Taćcianie (imia źmienienaje) 32 hady. Najbližejšyja niekalki hadoŭ zavodzić dziaciej jana nie płanuje.
«Chacia maja maci, naprykład, naradziła mianie ŭ 24 hady. Svajaki kažuć, što ja ŭžo stračanaja, i pastajanna cikaviacca, kali ŭžo budzie dzicia. Razdražniaje vielmi, kaniečnie. Partniora ŭ mianie niama, ja nie sustreła jašče mužčynu, ad jakoha b chacieła naradzić. I ŭvohule niejkich surjoznych adnosin u mianie nie było», — raskazvaje žančyna.
Siarod pryčyn, čamu jana nie choča naradžać dziaciej, Taćciana taksama adznačaje, što ŭ jaje jość šmat psichałahičnych prablem ź dziacinstva i strach samoha pracesu rodaŭ.
«Z maci ja nie vielmi siabravała ŭ dziacinstvie, — pryznajecca jana. — Baćki raźvialisia, maci spačatku ŭpała ŭ depresiju, a potym pačała aktyŭna hulać. Ale sprava nie ŭ hetym. Maje hałoŭnyja pytańni — ci narmalna, što ja nie chaču zavodzić dziaciej i jak reahavać na asiarodździe, jakoje hetaha patrabuje».
Što ŭpłyvaje na žadańnie zavodzić dziaciej?
Pra situacyju parazmaŭlali ź siamiejnym i repraduktyŭnym psichołaham, hieštalt-terapieŭtkaj Hannaj Matulak. Jana tłumačyć:
«Jość šmat nieśviadomych matyvaŭ, jakija my nie možam kantralavać. Pieršaje — žadańnie pražyć inakš svajo dziacinstva. Naprykład, kali ŭ žančyny nie było baćki, jana vychodzić zamuž za dobraha mužčynu i ŭjaŭlaje, što jon budzie vydatnym baćkam.
Druhoje — nieśviadomaje žadańnie adździalicca ad baćkoŭskaj siamji. Pry hetym para moža žyć samastojna fizična i finansava, ale emacyjna zastavacca ŭ mocnaj suviazi, jakaja moža razburycca, kali źjavicca svajo dzicia. Naprykład, žančyna dumaje, što kali stanie maci, to adnaznačna budzie darosłaj».
Śviadomyja matyvy bolš vytłumačalnyja: u pary jość kvatera, mašyny, peŭny ŭzrost, dachod — čas zadumacca pra naščadkaŭ.
Heta ŭsio dziejničaje jak u žančyn, tak i ŭ mužčyn?
«Tak, ale jość nievialikija adroźnieńni. Žančyna vučycca być mamaj va ŭłasnaj maci, adbyvajecca adpaviednaja identyfikacyja. I ŭ hetym vypadku praces u siłu roznych umoŭ i pryčyn moža być parušany», — raskazvaje psichołah.
Naprykład, adnosiny z maci mohuć być takija kanfliktnyja i składanyja, što dziaŭčyna, adčuvajučy patrebu ŭ identyfikacyi, nie žadaje być padobnaj da jaje.
Ci abumoŭlenaje žadańnie naradzić dzicia fizijałahičnymi patrebami?
«Fizijałohijaj nie abumoŭlena, heta bolš pra frazu daktaroŭ «u vas uzrost, treba ŭžo naradžać». Čałavieku moža padabacca žyćcio, jakoje ŭ jaho jość ciapier. Jon dasiahnuŭ materyjalnaha dabrabytu i maje pracu, jakaja jaho zadavalniaje. Ale nibyta nie ŭsio dobra, tamu što ŭ socyumie pryniata, što žančyna pavinna stać mamaj — uračy źviartajuć uvahu na ŭzrost, a baćki cikaviacca, dzie ŭnuki. I byvaje, što žančyna pačynaje iści ŭ heta, nie vielmi chočučy, ale hruntujučysia na niejkich łahičnych pierakanańniach», — tłumačyć Hanna Matulak.
Psichołah padkreślivaje, što praz unutrany kanflikt navat sama ciažarnaść moža nie nastupać.
«Časam žančynam byvaje składana paśla naradžeńnia dziciaci, bo čakańni mohuć vielmi adroźnivacca ad realnaści. Treba zaŭsiody razumieć, što maciarynstva — heta praca. Pryniata pisać, što heta najvyšejšaja misija žančyny i što adrazu źjaŭlajecca luboŭ, jakaja daje siły. Nasamreč, heta surjoznyja fizičnyja i emacyjnyja ŭkładańni. I da hetaha treba być hatovym.
Ci hatovyja vy zaraz pastavić svajo žyćcio na paŭzu? Dobra było b sumlenna adkazać na pytańnie, nie trymacca na iluzijach, što ź dziciom ničoha nie źmianicca: i pracavać budu, i padarožničać, i realizoŭvacca. Heta paźbiahańnie realnaści, jakaja moža być usiakaj».
Mnohija biełarusy ciapier znachodziacca ŭ niestabilnym stanoviščy jak unutry krainy, tak i za miažoj. Jak upłyvajuć takija źniešnija faktary na žadańnie zavieści dzicia?
Tut dva varyjanty reakcyi. Z adnaho boku, hety strach pieravažvaje, a čałavieku treba być u biaśpiecy, kab rašycca na dzicia. Jość tyja, chto adkładvaje hetaje pytańnie da dasiahnieńnia stabilnaha stanu.
Inšyja naadvarot pačynajuć płanavać. Bačać taki sens: maciarynstva mianie moža maksimalna zaziamlić. Emocyi, jakija supravadžajuć etap ciažarnaści i naradžeńnia dziciaci, mohuć stać resursna važnymi dla čałavieka.
Jak zrazumieć, što vy hatovyja da naradžeńnia dzicia?
«Pa-pieršaje, spytać siabie, čamu ciapier hetaje pytańnie ŭźnikła? Čym napoŭnieny fon majho žyćcia, u jakim hetaja ideja źjaviłasia? Matyvy mohuć być nie vidavočnyja. Naprykład, žonka daviedałasia pra zdradu muža, jany byccam by hetuju temu zakryli i pačali płanavać dzicia. Hetaje rašeńnie vystupaje tut sprobaj zmacavać adnosiny», — tłumačyć Hanna Matulak.
Pa-druhoje, treba razabracca, ci niama ŭ vas kanfliktaŭ z baćkami. Pa-treciaje, zadać sabie pytańnie, ci padabajecca u cełym vaša žyćcio.
«Kali žančyna žadaje naradzić dzicia, tamu što joj nadakučyła praca i jana nie choča šukać novuju, joj zručniej syści ŭ dekret, to ciažarnaść nie vyratuje jaje ad prablem, a naadvarot ich dadaść, — miarkuje psichołah. — Varta padumać, ci hatovyja vy da kampramisaŭ, na jakija treba budzie pajści sa źjaŭleńniem dziciaci. Jakoj by aktyŭnaj mamaj vy ni byli, vy nie zmožacie niekudy sarvacca nočču. Ciapier sustreču ź siabroŭkaj treba płanavać».
Ci jość uzrost, u jakim źjaŭlajecca žadańnie zavieści dzicia?
Čaściej žančyny mohuć adznačać žadańnie zavieści dzicia ŭ tym uzroście, u jakim ich naradziła maci.
«Ukłaścisia ŭ niejkija narmatyvy tut nielha. Ciapier žančyny stali bolš volnyja. Jany mohuć vybirać, naradžać dziaciej ci nie, u jakim uzroście, ź jakim partnioram», — kaža psichołah.
Na rašeńnie nie mieć dzicia ŭpłyvaje naš ułasny dziciačy vopyt. Čałaviek moža jamu supraciŭlacca abo zachoča pražyć toj vopyt inakš.
Jak reahavać na asiarodździe, jakoje patrabuje naradzić dzicia?
«Spyniać, — raić psichołah. — Heta ŭsio roŭna, jak da vas padydzie čałaviek i spytaje, kolki ŭ vas hrošaj u kašalku. Heta asabistaja sprava, jakaja nikoha nie tyčycca. Važna vučycca baranić siabie i svaje miežy.
Ja svaju starejšuju dačku ŭ adkaz na prośbu svajakoŭ pakazać dziońnik z adznakami navučyła pytacca: jaki ŭ vas zarobak? Moža być, heta hruba hučyć, ale dziejsna. Možna taktoŭna pacikavicca pra płany na repraduktyŭnaje žyćcio, ale nie davać parady i rekamiendacyi».
Na pytańni svajakoŭ možna adkazvać tak: «ja nie chaču z vami heta abmiarkoŭvać», «heta asabistaja tema», «vy daviedajeciesia pra heta pieršymi».
«Adna maja klijentka kaža tak: «U nastupny čaćvier my z mužam budziem pradprymać čarhovuju sprobu abzavieścisia patomstvam u 21:30, možacie prysutničać». Heta adekvatny adkaz na toje ŭmiašańnie, jakoje adbyvajecca», — kaža Matulak.
Što rabić, kali čałaviek škaduje, što naradziŭ dzicia?
«Tut adnaznačna varta źviarnucca da psichaterapieŭta. Čałaviek sutykajecca z raźbitaj iluzijaj. Nieśviadoma spadziavajecca, što, naradziŭšy dzicia, pražyvie svajo dziacinstva nanova. A tak nie atrymlivajecca, nadychodzić rasčaravańnie, jakoje pryvodzić u tupik. Emacyjna ciažka, a jašče i maciarynskija funkcyi treba vykonvać», — kaža jana.
Ci narmalna ŭ 35 hadoŭ nie chacieć naradzić dzicia?
«Tak. Narmalna ŭsio, što nie parušaje miežy inšych ludziej, — adznačaje Hanna Matulak. —
Vy adkazvajecie za svajo žyćcio i vyrašajecie, što ŭ im budzie. I kali my havorym ab pary, to prymalna ŭsio, što ličycca ŭ joj narmalnym.
Siamja pryniała rašeńnie, što ciapier nie hatovaja da źjaŭleńnia dziaciej. Jość šmat inšych mahčymaściaŭ realizacyi siabie».
Pra što havoryć žadańnie žančyny naradzić dla siabie?
Čaściej za ŭsio takim čynam žančyna choča zakryć adno sa svaich zapatrabavańniaŭ. Tut moža być šmat varyjantaŭ: vyratavacca ad adzinoty, atrymać luboŭ, jakoj nie chapiła ad baćkoŭ, adčuć svaju patrebnaść.
«Atrymlivajecca takaja manapolija na dzicia. Ale ŭźnikajuć pytańni: ci zmoža jana adpuścić svajo dzicia, jak budzie reahavać, kali ŭ jaho buduć partniory?
Kali dzicia pačnie realizoŭvać svaje zapatrabavańni, žančyna moža ŭsprymać heta jak zdradu.
Tamu tak šmat składanaściaŭ u dziaciej, jakija vychoŭvalisia adnym z baćkoŭ. Ale ŭdakładniu, što heta nie źjaŭlajecca kryteryjem niaščaścia. Tamu što jość poŭnyja siemji, dzie tyja ž prablemy.
A, naprykład, u vypadku, kali ŭ maci jość partnior (ale adnosiny nie zarehistravanyja), jana realizuje svajo asabistaje žyćcio i tady spakojna stavicca da staleńnia i sychodu z hniazda dziciaci», — padsumoŭvaje psichołah.
Čytajcie taksama:
Čamu nie dapamahajuć pachody da psichołaha i jak z hetym być?
«Žyvu z pachavymi halucynacyjami. Smuzi dla mianie — nievynosny smurod». 22-hadovy biełarus paŭtara hoda paśla kavidu ŭsio jašče pakutuje
