«Mienavita krainy Jeŭropy ŭ pieršuju čarhu adčuvajuć na sabie ŭsie niehatyŭnyja nastupstvy ad vajny»
Ekśpiert BEROC Anastasija Łuzhina adznačaje, što trend na źnižeńnie kursu jeŭra zaradziŭsia jašče kala hoda tamu, ale da pačatku vajny va Ukrainie mieŭ raściahnuty pa časie charaktar.
«Najbolš prykmietnym pasłableńnie jeŭra ŭ adnosinach da dalara ZŠA stała paśla pačatku vajennych dziejańniaŭ va Ukrainie. Pakolki kanflikt znachodzicca ŭ Jeŭropie, la samych miežaŭ ź ES, a nie dzieści pobač z ZŠA, to mienavita krainy Jeŭropy ŭ pieršuju čarhu adčuvajuć na sabie ŭsie niehatyŭnyja nastupstvy hetaha kanfliktu.
Na fonie vajny i ŭviedzienych sankcyj adbyŭsia razryŭ suviaziaŭ pamiž jeŭrapiejskimi krainami i Rasijaj, byli razburanyja łahistyčnyja łancužki, uźnikli prablemy z pastaŭkami enierhanośbitaŭ u Jeŭropu. Usio heta adbiłasia na roście inflacyi. Inviestary razumiejuć, što pobač ź miežami ES praciahvajecca vajenny kanflikt, što jość ryzyki, što z pačatkam vajny byli pierahledžanyja prahnozy pa roście VUP, što idzie pavieličeńnie inflacyi. Usio heta spryjaje tamu, što inviestary pačali šukać novyja krainy dla ŭkładańnia resursaŭ», — adznačaje ekanamist.
Štaty stali bolš pryvabnymi dla prytoku kapitału, čym ES
Inšym važnym faktaram, jaki ŭpłyvaje na kurs jeŭra, śpiecyjalist nazyvaje pavodziny Fiederalnaj reziervovaj sistemy ZŠA (dalej FRS).
«Jašče ŭ sakaviku, kali inflacyja ŭ ZŠA była vyšejšaj, čym u ES, FRS pačaŭ pavyšać ulikovuju staŭku na amierykanskim rynku. Heta ŭ svaju čarhu adbivajecca na roście ŭsich astatnich stavak, u tym liku na dachodnaści dziaržaŭnych kaštoŭnych papier. Pracenty pa kaštoŭnych papierach rastuć i, adpaviedna, raście popyt na ich z boku inviestaraŭ. Inšymi słovami, Štaty stali bolš pryvabnymi dla prytoku kapitału, čym ES», — adznačaje ekśpiert.
Z momantu pačatku vajny FRS užo trojčy padvyšaŭ staŭku i płanuje praciahvać heta rabić. U toj ža čas Jeŭrapiejski centralny bank pakul tolki płanuje pierajści da bolš žorstkaj manietarnaj palityki.
Pa słovach ekanamista, JECB dziejničaje bolš aściarožna, ale ŭsio ž płanuje pavysić staŭki ŭžo ŭ lipieni.
«ZŠA — heta choć i fiederatyŭnaja dziaržava, ale tym nie mienš adzinaja, tamu ŭ adroźnieńnie ad ES jany mohuć značna bolš apieratyŭna prymać jakija-niebudź rašeńni. U toj ža čas Jeŭrapiejski Sajuz bolš pavolny i aściarožny ŭ hetym pytańni, pakolki jamu treba ŭličvać intaresy ŭsich krain, jakija da taho ž mocna adroźnivajucca pamiž saboj. Tamu JECB troški adstaje ad FRS, što spryjaje pieratoku kapitału ź Jeŭropy ŭ Amieryku», — ličyć Łuzhina.
Na dziejańni Jeŭrapiejskaha centrabanka ŭpłyvaje taksama źnižeńnie prahnozaŭ pa roście VUP. Pavyšeńnie koštu hrošaj u ekanomicy moža jašče bolš zapavolić hety rost.
Nie śpiašajciesia biehčy ŭ abmieńnik
Havoračy ab prahnozach, ekanamist adznačaje, što ŭ bližejšy čas chutčej za ŭsio nie varta čakać surjoznych skokaŭ u pary dalar\ieŭra, pakolki JECB užo ŭ hetym miesiacy budzie źviartacca da pavyšeńnia staŭki.
«Vahańni ŭ lubym vypadku buduć, jeŭra moža jak źlohku adyhrać svaje pazicyi, tak i jašče trochi patańnieć. Ale nižej, čym 0,98-0,95 jeŭra za dalar, na moj pohlad, kurs u karotkaterminovym pieryjadzie nie apuścicca, tamu rezkich skokaŭ čakać nie varta», — ličyć ekśpiert.
Sychodziačy z hetaha, ekanamist nie rekamienduje biełarusam, jakija zachoŭvajuć aščadžeńni ŭ jeŭra, biehčy ŭ abmieńniki i mianiać ich na dalary. Pakolki, prajšoŭšy praz padvojnuju kanviersiju, vy ŭ lubym vypadku stracicie.
«U jakoj valucie ciapier lepš zachoŭvać źbieražeńni, šmat u čym zaležyć ad indyvidualnych faktaraŭ. Naprykład, kali vam treba niešta nabyvać u ES ci vy źbirajeciesia jechać tudy ŭ adpačynak, to rubli lepš adrazu mianiać na jeŭra, a nie kuplać dalary, kab potym mianiać ich i znoŭ hublać na kursie.
Kali ž kazać pra bolš praciahłuju pierśpiektyvu, to jak i ŭ raniejšyja časy varta dyviersifikavać svaje źbieražeńni. Formuła zachoŭvańnia hrošaj pa formule 50% u dalarach i 50% u jeŭra pa-raniejšamu zastajecca aktualnaj. Pakolki heta dźvie asnoŭnyja valuty, kurs pamiž jakimi zaŭsiody budzie mianiacca ŭ toj ci inšy bok».
Što źmienicca dla Biełarusi?
Dla samoha ES jość jak peŭnyja stanoŭčyja, tak i admoŭnyja momanty źnižeńnia jeŭra.
«Z adnaho boku nizki jeŭra — heta padaražeńnie resursaŭ, pakolki ceny na enierhanośbity tradycyjna vyličajucca ŭ dalarach, a ź inšaha — bolš vyhadnyja ŭmovy dla ekspartu, pakolki ceny na jeŭrapiejskija tavary stanoviacca bolš pryvabnymi. Choć z ekspartam nie ŭsio tak prosta, bo ŭ lubym tavary prysutničaje i niejkaja dola impartu. Darahi impart u svaju čarhu stymuluje inflacyju. Akramia taho pieratok kapitału z adnoj jurysdykcyi ŭ inšuju taksama niasie peŭnyja ryzyki».
Dla Biełarusi ž źmianieńnie suadnosin dalar/ieŭra ŭ cełym nie niasie ŭ sabie ničoha asablivaha. Možna było b vykazać zdahadku, što pry bolš słabym jeŭra impart ź ES stanovicca bolš tannym, ale tut treba ŭličvać uzrosłuju inflacyju ŭ jeŭrazonie, a taksama zakładańnie dadatkovych łahistyčnych vydatkaŭ i ryzyk imparciorami. Što tyčycca ekspartu ŭ ES, to jon abmiežavany sankcyjami. Treba taksama ŭličvać, što pa šerahu dahavoraŭ, naprykład, pa enierharesursach, valutaj kantraktu moža być dalar ZŠA.
Narešcie, varta ŭličvać, što ŭ Biełarusi kurs rubla adnosna jeŭra i dalara pierš za ŭsio zaležyć ad rasijskaha rubla. U apošnija miesiacy my nazirali jak pasłableńnie, tak i ŭmacavańnie biełaruskaha rubla da dalara i jeŭra.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Ekanamist: Ekspart źnižajecca, a nie raście, jak zajaŭlajuć ułady
Hadavaja inflacyja paskoryłasia da 17,6% u červieni
