«Odekabešniki, vy čamu maŭčycie? Čamu nie kažacie pra svaich susiedziaŭ? Čamu vy nie starajeciesia zrabić tak, kab vajna skončyłasia? Čamu ŭ vas niama pazicyi suprać banderaŭcaŭ, nacykaŭ i fašystaŭ, jakija zabivali našych prodkaŭ? My ž razam vajavali suprać Bandery. A ciapier, jak ni ŭ čym nie byvała, bajučysia sankcyj Amieryki ci Jeŭropy, usie maŭčycie», — skazaŭ Kadyraŭ u videazvarocie ŭ svaim telehram-kanale.
Kiraŭnik Čačni zaklikaŭ kiraŭnikoŭ dziaržaŭ ADKB abjadnacca i «skazać svajo słova», pakul nie pozna.
«Kali jość dziaržava, kali jość sajuźnik, jon musić vyznačycca i zrabić svoj krok. Kali pamiž Armienijaj i Azierbajdžanam była vajna, klučavuju rolu zhraŭ Pucin. Kali Kazachstan pačaŭ hublać suvierenitet, chto dapamoh? Rasija! A kali Rasii treba, usie maŭčycie — baiciesia sankcyj», — dadaŭ Kadyraŭ.
Što takoje ADKB?
Arhanizacyja Dahavora ab kalektyŭnaj biaśpiecy — vajenna-palityčny sajuz, stvorany dziaržavami SND na asnovie Dahavora ab kalektyŭnaj biaśpiecy, padpisanaha 15 maja 1992 hoda. U ADKB uvachodziać Rasija, Biełaruś, Armienija, Kazachstan, Kyrhyzstan i Tadžykistan.
Reakcyja krain ADKB na vajnu va Ukrainie
17 červienia prezident Kazachstana Kasym-Žomart Takajeŭ u prysutnaści Pucina nazvaŭ DNR i ŁNR «kvazidziaržaŭnymi terytoryjami», dadaŭšy, što Kazachstan nie pryznaje niezaležnaść samaabvieščanych respublik.
16 maja ŭ Maskvie adbyłasia sustreča kiraŭnikoŭ krain-udzielnic ADKB. U adkrytaj častcy samita pra vajnu va Ukrainie kazali tolki Uładzimir Pucin i Alaksandr Łukašenka. Paśla sustrečy ŭdzielniki vypuścili zajavu, u jakoj nie zhadvałasia vajna va Ukrainie.
U studzieni 2022 hoda Biełaruś, Rasija, Tadžykistan i Armienija nakiravali svaich vajskoŭcaŭ dla padaŭleńnia pratestaŭ u Kazachstanie.
Adnak paśla ŭvarvańnia Rasii va Ukrainu ŭsie krainy ADKB, akramia Biełarusi, dystancyjavalisia ad Rasii i nie padtrymali jaje padčas hałasavańnia ŭ AAN. U toj ža čas terytoryja Biełarusi vykarystoŭvałasia dla bambardziroŭki Ukrainy, a rasijskija vojski ź Biełarusi sprabavali zachapić Kijeŭ.
