Cudam uratavany Ivan z Paŭnočnaj Makiedonii. Fota: Newsflash
30-hadovy Ivan adpačyvaŭ na plažy paŭvostrava Kasandra ŭ Hrecyi, kali jaho i jašče dvuch mužčyn źniesła ŭ mora mocnaj chvalaj. Pavodle infarmacyi ratavalnikaŭ, Ivanu ŭdałosia ŭtrymacca na vadzie, ale supraciŭlacca adliŭnaj płyni jon nie zmoh i nieŭzabavie apynuŭsia ŭ adkrytym mory.
Siabry turystaŭ paviedamili pra źniknieńnie mužčyn u słužbu vyratavańnia, ale joj, kab pryjści na dapamohu, spatrebiŭsia čas.
Kala Ivana ž, jaki apynuŭsia ŭ krytyčnaj situacyi, prapłyvaŭ kalarovy nadzimany miačyk. I choć jon, pa słovach makiedonca, byŭ napałovu sadźmutym, heta ŭsio adno dapamahło jamu pratrymacca na vadzie amal 19 hadzin, pakul źnikłaha turysta nie adšukali ratavalniki. Taksama jany znajšli jašče adnaho mužčynu, a voś treciaha siabra znajści pakul nie ŭdałosia — jon usio jašče ličycca źnikłym bieź viestak.
Historyju šyroka aśviatlali hrečaskija ŚMI, i ŭ niejki momant na siužet pra Ivana na miascovym telebačańni natknułasia mama chłopčykaŭ, jakija zhubili miač. Jana paznała cacku i paviedamiła, što jaje dzieci, 11-hadovy Tryfan i šaścihadovy Tanos, stracili miačyk 30 červienia, hulajučy na vostravie Lemnas.
Lemnas znachodzicca prykładna za 130 kiłamietrach ad miesca vyratavańnia turysta, ale za paŭtara tydni miač adniesła płyńniu na zachad, bližej da paŭvostrava.
