Minski mikrarajon Uručča. Fota: panarama Yandex
Siamja, jakaja zdymaje dvuchpakajoŭku ŭ staličnym Uruččy, raskazvaje, što znajšła padychodziačuju kvateru i padpisała damovu za dva dni da pačatku vajny. Da hetaha jany davoli doŭhi čas šukali žytło ŭ biudžecie da 250 dalaraŭ, ale biespaśpiachova.
«Padčas pošuku my i sami telefanavali haspadaram, i abjavu na Onliner raźmiaścili, što siamja šukaje kvateru, ale da lutaha nam amal nichto ničoha nie prapanavaŭ, a tut sami haspadary patelefanavali i zaprasili pahladzieć», — uzhadvajuć surazmoŭcy.
Paśla zasialeńnia ŭ kvateru navasioły nie paśpieli źniać abjavu z Onliner — i ich zavalili zvankami z prapanovami.
«Paśla 24 lutaha nam pačali telefanavać amal štodnia, pakul my narešce nie vydalili hetuju abjavu, bo kvatera, u jakuju my zasialilisia, nam padabajecca i my nie stali šukać bolš vyhadnych varyjantaŭ.
Što tyčycca staŭki arendy, to jana nijak nie źmianiłasia, ale, kali dalar byŭ pad 4 rubli, to my damovilisia, što budziem płacić sumu, ekvivalentnuju 700 rublam. A kali kurs staŭ nižejšym, to stali znoŭ płacić 250 dalaraŭ».
Inšy mužčyna zdaje kvateru ŭ Minsku hramadzianam Ukrainy, jakija ŭžo nie pieršy hod žyvuć u Biełarusi. Paśla pačatku vajny, kali rubiel pačaŭ prasiadać, mužčyna na 20% pamienšyŭ staŭku arendy.
«Paśla rubiel umacavaŭsia, ale pamier arendnaj płaty ja ŭžo nie viartaŭ na davajenny ŭzrovień, a pakinuŭ jaho źnižanym», — kaža surazmoŭca.
Čytač z Hrodna zdaje vialikuju adnapakajoŭku z dobrym ramontam. U lepšyja časy jon zdavaŭ jaje za 200 dalaraŭ.
«Moj ciapierašni arandatar zajazdžaŭ u kvateru pa staŭcy 170 dalaraŭ, ale za apošni hod daviałosia troški źnizić canu da 150. Z červienia damovilisia, što jon praciahnie damovu, ale ŭžo pa 130 dalaraŭ», — kaža surazmoŭca.
Mužčyna pryznajecca, što vymušany iści na sastupki pa canie, bo ŭ Hrodnie staŭki pacichu padajuć, a kolkaść kvater, vystaŭlenych dla arendy, raście.
«Kali bačyš, što tabie patrapiŭsia adekvatny kvatarant, jaki zaŭždy ŭ čas apłočvaje arendu, padtrymlivaje žytło ŭ dobrym stanie i samastojna vyrašaje drobnyja prablemy, to lepiej zrabić źnižku, čym nieviadoma kolki čakać kahości inšaha», — padsumavaŭ surazmoŭca.
Druhi čytač z Hrodna zdymaje dvuchpakajoŭku za 150 dalaraŭ. Kali rubiel pačaŭ tańnieć, to haspadary sami patelefanavali jamu z vyhadnaj prapanovaj.
«Kali dalar byŭ pad 4 rubli, ułaśnik kvatery sam skazaŭ, što i dalej budzie ličyć dalar pa 2,5 rubla», — zhadvaje mužčyna.
Šmat chto z čytačoŭ źviartaje ŭvahu, što na pieryjad kursavych vahańniaŭ čaściej za ŭsio abodvum bakam atrymlivałasia damovicca ab tym, kab prynamsi na niejki čas zamacavać staŭku pa davajennym kursie.
«Zdajom adnapakajoŭku za 150 dalaraŭ. Kali kurs pačaŭ raści, to sami patelefanavali kvatarantam i paviedamili, što nie voźmiem ź ich ni hroša bolš, čym raniej. I kali što, to na vulicu taksama nie vykiniem.Tamu našy arandatary tak i raźličvajucca za kvateru pa letašnim kursie», — dzielacca ludzi.
Jašče adzin haspadar adnapakajovaj kvatery ŭ Minsku ŭ miežach druhoha kalca kaža, što zdaje jaje za 450 rubloŭ i nie źmianiaje košt arendy z 2020 hoda.
Amal usie surazmoŭcy ź liku arendadaŭcaŭ sychodziacca ŭ mierkavańni, što kali ŭ kvatery ŭžo praciahły čas žyvie čałaviek, jaki całkam ciabie zadavalniaje, to lepiej pajści na sastupki ci prosta zafiksavać canu ŭ rublach. Nikoli zahadździa nie viedaješ, ci nie budzie prablemnym nastupny kvatarant.
Ale byvajuć i inšyja situacyi, jak z našaj čytačkaj, jakaja da kursavoha skačka zdymała adnapakajoŭku ŭ minskim mikrarajonie Sucharava za 250 dalaraŭ.
«Kali kurs dalara byŭ 3,5 za rubiel, haspadynia zapatrabavała, kab ja płaciła ŭ dalarach, jana była nie hatovaja abmiarkoŭvać źnižku, abhruntoŭvajučy heta ciažkimi abstavinami. U vyniku ja vyrašyła źjechać. Ciapier taksama zdymaju vialikuju adnapakajoŭku (45 m²) u tym ža rajonie z dobrym ramontam za 650 rubloŭ u miesiac biez pryviazki da valuty».
Pa statystycy Realt.by, za maj kolkaść prapanoŭ pa arendzie kvater u Minsku ŭ bazie partała pavialičyłasia na 5% u paraŭnańni z krasavikom, tym časam jak kolkaść pošukavych zapytaŭ «źniać kvateru ŭ Minsku» źniziłasia na 5%.
Ahienctva «Tvaja stalica» daje nastupnyja ličby: kali ŭ studzieni siaredniaja cana za zdymnuju adnapakajoŭku była 220 dalaraŭ, to ŭ červieni — 194. Dvuška ŭ studzieni ŭ siarednim kaštavała 270 dalaraŭ na miesiacy, ciapier ža — 247.
Hrafiki cen pa bazie ahienctva «Tvaja stalica»
Čytajcie taksama:
«Kuplali dla dziaciej, a ciapier…» U Minsku ŭsio čaściej pradajuć «hołyja» kvatery va ŭžo zasielenych damach
Ad 11 tysiač dalaraŭ. Kolki kaštujuć i jak vyhladajuć samyja tannyja kvatery ŭ abłasnych centrach
«Miesca dla rełaksu i adpačynku». Jakija dačy pa canie da 15 000$ pradajuć niepadalok ad Minska
