Paśla pačatku vajennych dziejańniaŭ u 2014 hodzie Iryna razam z mužam pierajechała ŭ Biełaruś i ŭładkavałasia ŭ sielhaspradpryjemstva, u 2019 hodzie stała jaho dyrektarkaj.

Pa słovach maci abvinavačanaj, Aleny, pry ŭładkavańni ŭ «Družbu» Iryna pryniała pradpryjemstva ź vializnymi pazykami. Ale pry novym kiraŭniku saŭhas nie tolki vypłaciŭ usie pazyki, ale i palepšyŭ jakaść vypuskanaj pradukcyi. A na techniku ŭstalavali navihacyju, dziakujučy čamu vyrasła pradukcyjnaść i źmienšylisia abjomy prypisak.

«Saŭhas vyjšaŭ na druhoje miesca. Jana ŭznaharodžvałasia, pačali davać novuju techniku. Vobłaść dapamahła pastavić novuju dobruju zierniesušyłku, — kaža Alena. — Ale dačka była niepažadanaj: sama nie krała i inšym nie davała».

Užo ŭ listapadzie 2020 hoda Iryna ŭpieršyniu sutyknułasia z kryminalnym pieraśledam — pavodle abvinavačvańnia ŭ tym, što jana niapravilna atrymlivała nadbaŭku da zarobku. Raspačynać spravu tady admovilisia, ale praz hod prakuror rajona padaŭ hramadzianski pazoŭ u dačynieńni da dyrektara i hałoŭnaha buchhałtara AAT «Družba» ab kampiensacyi škody.

15 listapada 2021 hoda Jermakova pavinna była pajści na sudovaje pasiadžeńnie pa hramadzianskim pazovie, ale pierad hetym jaje paprasili zajści ŭ rajadździeł milicyi, adkul jana ŭžo nie vyjšła. Padstavaj stali pakazańni hałoŭnaha buchhałtara ab tym, što nibyta Iryna davała joj niezakonnyja zahady.

Irynu Jermakovu zatrymali paśla taho, jak 22 kastryčnika 2021 hoda Alaksandr Łukašenka na naradzie z Savietam Ministraŭ zajaviŭ pra fakty złačynnaj dziejnaści ŭ Homielskaj vobłaści.

«Heta ž katastrofa. Tam užo pa načach režuć karoŭ i spłaŭlali ŭ Rasiju. I heta ž nie pieršy miesiac. I cišynia. Treba było ŭmiašańnie prezidenta, treba było pasyłać tudy Kubrakova, kab jon kahości tam prydušyŭ. Nu dyk čakajcie, jon tam užo», — skazaŭ kiraŭnik dziaržavy.

Pavodle jaho, «miasa vyvoziać u Rasiju (praz žulikaŭ, i słužbovyja asoby hetym paviazanyja) i tam pradajuć».

31 kastryčnika siužet pra karovaŭ na Homielščynie vypuściŭ i dziaržaŭny telekanał STV. U im siarod inšaha zhadvałasia i Iryna Jermakova, pad kiraŭnictvam jakoj saŭhas zamiest taho, kab zdavać byčkoŭ na miasakambinaty, pradavaŭ ich nasielnictvu.

«Zapytali dakumienty na pieršasnuju realizacyju žyvioły i ŭbačyli, što bolš za 460 hałoŭ žyvioły ŭ hetym hodzie było realizavana nasielnictvu. Nie na miasakambinaty, a mienavita nasielnictvu», — aburaŭsia načalnik upraŭleńnia KDK Homielskaj vobłaści Siarhiej Hłoba.

Pavodle jaho, heta vyklikaje padazreńni, tamu što «hramadzianinu takuju kolkaść žyvioły ŭ haspadarcy ni da čaho». Čynoŭnik raspavioŭ, što «hetaje bydła nasielnictva pieradavała adnamu i tamu ž čałavieku ŭ susiednim rajonie, jaki farmavaŭ hrupy i realizoŭvaŭ hetych žyvioł u Rasijskuju Fiederacyju».

U vyniku abvinavačvanuju prysudzili da štrafu i čatyroch hadoŭ pazbaŭleńnia voli pavodle kryminalnych artykułaŭ za kradziež šlacham złoŭžyvańnia słužbovymi paŭnamoctvami, vykarystańnie zahadzia padroblenaha dakumienta, złoŭžyvańnie ŭładaj abo słužbovymi paŭnamoctvami, pieravyšeńni ŭłady abo słužbovych paŭnamoctvaŭ.

Svajoj viny Jermakova nie pryznała. Bolš za toje, svajaki Iryny zajaŭlajuć pra sfabrykavanaść spravy i kažuć, što na samoj spravie dyrektarka pieraškadžała skažać statystyku padziažu žyvioły.

Na voli ŭ Iryny Jermakovaj zastalisia dźvie niepaŭnaletnija dački. Svajaki źbirajucca abskardzić prysud až da Viarchoŭnaha suda.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?