Pa-pieršaje, handal jak z Rasijaj, tak i z Kitajem dla Biełarusi ŭ častcy tavaraŭ zaŭsiody składvaŭsia nie na karyść našaj krainy.
Rasija i KNR pastaŭlajuć na naš rynak značna bolš tavaraŭ, čym my pastaŭlajem im.
Pa-druhoje, admoŭnaje salda handlu z Rasijaj źjaŭlajecca vielmi značnym i adnačasova schilnaje da istotnych vahańniaŭ, pakolki ŭ asnovie pieravyšeńnia impartu nad ekspartam tut lažać enierharesursy. Ceny na ich źmienlivyja, jak i abjomy, jakija pastaŭlajucca ŭ Biełaruś dla vykarystańnia i pierapracoŭki.
Što tyčycca stabilna admoŭnaha salda ŭ handli tavarami z Kitajem, to možna bačyć jaho ŭpeŭnieny rost pa miery pašyreńnia supracoŭnictva dźviuch krain.
Admoŭnaje salda handlu z Rasijaj za košt kupli syraviny i enierhanośbitaŭ dazvalała Biełarusi vyrablać tavary, jakija zatym znachodzili pakupnika na inšych zamiežnych rynkach. Va ŭmovach ich zakryćcia pytańni metazhodnaści takoj struktury handlu z uschodnim susiedam robiacca vielmi aktualnymi: skaračeńnie pastavak enierhanośbitaŭ, biezumoŭna, źnizić admoŭnaje salda handlu tavarami, ale adnačasova pastavić u składanaje ekanamičnaje stanovišča mnohija pradpryjemstvy ŭ Biełarusi, źviazanyja ź pierapracoŭkaj rasijskaj syraviny.
Admoŭnaje salda handlu z Kitajem budzie tolki narastać, bo mienavita tam biełaruski i rasijski biznes bačyć adkaz na prablemu kupli kamplektujučych, jakija praz sankcyi pierastajuć pastaŭlacca ad zachodnich kampanij.
Pryčym u vypadku, kali zamianić peŭnyja detali nie budzie mahčymaści, kuplać impartny pradukt całkam pryjdziecca, chutčej za ŭsio, tam ža. A heta, u svaju čarhu, jašče macniej pavialičyć kitajski impart.
U toj ža čas pastaŭki na rasijski i kitajski rynak našych tavaraŭ vyklikajuć šmat pytańniaŭ jak z punktu hledžańnia łahistyki, tak i z punktu hledžańnia kankurentazdolnaści. Biezumoŭna, častka biełaruskich tavaraŭ znojdzie novyja nišy na rasijskim rynku, u pieršuju čarhu za košt źnižeńnia kankurencyi z-za sychodu zamiežnych kampanij. Ale daloka nie ŭsie biełaruskija vytvorcy znojduć u Rasii novy rynak zbytu.
Pastaŭki ž tavaraŭ u Kitaj u vialikich abjomach ciažkija, pakolki daražejuć pieravozki, daŭžejuć łancužki pastavak, dy i kankuravać z kitajskimi tavarami na kitajskim ža rynku — sprava vielmi składanaja.
Takim čynam, na słovach rasijski i kitajski rynak biazdonnyja i vielmi vyhadnyja biełaruskim vytvorcam. Ale heta ŭsio ž papulizm, i nie bolš taho.