PVT razasłaŭ rezidentam list z nahadvańniem ab padrychtoŭcy paŭhadavych spravazdač. U liście (majecca ŭ rasparadžeńni redakcyi Dev.by) administracyja PVT «źviartaje ŭvahu na toje, što pamier adličeńniaŭ ad vyručki (dachodu) z 2 kvartała 2022 h. składaje 1 pracent».
U pres-słužbie PVT paćvierdzili, što staŭka viarnułasia da pieršapačatkovaha ŭzroŭniu.
Rezidenty pavinny adličvać adzin pracent ad vyručki ŭ fond PVT pavodle prezidenckaha Dekreta №12 ad 22 vieraśnia 2005 hoda.
U sakaviku 2022 hoda byŭ pryniaty ŭkaz «Ab dadatkovych mierach pa zabieśpiačeńni stabilnaha funkcyjanavańnia ekanomiki». Jon daŭ prava Saŭminu «źmianiać pamier adličeńniaŭ, jakija pravodziacca rezidentami PVT».
Nieŭzabavie Saŭmin skarystaŭsia hetym pravam i pavysiŭ staŭku adličeńniaŭ da 2% na pieršy kvartał 2022 hoda. Vierahodna, u budučyni Saŭmin znoŭ moža źmianiać staŭku.
Źviestki pra toje, kolki hrošaj u Fondzie PVT i jak jany vykarystoŭvajucca, nie publikujucca ŭ adkrytym dostupie. U dakryzisnyja časy hučali prapanovy ab tym, kab vykarystoŭvać hetyja hrošy na adukacyju «vajcišnikaŭ» (budučych ajcišnikaŭ). Pra paradak ličbaŭ možna mierkavać pa pamiery ekspartu rezidentaŭ PVT. U 2020 hodzie jon skłaŭ 2,7 młrd dalaraŭ, 1% ad hetaj sumy — 27 młn dalaraŭ. Pa vynikach 2021 hoda ekspart skłaŭ 3,2 młrd dalaraŭ, 1% ad hetaj sumy — 32 młn dalaraŭ, 2% — 64 młn dalaraŭ.
