Fota: fejsbuk Stryžaka
Andrej Stryžak piša ŭ fejsbuku:
«My prapanoŭvali kiraŭnictvu pałka Kalinoŭskaha pryniać ad nas sumu hrošaj, jakuju jany mahli b vykarystoŭvać samastojna, adnak atrymali admovu. Na siońnia heta pieradadzienyja biełarusami 40 tysiač jeŭra. Hetyja hrošy zareziervavanyja ŭ nas na rachunku i čakajuć tolki zapytu ad pałka. Asabistyja simpatyi ci antypatyi nie hrajuć nijakaj roli, kali havorka idzie pra našu ahulnuju spravu».
Stryžak tłumačyć, jak pracuje fond:
«Važna adznačyć, što my adkryvali zbor na ŭsich biełaruskich dobraachvotnikaŭ i pracujem pa zapycie. Kali jość zapyt na nabyćcio mašyny — kuplajem i dastaŭlajem mašynu. Kali jość zapyt na taktyčnuju miedycynu abo kaski — šukajem, zakazvajem, kuplajem i dastaŭlajem pa pryznačeńni. Naša rola nie zvodzicca vyklučna da zboru hrošaj».
Adkazaŭ Stryžak taksama na papularnaje pytańnie: za jakija hrošy žyvie jon sam i kamanda fondu.
«Abjom hrošaj, jaki my biarem sabie z publičnych zboraŭ — 0%. Usia suma danataŭ idzie na mety, nazvanyja ŭ zbory, za vyklučeńniem kamisij apłatnaj sistemy i bankaŭ. Administracyjnyja vydatki fondu (zarpłaty, ofisy i h.d.) pakryvajucca z troch asnoŭnych krynic finansavańnia: hrošy instytucyjnych fondaŭ, pryvatnyja donary, čajavyja», — piša suzasnavalnik «Bajsoł».
Ci pakidać čajavyja dla kamandy (jany mohuć być da 10% ad sumy danatu na zbor), donar vyrašaje sam.
Dapamoha, sabranaja fondam, raźmiarkoŭvajecca nastupnym čynam: 50% idzie zboru na dźvie klučavyja struktury biełarusaŭ na froncie — połk Kalinoŭskaha i Pahonia — i 50% na ŭsie astatnija hrupy i padraździaleńni (Litvin, Janki, Pramień i h.d.).
«Emocyi, ambicyi i praca śpiecsłužbaŭ pryvodziać da raspadu našaha adzinstva. Pryvodziać da taho, što demakratyčnyja siły pačynajuć vajavać adno suprać adnaho, a nie suprać našaha ahulnaha voraha — dyktatury. U hety składany čas ja chaču zaklikać usich svaich siabroŭ i vorahaŭ da adnaho: padtrymlivajcie materyjalna i maralna tych, kamu vy daviarajecie i kaho chočacie padtrymlivać. Danaćcie dobraachvotnikam naŭprost abo praz fondy, zakuplajcie i adpraŭlajcie dapamohu adrasna, padtrymlivajcie lubymi dastupnymi vam sposabami, tolki nie ŭzmacniajcie raskoł u našych šerahach. Sračy i skandały škodziać usim», — vykazaŭsia Stryžak.
