«
«Łancet-3» — samy sučasny rasijski bieśpiłotnik
«Ministr abarony Rasii Siarhiej Šajhu niadaŭna zajaviŭ, što rasijskaja meta — heta źniščyć ukrainskuju dalnabojnuju rakietnuju artyleryju.
Heta śviedčyć pra toje, što Rasii ci patrebnyja baražujučyja bojeprypasy, ci jana ich užo chutka adpravić na pole boju», — skazaŭ vydańniu analityk Centra CNA i ekśpiert u pytańniach rasijskich bieśpiłotnikaŭ Semiueł Biendet.
U pieršyja miesiacy vajny rasijskija bieśpiłotniki-kamikadze nanieśli tolki niekalki ŭdaraŭ. Ale ciapier jany źjaŭlajucca na pieradavoj štodnia. Takaja zbroja zdolnaja zabiaśpiečyć mahčymaści, jakija ciapier vielmi patrebnyja Rasii, a mienavita znachodzić i źniščać mabilnyja celi typu HIMARS na vialikaj adlehłaści. Apieratar moža kiravać takim bieśpiłotnikam, šukajučy cel i zahadzia nie viedajučy jaje kaardynat.
Čaściej za ŭsio rasijskaja armija prymianiaje Kub-PŁA. Heta nievialiki aparat z razmacham kryłaŭ troški bolšym za mietr, elektramatoram i zdolnaściu nieści trochkiłahramovuju bojehałoŭku. Forbes piša, što rasijskija vajskoŭcy stali čaściej publikavać videa ŭdaraŭ, vykananych z dapamohaj Kub-PŁA, jakija byli źniatyja inšymi bieśpiłotnikami.
Ataki z dapamohaj takich rasijskich bieśpiłotnikaŭ nie vielmi ŭražvajuć. Chiba što tolki kali jany pravakujuć druhasny vybuch bojeprypasaŭ abo paliva achviary. Tamu raspaŭsiudžanaje pierakanańnie, što Kub-PŁA nieefiektyŭnyja.
Na samaj ža spravie, pakul mierkavać pra heta ciažka. Va ŭsiakim razie, nie padobna, kab hetyja bieśpiłotniki mocna pałochali ŭkrainskich vajskoŭcaŭ, u adroźnieńnie ad «Arłana-10». U apošniaha huk matora taki ž hučny, jak i ŭ mapieda. I kali vajskoŭcy jaho čujuć, značyć, varožy artyleryjski abo rakietny ŭdar niepaźbiežny.
15 lipienia taksama źjavilisia videa prymianieńnia rasijskaj armijaj bieśpiłotnikaŭ «Łancet-3». Jak i ŭ vypadku z Kub-PŁA, jaho vytvorčaściu zajmajecca kampanija Zala, jakaja naležyć kancernu «Kałašnikaŭ».
«Łacent-3» — heta taksama nievialiki pa pamierach aparat z trochkiłahramovym bojeprypasam. Mahčyma, heta navat taja ž samaja bomba. Ale hety bieśpiłotnik maje bolš sučasnuju kanstrukcyju i byŭ vyprabavany ŭ Siryi. Akramia taho, u «Łanceta-3» jość aŭtanomnyja mahčymaści.
Ekśpiert Hrehary Alen z centra CSIS zaŭvažaje, što zdolnaść Kub-PŁA samastojna šukać cel pierabolšanaja. Ale ŭ vypadku «Łanceta-3» nijakaha pierabolšańnia niama.
Bieśpiłotnik moža funkcyjanavać pad kiravańniem apieratara, moža samastojna nanosić udar pa zadadzienych kaardynatach abo vykonvać aŭtanomny palot nad peŭnym rehijonam u pošukach celi samastojna, biez umiašańnia čałavieka.
Heta robić jaho prydatnym instrumientam dla źniščeńnia HIMARS paśla taho, jak ustanoŭka vykanała streł. Adnak u Rasii niama dastatkovaj kolkaści takich aparataŭ, kaža Biendet. RF aficyjna nie paviedamlała pra kolkaść zakuplenych bieśpiłotnikaŭ. Ale, u adroźnieńnie ad usiudyisnych «Arłanaŭ-10», dronaŭ-kamikadze, padobna, u arsienale krainy nie vielmi šmat.
«Minabarony zajaviła ab žadańni atrymać takija mahčymaści. I ja ŭpeŭnieny, što zavod «Kałašnikava» ciapier pracuje zvyšuročna. Ale Rasii patrebnyja sotni takich bieśpiłotnikaŭ u niebie, kab heta mieła ŭpłyŭ na ŭkrainskija siły», — rastłumačyŭ ekśpiert.
Jašče adzin bieśpiłotnik, jakim moža skarystacca Rasija — heta «Łastaŭka-M». Faktyčna, heta anałah ukrainskaha bieśpiłotnika Punisher. Jon nievialiki pa pamierach i ŭzbrojeny dvuma snaradami vieličynioj z ručnuju hranatu.
U 2021 hodzie hety bieśpiłotnik udzielničaŭ u rasijskich vajennych vučeńniach «Zachad».
Niaŭradavaja arhanizacyja Conflict Armament Research zafiksavała, što na hetym tydni ŭkrainskija vojski ŭpieršyniu źbili «Łastaŭku-M». Tamu ŭ najbližejšy čas źjavicca bolš detalaŭ pra mahčymaści hetaha bieśpiłotnika. Adnak ličycca, što jon zdolny znachodzicca ŭ niebie niekalki hadzin, a snaradaŭ na jaho borcie chopić, kab źniščyć niebraniravanuju kołavuju bazu HIMARS.
«Ja dumaŭ pra toje, kali «Łastaŭka-M» debiutuje va Ukrainie. Dumaju, ich prosta nie tak užo i šmat», — skazaŭ Biendet.
Rasija chacieła b kupić bieśpiłotniki ŭ Kitaja, kab papoŭnić deficyt ułasnych aparataŭ. Adnak pakul niama nijakich prykmiet taho, što Piekin pahadziŭsia na heta.
Całkam mahčyma, što mienavita tamu Rasija apošnim časam sprabavała damovicca ab prodažy bieśpiłotnikaŭ ź Iranam.
Ciapier u Maskvy prosta niama dastatkovaj kolkaści aparataŭ-kamikadze, kab palavać na HIMARS. Adnak varta čakać, što ŭ najbližejšyja miesiacy i Ukraina, i Rasija buduć vykarystoŭvać bolš takich bieśpiłotnikaŭ.
