Transpartnyja vydatki vyraśli ŭdvaja
Pradstaŭnik bujnoj kampanii, jakaja zajmajecca impartam pradmietaŭ asabistaj hihijeny i bytavoj chimii, adznačaje, što niahledziačy na stabilizacyju na valutnym rynku, čakać źnižeńnia cen nie varta. Pakolki heta byŭ daloka nie adziny faktar, jaki ŭpłyvaje na košt tavaru.
«Ciapier biznes sutykajecca z šeraham prablem, jakija vyklikanyja chutčej mienavita sankcyjami, a nie kursavymi vahańniami. Chtości pryncypova nie choča pradavać pradukcyju ŭ našu krainu, ale bolšaść prosta baicca taho, što praz pracu z rasijskimi abo biełaruskimi kampanijami sam patrapić pad sankcyi albo paniasie reputacyjnyja straty», — upeŭnieny śpiecyjalist.
Situacyja, jakaja skłałasia, pryviała da taho, što z pryłaŭkaŭ źnikli nie tolki tavary, vyrablenyja ŭ Jeŭropie, ale i rasijskaj vytvorčaści. Tłumačycca heta prosta: nadpis Made in Russia jašče nie aznačaje, što hety pradukt na 100% rasijski.
«Častka inhredyjentaŭ impartavałasia ź inšych krain. Naprykład, kali ŭziać aerazolnyja antypierśpiranty, to vyśvietlicca, što rasijski tam tolki aluminijevy fłakon, a źmieściva impartnaje».
Inšym istotnym čyńnikam, jaki ŭpłyvaje na canu, źjaŭlajecca darahaja dastaŭka.
«Praz sankcyi ŭ transpartnaj śfiery vielmi mocna vyraśli transpartnyja vydatki. Raniej dastaŭka 20-futavaha kantejniera z Kłajpiedy ŭ Minsk abychodziłasia ŭ 1000 jeŭra, a ciapier — u 2500», — kaža surazmoŭca.
Upłyvaje i toj faktar, što mnohija firmy nie hatovyja pradavać svaju pradukcyju naŭprost u Biełaruś.
«Tyja ž palaki, nasamreč, chočuć z nami pracavać, ale bajacca heta rabić naŭprost. Dla hetaha pastaŭščykam davodzicca adkryvać firmy-prakładki ŭ ES, kab pradukcyja nibyta sychodziła na miascovy rynak».
Taki sposab pracy dapamahaje abychodzić abmiežavańni, ale ŭtrymańnie firm-prakładak i składoŭ patrabuje lišnich vydatkaŭ, jakich da vajny nie było. Naturalna, heta prykmietna ŭpłyvaje na kančatkovuju canu tavaru ŭ Biełarusi.
Pa słovach našaha surazmoŭcy, na biahučy momant najbolš vostra adčuvajucca prablemy z pradmietami asabistaj žanočaj i dziciačaj hihijeny, a taksama z pralnymi paraškami, vadkaściami i srodkami dla pasudamyječnych mašyn papularnych zarubiežnych marak. Kazać pra poŭnaje źniknieńnie niejkich pazicyj nie davodzicca, ale byvajuć časovyja pieraboi z pastaŭkami.
Bolšaść kampanij adnaviła pracu ź biełaruskimi klijentami
Inšy imparcior, ź jakim nam udałosia pahutaryć, pastaŭlaje ŭ Biełaruś adździełačnyja materyjały z roznych krain Zachodniaj Jeŭropy. Ź jaho słoŭ, ceny na pradukcyju ŭ paraŭnańni ź lutym vyraśli na 25-30%.
«Na pačatkovym etapie my sutyknulisia z tym, što mnohija vytvorcy nie viedali, što rabić, i prosta admaŭlalisia adpuskać tavar na Biełaruś. Ale potym bolšaść praciahnuła pracavać z nami, jak i raniej», — dzielicca biznesoviec.
Jaho transpartnyja vydatki istotna pavialičylisia za apošnija miesiacy. Da kryzisu ź mihrantami i zakryćcia PP «Bruzhi» fura dastaŭlała tavar sa składa niepadalok ad miažy ź Biełaruśsiu da Hrodna ŭsiaho za 400 jeŭra. Z abvastreńniem situacyi na miažy i źjaŭleńniem šmatkiłamietrovych čerhaŭ dastaŭka padaražeła da 1100 jeŭra. A ciapier za toje samaje treba płacić 2000.
«Akramia taho, krychu vyraśli zakupačnyja ceny ŭ samoj Jeŭropie, bo tam mocna padniaŭsia košt enierhanośbitaŭ i paliva. Hety faktar, plus vielmi darahaja dastaŭka, pryviali da značnaha padaražeńnia praduktu ŭ Biełarusi. Taki raskład niehatyŭna adbivajecca na prodažach, bo pakupnickaja zdolnaść u krainie padaje. Pa hetaj pryčynie ŭžo pryjšłosia źlohku zvuzić asartymient za košt najbolš darahich pazicyj, jakija paśla ŭsich padaražeńniaŭ stali prosta niepadjomnymi dla bolšaści pakupnikoŭ», — reziumuje biznesmien.
«Kuplajuć za doraha, bo niama kudy dziavacca»
Vysokapastaŭleny supracoŭnik adnoj z bujnych firmaŭ-imparcioraŭ novych aŭtazapčastak raspavioŭ «Našaj Nivie», što pastaŭki tavaru praz bolš čym try miesiacy ad pačatku vajny tak i nie adnoŭlenyja.
«U Biełarusi ŭžo adčuvalny deficyt zapčastak i matornych alivaŭ. Možna kazać, što na biahučy momant u Biełarusi amal skončylisia filtry Knecht. Śviežych pastavak za hetyja try miesiacy praktyčna nie było. Ceny na toje, što jość na składach, značna vyšejšyja, čym byli da vajny, źnižać ich pastaŭščyki nie źbirajucca, pakolki nieviadoma, što budzie sa śviežymi pastaŭkami, dy i pakupniki ŭsio roŭna biaruć zapčastki pa vysokich cenach, pakolki dziavacca niama kudy», — pryznajecca śpiecyjalist.
Asabliva vostra staić pytańnie z matornymi alivami.
«Jany praktyčna nie pastaŭlajucca, niama alivaŭ Lotos, pieryjadyčna źnikaje Total, jość prablemy navat z «Łukojłam». Rasijanie admaŭlajucca jaho nam adhružać, pakolki im u pieršuju čarhu nieabchodna zabiaśpiečyć svoj rynak. Z-za sankcyj, jość pieraboi ŭ pracy na rasijskich zavodach, jakija vypuskali alivy impartnych brendaŭ. Vybar zapčastak taksama prykmietna skaraciŭsia, pa niekatorych pazicyjach zamiest 5-6 varyjantaŭ ad roznych vytvorcaŭ moža być dastupny tolki adzin».
«Adkryvać u ES firmu, kab abychodzić abmiežavańni, ja nie hatovy»
Druhi naš surazmoŭca z aŭtamabilnaj śfiery impartuje materyjały dla kuzaŭnoha ramontu. Pa jaho słovach, niekatoryja vytvorcy ŭ ES admovilisia ad supracoŭnictva ź Biełaruśsiu.
«Pa niekatorych brendach jość surjoznyja prablemy, vytvorca nie choča z nami pracavać, bo baicca trapić pad sankcyi. Tamu pakul spynienyja pastaŭki tavaraŭ litoŭskaj firmy Soll. Jość pieraboi z pastaŭkami farbaŭ z Hiermanii. Adkryvać u ES firmu, kab abychodzić hetyja abmiežavańni, ja pakul nie hatovy. Abjomy nie takija ŭžo vialikija, dy i niezrazumieła, kolki hetaja situacyja praciahniecca. U lubym vypadku, adkryć firmu ŭ ES heta taksama dadatkovyja vydatki», — adznačaje pradprymalnik.
Sabiekošt dastupnych dla impartu tavaraŭ dla Biełarusi vyras na 20-25%.
«U pieršuju čarhu, vielmi mocna padaražeła dastaŭka. Raniej z Varšavy da Minska pieravozčyk braŭ 600-700 jeŭra. Ciapier z Varšavy da TŁC viazuć za 1000-1100, da hetaha treba dadać dastaŭku da Minska. U vyniku transpartnyja vydatki pavialičylisia ŭdvaja. Na nievialikaj kolkaści tavaru heta istotnyja sumy», — reziumavaŭ pradprymalnik.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama: «Ciažka ŭjavić, kab bujnyja kampanii pieravozili sotni ci miljony dalaraŭ hatoŭkaj». Ekanamist — pra novaje rašeńnie ŭładaŭ pa valucie
Bloomberg: Biełaruś upieršyniu abahnała Hiermaniju pa pastaŭkach tavaraŭ u Rasiju
