Fota: BNS
Na mierapryjemstvie prysutničaŭ i kiraŭnik kampanii-vytvorcy dronaŭ Baykar Defence Chałuk Bajraktar — ziać tureckaha prezidenta Redžepa Taipa Erdahana. Jon zajaviŭ, što ŭ Turcyi takoha — ažyjatažu z-za adpraŭki Ukrainie «Bajraktara» — niama.
Fota: BNS
«Bajraktar staŭ simvałam nadziei i supracivu. I hetaja kampanija pačałasia ŭ Litvie. Sotni tysiač ludziej dałučylisia da hetaj spravy. Jak kampanija, my chacieli zrabić niešta bolšaje, nie mahli pradać, tamu vyrašyli dałučycca da hetaj kampanii i pieradać «Bajraktar» jak padarunak. Ja hanarusia, što ciapier tut, ja ździŭleny takoj uvahaj», — skazaŭ Chałuk Bajraktar.
Akramia taho, padčas adpraŭki bieśpiłotnika prysutničali inicyjatar akcyi, litoŭski žurnalist Andrus Tapinas, ambasadar Ukrainy ŭ Litvie Piotr Biešta i ministr abarony Litvy Arvidas Anušaŭskas.
Fota: BNS
«Ja vielmi natchniony lidarstvam litoŭskaj nacyi. U ich ujaŭleńni, kali treba zrabić pravilnuju reč, to ništo nie pieraškodzić. Vialiki dziakuj usim im, pakolki ŭsie jany prykłalisia i pieradali srodki dla hetaj nadzvyčajnaj ptuški», — skazaŭ pasoł.
Nahadajem, žurnalist Andrus Tapinas 25 maja pačaŭ kampaniju zboru srodkaŭ na «Bajraktar» Ukrainie, zajaviŭšy, što atrymaŭ zhodu na takuju patencyjnuju zakupku ad ministerstvaŭ abarony Litvy i Turcyi i vytvorcy.
Užo na druhi dzień sabranaja suma składała bolš za try miljony jeŭra. Da kampanii dałučyłasia ŭ tym liku eks-prezidentka krainy Dala Hrybaŭskajcie, prezident Hitanas Naŭsieda, premjer Inhryda Šymanicie i ministr abarony Litvy Arvidas Anušaŭskas, jakija na svaich staronkach u sacsietkach taksama zaklikali dałučacca ŭsich nieabyjakavych.
Zbor udałosia zakryć za try dni. Paśla hetaha tureckaja kampanija-vytvorca zajaviła, što kranutaja salidarnaściu litoŭcaŭ i tamu vyrašyła padaryć bieśpiłotnik, a sabranyja srodki možna budzie nakiravać na inšyja patreby Ukrainy.
