany Alaksandr Hłazyryn, 1989 hoda naradžeńnia.
Pa pryčynach «nie źviazanych ź jaho hramadzianskaj pazicyjaj», pa infarmacyi BYPOL, Tasojeŭ byŭ zvolnieny ź milicyi, pierabraŭsia ŭ Polšču, uładkavaŭsia apierataram stankoŭ z prahramnym kiravańniem.
Pražyvaje Tasojeŭ va Urocłavie.
BYPOL pieradaŭ infarmacyju pa hetych asobach pravaachoŭnikam Polščy. U arhanizacyi spadziavajucca na departacyju ich u Biełaruś i «zakryćcio dla ich šlachu ŭ cyvilizavany śviet». A ŭ vypadku zvarotu paciarpiełych u pravaachoŭnyja orhany Polščy, pryciahnieńnia ich da kryminalnaj adkaznaści pavodle mižnarodnaha prava.
