Fota «Vajar»
Jon nahadaŭ, što niekatory čas tamu pa jaho inicyjatyvie było pryniata rašeńnie ab stvareńni vojskaŭ terytaryjalnaj abarony. «Bo nichto nie budzie abaraniać svoj dom, jak ty sam», — zaŭvažyŭ Łukašenka.
Adnak bieskantrolnaj razdačy zbroi, jak heta zdaryłasia va Ukrainie, być nie pavinna, padkreśliŭ Alaksandr Łukašenka. «Usie našy terytaryjały prypisanyja, arhanizavanyja ŭ pałki, bataljony. My viedajem proźviščy, usie ich danyja. I zbroja dla ich padrychtavana — na kožny rajon, kožny bataljon», — rastłumačyŭ jon.
Uličvaŭsia taksama i niehatyŭny ŭkrainski vopyt, kali z-za niedachopu ludziej pryjšłosia pryzyvać mužčyn starejšaha ŭzrostu i tych, chto nie maje armiejskaha vopytu.
«I ja padumaŭ, što nam na ŭsialaki vypadak treba pry kožnym sielskim saviecie mieć voś heta narodnaje apałčeńnie, hrupu ludziej. Ich budzie niašmat. Moža, 50 čałaviek. Ale jany taksama pavinny mieć svaju zbroju dzieści na składzie. My ich pryzyvajem dla navučańnia — jany voźmuć svaje aŭtamaty (u asnoŭnym aŭtamat, hranatamiot, pistalet), kab mahli abaranić svoj dom», — rastłumačyŭ Alaksandr Łukašenka.
U vypadku vajennych dziejańniaŭ atrady narodnaha apałčeńnia mohuć transfarmavacca ŭ partyzanski ruch, ličyć jon. «Narodnaje apałčeńnie moža być reziervam dla terytaryjalnaj abarony», — vykazaŭ mierkavańnie Łukašenka.
Taksama Łukašenka padkreśliŭ, što sapraŭdny mužčyna pavinien umieć u vypadku nieabchodnaści abaranić svaju siamju. «Ja kažu, nie daj boh, vajna i ŭ ciabie budzie muž, jaki naohuł nie moža ciabie i dom abaranić. Navošta taki mužyk, jaki nie moža adroźnić pistalet ad aŭtamata?»— spytaŭ Alaksandr Łukašenka.
Pra toje, što ŭ Biełarusi mohuć stvaryć narodnaje apałčeńnie, 27 maja žurnalistam zajaviŭ ministr abarony Viktar Chrenin.
Na štohadovym zbory z kiraŭnikami zon terytaryjalnaj abarony jon raspavioŭ, što padčas narady pa raźvićci Uzbrojenych sił Alaksandr Łukašenka pastaviŭ adpaviednuju zadaču.
«My bačym, što hetaje pytańnie taksama vielmi važnaje. Hałoŭnaje, što ŭ nas jość dla hetaha ludzi i ŭzbrajeńnie. Sapraŭdy, kolkaść abaroncaŭ našaj krainy moža pavialičycca ŭ razy. Heta maje vialikaje značeńnie ŭ najaŭnaj situacyi. Adkaz budzie adekvatnym, kali chtości pryjdzie na našu ziamlu», — skazaŭ tady Viktar Chrenin.
