«13 spraŭ u miežach 411-ha artykuła za apošni čas»
U čakańni chutkaha vyzvaleńnia ŭsio bolšaj kolkaści źniavolenych prynosiać drennuju navinu: vam vystaŭlena novaje abvinavačvańnie. Šokam dla mnohich stała situacyja z Kaciarynaj Andrejevaj, što musiła vyjści na svabodu vosieńniu, ale jaje abvinavacili ŭ «zdradzie dziaržavie». Asudžany da dvuch hadoŭ kałonii fihurant spravy piaciorki, jakaja paškodziła mašynu supracoŭnika Departamienta vykanańnia pakarańniaŭ Alaksandra Hiejca, Arciom Aniščuk musiŭ vyjści na volu 29 červienia, ale jaho znoŭ uziali pad vartu pa kryminalnaj spravie za «abrazu milicyjanta» ŭ zakrytym telehram-čacie ŭ vieraśni 2020 hoda.
Žurnalistki Darja Čulcova i Kaciaryna Andrejeva na sudzie. Ilustracyjnaje fota.
Aktyvistka z Pružan Alena Hnaŭk pieršapačatkova była asudžanaja pa spravie «charavodaŭ» na abmiežavańnie voli biez nakiravańnia, ale cisk na jaje nie spyniŭsia. Padčas chatniaj «chimii» piensijanierku zatrymlivali na sutki. A 17 červienia žančynu asudzili da 3,5 hoda kałonii (artykuł 367 — paklop u dačynieńni da prezidenta, artykuł 369-1 — dyskredytacyja Biełarusi). I heta tolki niekalki takich vypadkaŭ.
«Takija pakarańni źvierchu adbyvajucca ŭ roznych farmatach: časam heta novyja epizody, novyja kryminalnyja spravy, a časam — asudžeńnie nibyta za złosnaje niepadparadkavańnie administracyi papraŭčaj ustanovy (411 artykuł KK)», — raskazvaje juryst pravaabarončaha centra «Viasna» Pavieł Sapiełka.
Pavieł Sapiełka
Za apošni čas, pa acenkach pravaabaroncaŭ, było ŭzbudžana ci ŭžo razhledžana 13 spraŭ u miežach 411-ha artykuła (i heta tolki toje, pra što stała viadoma ad samich źniavolenych ci svajakoŭ).
Pieršaj žančynaj-palitźniavolenaj, asudžanaj paśla pratestaŭ 2020-ha pa artykule 411, stała, naprykład, aktyvistka z Bresta Palina Šarenda-Panasiuk.
Artykuł 411 Kryminalnaha kodeksa ŭvieś čas krytykavaŭsia pravaabaroncami, bo prymianiajecca jon dastatkova advolna, časam prosta, kab pakarać asabliva «svavolnych» źniavolenych, tych, chto na pohlad naziralnikaŭ, nie «vypraŭlajecca».
«Heta čysta techničnaja zadača: nakłaści niekalki spahnańniaŭ, adpravić čałavieka ŭ pamiaškańnie kamiernaha typu, paśla hetaha dačakacca ci spravakavać novaje parušeńnie i asudzić, u zaležnaści ad ciažkaści papiaredniaha prysudu, na termin da hoda ci dvuch hod.
Kab ciabie pakarali, dastatkova časam być niazhodnym ź situacyjaj, jakaja maje miesca ŭ turmie: kali tam, naprykład, jość padzialeńni na kasty, padtrymlivajucca roznaha kštałtu niefarmalnyja pryncypy i zabarony, źniavolenaha sprabujuć złamać, prymusić da niejkich pavodzinaŭ (stukać na tavaryšaŭ, naprykład)», — udakładniaje Pavieł Sapiełka.
Pravaabaroncy padkreślivajuć, što dla zapusku pakaralnaha miechanizmu dastatkova zusim farmalnaha parušeńnia, nievykanańnia niejkaha rasparadžeńnia administracyi: naprykład, asudžany byŭ zaŭvažany za tym, što ŭ niejki momant nie trymaŭ ruki za śpinaj ci, na pohlad administracyi, pavysiŭ hołas (za heta, jak stała viadoma na dniach, Viktar Babaryka pravioŭ u ŠIZA 10 sutak).
«Prablema ŭ tym, što niama niejkich pravił. Usio — na mierkavańnie administracyi, — zaŭvažaje pravaabaronca. — Achviarami takoha staŭleńnia stanoviacca absalutna roznyja ludzi z roznymi artykułami, z roznych miescaŭ adbyvańnia pakarańnia, tut nielha vyznačyć niejkuju tendencyju».
«U 2012 hodzie ŭ niepadparadkavańni administracyi vypraŭlenčaj ustanovy abvinavacili Daškieviča, u 2014-m — Dziadka»
Artykuł 411 — nie navinka pienitencyjarnaj sistemy. U 2012 hodzie ŭ niepadparadkavańni administracyi vypraŭlenčaj ustanovy abvinavacili Źmitra Daškieviča, u 2014-m — Mikołu Dziadka. Abodvum aktyvistam «vypisali» źvierchu pa hodu źniavoleńnia.
Ilustracyjnaje fota
«Adzinaje, dzie nie spracavaŭ instrumient z 411-m artykułam (nie viedaju, pa jakoj pryčynie — spadziajusia, tamu što sud padyšoŭ da spravy abjektyŭna) — heta kryminalnaja sprava ŭ dačynieńni da Andreja Bandarenki (eks-kiraŭnika pravaabarončaj arhanizacyi «Płatforma Inavejšn». — NN), jaki ŭtrymlivaŭsia spačatku ŭ kałonii, paśla ŭ turmie, budučy asudžanym za chulihanstva.
Jaho administracyja pieraśledavała ŭ suviazi z tym, što jon byŭ pravaabaroncam i litaralna pad samy kaniec terminu jamu vystavili novaje abvinavačvańnie i napravili ŭ sud spravu pa 411-m artykule. Ale Bandarenka byŭ u vyniku apraŭdany», — zhadvaje Pavieł Sapiełka.
«U vypadku z palitźniavolenymi my bačym, što nijakich umoŭna-daterminovych instytutaŭ nie pracuje»
Praciahnieńnie ŭtrymańnia za kratami i vynachodnictvy sposabaŭ jaho praciahnuć — adzin sa šmatlikich dadatkovych instrumientaŭ cisku na źniavolenych.
Ściah ź imionami biełaruskich palitviaźniaŭ aŭtarstva Maryi Hryc
«Z časoŭ svajoj advakackaj praktyki ja pamiataju hetyja momanty: voś skončyŭsia sudovy praces i razhlad spravy, ty siadziš z padabaronnym i pačynaješ pacichu ličyć: «Tak, my voś z takim vynikam, jość termin pazbaŭleńnia voli, ale voś jość roznaha kštałtu mahčymaści raniej, čym vyznačana sudom, vyjści na volu: umoŭna-daterminovaja zamiena pakarańnia na mienš ciažkaje, umoŭna-daterminovaje vyzvaleńnie. I atrymlivałasia tak, što mała chto z asudžanych pa šerahovych spravach na starcie raźličvaŭ całkam adbyć svoj termin — usie spadziavalisia, što pry narmalnych pavodzinach jany vyjduć na svabodu kudy raniej.
Ale ŭ vypadku z palitźniavolenymi my bačym vielmi jarka, što nijakich umoŭna-daterminovych instytutaŭ pakul nie pracuje, nie pracujuć zvyčajnyja formy skaračeńnia terminaŭ, i heta sapraŭdy instrumient cisku».
Čytajcie taksama:
Jak biełarusaŭ katujuć na Akreścina — śviedčańni źniavolenych, eks-supracoŭnika IČU, razvahi historyka ŭ filmie «NN»
«My vyjdziem ščylnymi radami». Padrabiaznaści taho, što adbyvajecca na pracesie Aŭtuchoviča, uražvajuć i vymušajuć zadumacca
«Minimum 263 zatrymańni za miesiac». Kaho zaraz najpierš «kašmarać» siłaviki i jak vyličvajuć niazhodnych
