Bližej da Sievieradaniecka (dzie praciahvajucca žorstkija bai za kantrol nad terytoryjaj chimičnaha pradpryjemstva «Azot») rasijskija vajskoŭcy šturmujuć pasiołak haradskoha typu Sirocina — faktyčnuju ŭskrainu horada. Akramia taho, pa danych ukrainskaha hienštaba, armija RF rychtujecca farsiravać raku Sievierski Daniec, jakaja padzialaje Sievieradanieck i Lisičansk.
Hienštab paćviardžaje, što rasijskija vojski nie spyniajuć sprobaŭ pierarezać šašu Bachmut — Lisičansk, vielmi važnuju dla zabieśpiačeńnia ŭkrainskich vojskaŭ. Kab dasiahnuć hetaj mety, jany «sprabujuć avałodać kamandnymi vyšyniami ŭ rajonie Bierastovaha» (nasieleny punkt na trasie ŭ Danieckaj vobłaści).
Pavodle źviestak Hienštaba, rasijskija vojski taksama viaduć nastup u kirunku Bachmuta i pierakinuli siudy adnu bataljonna-taktyčnuju hrupu sa składu Centralnaj vajskovaj akruhi.
Na Charkaŭskim kirunku, jak paviedamlajuć ukrainskija vajskoŭcy, rasijskaje vojska «zasiarodžvaje asnoŭnyja namahańni na niedapuščeńni vychadu sił abarony ŭ tył hrupoŭki akupacyjnych vojskaŭ, jakaja dziejničaje na Słavianskim kirunku». Tut Hienštab maje na ŭvazie sproby USU vieści nastup u rajonie Iziuma, a taksama bližej da miažy z Rasijaj (kab pierarezać šlachi zabieśpiačeńnia armii RF praz Vaŭčansk i Kupiansk).
Jak adznačaje ŭkrainski Hienštab, na Słavianskim kirunku rasijskija vajskoŭcy majuć namier prymianić ciažkija ahniamiotnyja sistemy. «Z metaj uzmacnieńnia hrupoŭki vojskaŭ u rajonie horada Izium praciŭnik pieramiaściŭ da dvuch tankavych padraździaleńniaŭ», — skazana ŭ paviedamleńni.
Na Paŭdniovabuhskim kirunku armija RF «asnoŭnyja namahańni zasiarodžvaje na niedapuščeńni praviadzieńnia našymi vojskami kontrnastupalnych dziejańniaŭ u Chiersonskaj i Mikałajeŭskaj abłaściach», paviedamlaje Hienštab VSU. Ukrainskija vajskoŭcy nie vyklučajuć nastupleńnia praciŭnika ŭ napramku Kisialoŭki (hety nasieleny punkt kala Chiersona USU niadaŭna viarnuli pad kantrol) z metaj vychadu na administracyjnyja miežy Chiersonskaj vobłaści.
Pavodle acenki Hienštaba USU, «u hatoŭnaści da ŭžyvańnia rakietnaha ŭzbrajeńnia ŭ akvatoryi Čornaha mora znachodziacca piać nośbitaŭ kryłatych rakiet marskoha bazavańnia typu «Kalibr» (sumarny załp — da 40 rakiet)».
