Eks-namieśnik ministra abarony Biełarusi Ŭładzimir Uschopčyk, jakoha šukaje Hienieralnaja prakuratury Litvy, adkazaŭ na pytańni radyjo «Svaboda».

Hienerał-lejtenant u adstaŭcy Ŭładzimier Uschopčyk, kamandzir vilenskaha harnizonu savieckaha vojska ŭ 1991 hodzie i były namieśnik ministra abarony Respubliki Biełaruś na pačatku 2000-ch hadoŭ, ciapier pracuje ŭ kampanii «Biełźniešpramservis».

Uładzimier Uschopčyk skazaŭ, što ni ad koha nie chavajecca i hatovy adkazać na našy pytańni. Ja nahadaŭ byłomu namieśniku ministra pra razmovu adnosna jaho, što viałasia ŭ Vilni padčas vizytu Alaksandra Łukašenki. «Kali jość pretenzii da tych, chto žyvie ŭ nas, tady jość mižnarodnyja praviły, u adpaviednaści ź jakimi vy možacie vystavić pretenzii», — adkazaŭ Alaksandar Łukašenka, pavodle jahonaj presavaj słužby, litoŭskim žurnalistam, jakija pacikavilisia, čamu Miensk nie vydaje Litvie Ŭładzimiera Ŭschopčyka. — «Kali łaska, pryviazicie materyjały, i my budziem prymać adpaviednyja rašeńni», — jašče cytuje presavaja słužba Alaksandra Łukašenku.

Ja zapytaŭ va Ŭładzimiera Ŭschopčyka, ci nie baicca jon, što ciapier jaho vydaduć u Litvu, dzie jaho padazrajuć va ŭdziele ŭ «sprobie pieravarotu» ŭ studzieni 1991 hodu? Na heta Ŭładzimier Uschopčyk adkazaŭ, što ni ŭ čym nie vinavaty:

Jak mahli zahinuć ludzi, kali ja navat nie davaŭ kamandy, kab asabovy skład atrymlivaŭ bojeprypasy?

«Toje, što pra mianie kažuć, byccam ja prymaŭ rašeńni, paśla čaho zahinuli ludzi, heta całkam niapraŭda. Jak mahli zahinuć ludzi, kali ja navat nie davaŭ kamandy, kab asabovy skład atrymlivaŭ bojeprypasy? I druhoje, heta bolš palityčnyja padziei. Vinavatych treba šukać nia ŭ Miensku, a ŭ inšym miescy».

Uładzimier Uschopčyk dahetul nie vyklučaje, što padziei studzienia 1991 hodu, kali padčas zachopu vajskoŭcami telecentru zahinuli mirnyja žychary, mahli być «pravakacyjaj», a «trupy da televiežy zvozilisia z usioj Litvy». Pry hetym hienerał nia kaža ŭsiaho, što viedaje pra ŭdzieł vajskoŭcaŭ u tym kanflikcie:

Karespandent: «A jak vy dumajecie, chto byli tyja sałdaty, jakija šturmavali televiežu?»

Uschopčyk: «Sprava nia ŭ tym, chto tam byŭ. Ja šmat viedaju, chto tam byŭ i adkul. Hetaje pytańnie treba adrasavać da Maskvy, da taho kiraŭnictva. A za svaich ja adkazvaju, što nivodzin patron dla hetych metaŭ nie patrapiŭ da sałdata ci aficera harnizonu».

Čamu pry hetym Uładzimier Uschopčyk uchilajecca ad razmovy ź litoŭskimi śledčymi, jakija raśśledujuć hetuju spravu i padazrajuć jaho va «ŭdziele ŭ sprobie pieravarotu»?

«Ja čamu źjechaŭ? Mianie pieraviali pavodle słužby. A ŭ Vilnius ja pryjechaŭ z Aŭhanistanu, Vilnius — pryhožy horad, pryhožaja kraina. Ja ŭvohule źbiraŭsia tam zastacca. A tut niejki pieravarot rabić mnie, kamandziru dyvizii? Śmiešna».

Karespandent: «A kali b vas zaraz vyklikali ŭ litoŭskuju prakuraturu, vy b źjavilisia?»

Uschopčyk: «U litoŭskuju prakuraturu? A ŭ mianie jość svaja prakuratura, našaj respubliki».

Pavodle eks-namieśnika ministra abarony spadara Ŭschopčyka, da jaho biełaruskaja prakuratura nikoli nie źviartałasia, jak i litoŭskaja. Uładzimier Uschopčyk skazaŭ, što jašče 18 hadoŭ tamu jon davaŭ tłumačeńni ŭ hetaj spravie śledčym Savieckaha Sajuzu, ale «toj krainy ŭžo niama».

Tanki, jakija byli ŭ dyvizii pad kiraŭnictvam Uschopčyka, nie mahli apynucca kala televiežy bieź jahonaha viedama.

U Hieneralnaj prakuratury Litvy paviedamili, što adtul z 1993 hodu nieadnarazova dasyłalisia zapyty ŭ Respublikanskuju prakuraturu Biełarusi adnosna Ŭładzimiera Ŭschopčyka ŭ suviazi z padziejami 1991 hodu. Hałoŭny prakuror adździełu mižnarodnych suviaziaŭ i pravavoj dapamohi Rałandas Tylindzis skazaŭ, što Ŭładzimier Uschopčyk razam ź niekatorymi inšymi ludźmi zastajecca padazronym u spravie, jakaja dahetul nie zakrytaja:

«Tanki, jakija byli ŭ dyvizii pad kiraŭnictvam Uschopčyka, nie mahli apynucca kala televiežy bieź jahonaha viedama. Tamu my miarkujem, što majem padstavy zadać pytańni adnosna našych padazreńniaŭ».

Rałandas Tylindzis miarkuje, što ŭ suviazi z zajavami Alaksandra Łukašenki adnosna Ŭładzimiera Ŭschopčyka «źjaviŭsia novy impuls u raśśledavańni hetaj spravy».

Radyjo «Svaboda»

Клас
0
Панылы сорам
0
Ха-ха
0
Ого
0
Сумна
0
Абуральна
0