Cichanoŭskaja zaklikała Łatviju dapamahać paciarpiełym ad represij biełarusam i pašyryć prahramy dla ich.
Paśla taho jak Cichanoŭskaja padziakavała narodu Łatvii za padtrymku biełaruskaj hramadzianskaj supolnaści i salidarnaść, jakaja była z samaha pačatku pratestaŭ u krainie, jana spyniłasia na represijach, jakija praciahvajucca ŭ Biełarusi.
«U krainu viarnuŭsia stalinski teror. Viernyja savieckim idejam i Kramlu ŭłady zakryvajuć vydaviectvy, što drukujuć knihi na biełaruskaj movie. Aryštoŭvajuć pradprymalnikaŭ, jak Pavieł Biełavus, jakija pracujuć u kramach, dzie možna nabyć biełaruskuju simvoliku. Ludziej, jakija vystupajuć za jeŭrapiejskuju demakratyčnuju budučyniu asudžajuć na stalinskija terminy.
U savieckija časy ŭ Łatvii byli viaźni sumleńnia, jakija prachodzili praz łahiery nie adzin i nie dva razy — takija jak Hunars Astra, Ints Calitys abo Lidzija Daronina-Łasmanie. Na žal, takija ž viaźni sumleńnia jość u sučasnaj Biełarusi. Siarod ich — palityk Mikałaj Statkievič, jakoha pakarali 14 hadami turmy, a taksama pradprymalnik Mikałaj Aŭtuchovič, jakomu ŭ najbližejšy čas pahražaje śmiarotny prysud… Pavodle novaha zakona, śmiarotnaje pakarańnie moža pahražać i za biaskryŭdny pratest, i navat za namier. Meta zakona — spynić ludziej stracham».
Śviatłana čarhovy raz abvinavaciła Łukašenku ŭ tym, što jon tolki vykonvaje zahady Pucina, pry hetym sprabujučy vydać siabie za achviaru, i prosić źniać sankcyi.
Taksama Cichanoŭskaja ŭspomniła dziejańni telehram-kanałaŭ i ludziej, jakija zapavolvali čyhunačny ruch u Biełarusi, kab nie dazvolić rasijskim vojskam bieśpieraškodna traplać va Ukrainu.
«Siońnia my znachodzimsia na histaryčnym razdarožžy. Isnujuć tolki dva šlachi — abo jeŭrapiejskaja demakratyčnaja Biełaruś, abo de-jure akupacyja Rasijaj i šmathadovaja izalacyja, rehres i biaspraŭje».
U svaim vystupie biełaruskaja lidarka zaklikała Łatviju znajści mahčymaść vydavać biełarusam vizy i adnavić vydaču dazvołaŭ na žycharstva, a taksama pavialičyć kolkaść studenckich stypiendyj, stvaryć prahramy dla biełaruskich daśledčykaŭ, navukoŭcaŭ, žurnalistaŭ, kulturnych aktyvistaŭ. Jana adznačyła, što biełaruskija niezaležnyja ŚMI «supraćstajać savieckamu aŭtarytaryzmu Łukašenki i prapahandzie Kramla».
Akramia taho, Cichanoŭskaja zaklikała dapamahčy biełaruskim firmam u rełakacyi biznesu, dać im dostup da finansavańnia i dziaržaŭnych prahram padtrymki. A dla biełaruskich studentaŭ paprasiła arhanizavać stažyroŭki ŭ Siejmie Łatvii, kab zatym hety dośvied byŭ skarystany na karyść Biełarusi.
